هانا لحد الساعة ساكتين

[مشكلتي]

نحن أسرة تربينا تربية تاع عسكر ( اولاد وبنات ) وخرجنا رجال ونساء
الله يبارك 6 بنات كلنا متزوجين وفحلات تاع الصح
المهم دائما نحن الاخوات ويمة نخيرو النساء لاخوتي الرجال
ولي خيرناهم كانوا على القصب نوعية فوور
المهم جاء دور اخي الصغير نطقت وحدة فينا قالت خلوه يخير هو ( هناك جاءتني غصة )
ويمة قالتلينا رانا نندموا ذرك يطيح في طفلة تهفوا باك العفايس تاع الذري و هي ماتعرف والو ( ولقد حدث فعلا يا سبحان الله )
تزوج اخي احدى المدلالات هاذوك النوعية لا طبخ لا تلم دار لا والو ( ياو مكانش الذراع )
من هاك النوعية مانكير قبل كل شيء ، ظفري تكسري ( عايشة في القطن ببففففف )
اول نهار شافتها يمة في الخطبة قالت لينا راها نوعية تشي تشي ونحن مانمسمعوش لكلام وخويا يلح علينا
تخيوا مراة ماتعرف والو يا ديني
هي تسكن فوق شوفوا
تهبط تشرب قهوة ومادير والو وتطلع ( كي شغل انفيتي ) ونسمعوا في ايقاعات المسللات من مسلسل لمسلسل
ودار خويا غابة يالطيف طاح في عرة النساء
ومرة كانت عنا مناسبة عائلية كل كناين جو كان هيا " مسقمة "
ومع العلم تعرضنا لهاته النوعية مع اخينا الثالت بصح زوجتو هادي في ظرف 3 اشهر واش رجعت يا عباد ربي
رحنا قبل شهر ليها ( كونترول ) انا ضبعت تشوكيت هاك النظام ؟وش ولت تعرف طيب كل شي فقط بالملاحظة علينا ، الدار تشعل بالنظافة
اختي لكبارة ماقدرت تقول حتى كومنتار ويمة تهنت صح على خويا هاذا فرحت ،، يعني زوجتو متهليا فيه فوق المليح
وزدت انا شريت لاها كادو وطلبت السماح خطراكش سمعت ما لايسمــع
بصح هاذي اميرة اخونا الصغير نبعثو لاها في لميساج وتلعبها ماعلابلهاش
ويمة واختي الكبيرة القلب معمر هاد فرصة برك
وراكم تعرفوا اذا خرجت كلمة طلاق من فم والدتي ياو طلاق كون تكون زوجتك ملكة او زوجك ملك

[AMINA.Z]

ببببفففففف
واش دخلكم في بنت الناس
احكمو دياركم و خليو المخلوقة و راجلها عايشين ....ياك هو اللي خير ...ربي يسهل عليه.
ماش عاجبتكم تجي تاكل و تروح ...قولولها ما تزيديش تجي ....هاكا تولي تفهم روحها و تشطار و كي ما تعرفش هي تجي تقولكم علموني ....و ماكالاه تلعبوها بزاف و حبسو القيل و القال.
نحير في ناس البلاد هاذي....بالنسبة ليهم المراة قيمتها في الطياب و الغسيل ...و كي ما تعرف دير والو ..تولي ما تسواش دورو.
هاذ الامور ..اللي يجي يتعلمهم ..في كبرو و الا في صغرو .
بالصح الغيبة و التقرعيج و تشراك الفم ..هاذو اخلاق ..اذا صح كبر عليهم الانسان ربي يستر.
و الحاجة اللي قلقتني ....شايفين رواحيكم و عاطيين لرواحيكم الحق باه تحكمو على بنات الناس و زيد تحكي عليهم ..تقول قماش ..بالنوعية !!!!!!!!!!!!!!!!!!!!!
ما نعرف من واش راكم مخلوقين انتم ...و الا بالاك نتوم تاني ماكمش نسا و وليات !!!!!!!!!!!!!!!!!!

[بشـرى]

السلام عليكم

أختي الكريمة مثل ما قلتِ ، انتن ست بنات وكلكن متزوجات ، أليس الإهتمام ببيوتكن وأزواجكن أفضل لكن من تتبع زوجات إخوتكن؟؟؟ ....

أعذريني على كلامي لكن صراحة لا دخل لكن في حياة الأخ ، زوجته هو اختارها ومقتنع بها ، اهتمت به وبشؤون بيتها اللهم بارك، لم تهتم ... هي مشكلة بينها وبين زوجها ، وأي طرف ثالث ليس له أدنى حق في التدخل لا من عائلة الزوج ولا من عائلة الزوجة ....

اهتممن بحياتكن ودعكن من تتبع الناس يا أختي ، ونحن لا يمكن لنا أن نجزم بأن كل شيء كتبته صحيح لأننا لم نسمع الطرف الثاني ( زوجة الأخ ) فبما انك صاحبة ( المشكلة ) والتي لا تعنيك أصلا فبطبيعة الحال ستلصقين بها كل ما هو سيء ....

