طريقة تحضير الشخشوخة الجيجلية من مطبخي حصريا

[أثيلة]

السلام عليكم و رحمة الله و بركاته أخواتي
صباح/مساء الخيرات
عساكم بخير جميعا
اليوم أردت نقل لكم طريقة صنع الشخشوخة طبعا هذا لكل وحدة حاصلة و تضطر كل مرة تشريها جاهزة من الحانوت و طبعا بدون ذوق
كيما نعرفو كامل كش شخص و طريقتو في صنع الشخشوخةو لكن حنايا في جيجل و ميلة تاني نخدموها الأغلبية فالطاجين كيما راح نشرحلكم الآن بالصور
تفظلو معي
باسم الله على بركة الله نبدأ
الخطوات الأولى ماصورتهاش لانو ماكنتش راح ننشرها حتى جات فكرة النشر لما بدأت التحضير
طبعا في قصعة نحطو السميد و الملح الكمية لي تحبيها انتيا و الملح عينك ميزانك
و نلمو العجين بالماء ومن الأفضل يكون دافئ
نلموها و نعجنوها كيما نعجنوا الكسرة و لكن أكثر منها بحيث نعجنوا حتى يتغير لونها الى اللون الأبيض
بعدها نقسم العجينة إلى مجموعات و نصنع منها حرابيش و نقطعوهم بالموس مثل الصورة التالية



و بعدها لازم نغطوها بالساشي كيما فالصورة هذه



نخلوها تبقى حوالي ربع ساعة و نبقاو نطرحوها بالسلال او الحلال كل واحد واش يقولو



طبعا هنا كل وحدة حرة لي تحب تحل العجين بالالة تاعو تستعملها انا عندي لكن هكاك يكونو قطع صغيرة و نتقلق و نتعب في طيابها لهذا نفضل نديرها بالحلال
هذه صورة الآلة الخاصة بالطرح و كامل تعرفوها



و بعدها نحطوها فوق قماش على هذه الطريقة



هنا راني كملت الجهة الأولى



بعدها نغطيها و نزيد نحط من فوقها على هذه الطريقة



و نبقاو نديرو هكا و نغطو حتى نكملو العجينة لي عندنا

بعدها نحطو الطاجين يسخن انا نستعمل الطاجين تاع الرخساس اي تاع طين و نستعمل بالضبط لي يكون مرقوم و طبعا انتم تقدرو تستعملوا لي متوفر عندكم و لي تحبوه
هذا هو طاجين لي استعملت



هنا لما يسخن مليح نبداو نطيبو العجينة اي ننشفوها مالازمش تحمل و لازم نعملو جهدنا باش نخلوها بيضاء تنشف برك



و هنا راني قلبتها



و هنا فالصورة هذه حبيت نوضحلكم كيف انو العجينة تتنفخ فالوسط وهذا يدل على انها معجونة مليح



و هنا شوفو وقفتها حتى ينسفو الجناب تاعها تاني



بعدها هنا نباسيها لماما تهبطها فالسيار الخاص بالشخشوخة و نوريكم هنا الصور الخاصة به
أنا صراحة نحب نستعمل هذا تاع الحديد و لي هو أكبر مني يعني ملي شراه بابا قبل مانخلق أنا



لكن اليوم استعملنا هذا كون أنو القديم فسد و خفت يجرح ماما و طبعا هذا راه متوفر في كل المحلات




و بعدما شفنا السيار نوريكم الصور تاع ماما و هي تهبط فيها و طبعا مش لاومها جهد ماتخافوش فوتي عليها غير بالعقل و هي تهبط و لازم تكون سخونة حتى تكون سهلة
يعني وحدة تطيب و وحدة تهبط هكا لي تجي سهلة
هذه الصور



بعدها لما نكملوها كامل بالتطياب و نهبطوها فالطاجين نفوتوها فالسيار العادي و يكون كبير شوية يعني مش الغربال و هكا حتى نفرزوها و نحو لي مش مليحة



و هذا لي يجي تحت السيار


و هذا حنا ماناكلوهش الاغلبية نحط منو للحمام لكن قالتلي ماما كاين لي يعاودوه كيما الشخشوخة و يسقوه بالخضر و اللحم

و أخيرا هذه صورتها لما حطيتها تنشف للعيد
كاين بزاف لي ينشفوها فالشمس لكن انا نفضل ننشفها هكا فالظل حتى ماتكونش فيها ريحة الشمس وكيما كامل علابالنا الشخشوخة نشمخوها برك لما نجو نفوروها مش كيما الكسكس نغسلوه



حنا هنا رانا وجدناها لعيد الأضحى إن أحيانا الله و لي يحبو طبعا كاين بزاف لي يخدموها للعشا و مباشرة يفوروها
وهذا كيما تحبو

أووووووه و أخيرا كملت تعبت بزاف زعما تعبي هذا يستاهل تقييم ولا لالا


ان شاء الله يستفادو بزاف من الموضوع

تقبلوا عملي المتواضع
ولا تنسوني من تقييمك

سلام جميل
أختكم في الله
رشا ^_