ونصيحة أخرى ، يا أختي ... لا يتملكك الغرور ابدا بنفسك وبأخواتك ، فقد تكون هي خير منكن وانتن لا تدرين لأن عزتكن بنفسكن تعميكن عن رؤية الأشياء ....

[ام رضوان]

السلام عليكم
اسمحيلي اختي راني حسبت روخي نقرا في قوانيين جيش
يااختي حبيت نسالك عيشك عندك الوقت باه تراقبي زوجة اخوك واش راهي الدير
ودارك وولادك وزوجك
كون تاخذي من رايي اجبدو رواحكم واتهناو راهي زوجة وعلى حساب كلامك مازالت صغيرة وحابة تدلل
وزيد علموها بالعقل مش بالصراخ والاوامر كي العسكر
واظن العصمة بيد الرجل مش بيد امه
يالي راكي تقولي كون تخرج كلمة الطلاق من فم امك
هذا راي سلام
خافو ربي وخافو دعوة المظلوم

[إسلام الفاروق]

بنات ليوم تاع مسلسلات التي اصبحت شبه اباحية اخطوكم منها
خوك ربي معاه اخذ واحدة فاشلة ربي يهديها
سلام

[عين الصقر]

السلام عليكم
اذا هو عايش مع مرتو لاباس وعاجباتو وماشتكالكمش منها
وهي محتارمتكم ولم تسئ لكم
انتو تزوجتو بالطفلة ولا اخوك
احيانا نحير في النساء

من الأفضل خوك يسكن لوحده في بيت مستقل
في الجزائر فقط يحبو نسيبهم يقلش بنتهم وبالمقابل يحبو ولدهم يحرث على مرتو
انا اسمحيلي نشوف الطريقة اللي تخكي بيها في الموضوع نميمة وبغض

[كاميلا]

هههههه ملقيتش واش نقولك صراحة موضوع يشوكي الراس اهو مازال اللي كيفكم في المجتمع دورهم التدخل والنقد اكثر من ابداء النصيحة والعمل
انا لي 3 اخوات وعندنا مرت خويا فنيانة والله العظيم امي تقولنا وحدة مدخل فمها في بنت الناس عندها راجلها ياكلو بعضاهم ميهمكمش هدا بخصوص حدوث مشكل بينهم
اما يا حبيبتي نروحولها كونترول ونديروا عليها عجايز ههههههه اسمحيلي هدا لا راهو من الدين لا راهو من تربيتنا تربينا في دارنا واحد ميداخل في لوخر الا والدينا وكي كبرنا والدينا قالونا خلاص دورنا في التربية وحتى والدينا اصبح دورهم النصح وفقط
نقولك حاجة عيب اللي تهدري فيه عرة الناس وعبارات جارحة على مرت خوك سامحيني بصح تباني قبيحة وواعرة انت واهلك ربي يقدر بنت الناس اللي خلاوها عندكم
وكنصيحة التهاي بدارك درك انت واش دخلك في ديار الناس راكي زيادة برك معندك حتى حق حتى في الدين والديك ومعندهمش الحق في التدخل اما انت معندوا مفراك خلاص
سبحان الله الزموا حدودكم

[كاميلا]

في خطبة الجمعة الفائتة في المسجد اللي قدامي سمعت واش قال الامام لان الصوت كان عالي قال بعثتلي امراة برسالة تشكو فيها من زوجة ابنها الكسولة وتنعتها بصفات مش مليحة فيما يخص اعمال المنزل وحتى انها تتدخل في خصوصياتها الشخصية وقالت للامام كيفاش نخلص ولدي منها !
تعرفي واش رد عليها الامام ! قالها علاش تتبعي في عوات زوجة ابنك مدامها امراة غير منحرفة هاداك الشغل كامل مع الوقت تتعلمه وقالها اهتمي بمنزلك ومادخلك في منزل ابنك وقالها الزمي حدودك لان الان ولدك اصبح رجل وﻻب اسرة وبيت فيه زوجة تسييره انت معندكش الحق في التدخل لانه الحياة هادي فيها حدود حتى بين الاب واولاده بين الزوج والزوجة وقالها لا تملكين اي حق عليها
هادي امه قالها هك امالا كون يسمع بيكم يبهدلكم بالجملة ههههه

[أم أنفال1]

شوفي ختي اذا دارت تصرفات تأذيك انتي او باقي اخوتك او امك هنا وجب عليك الدفاع عن نفسك وتوقيفها عند حدها .واذا لم تفعل اي شيئ يضر بكم علاه راكم آكلين همها كيم يقولو الهنودا.خليو المخلوقة مدام راجلها عايش معاها فالبيت وقانع بسلبياتها انتوم علاه دخلو رواحكم فيها وتزيدو تراقبوها .هي الله يهديها تبعت المسلسلات وضاعت وانتوم الله يهديكم تبعتو مرت خوكم وادخلتو فيها

[محمد جديدي التبسي]

فعلا المراة التي لا تجيد اعمال البيت كارثة على زوجها لذلك الأفضل ان تستقل بمطبخها الخاص وتبقى علاقتكم مقتصرة على المجاملات ..ربي يعينكم

[nihal159]

ربي يهديكم؛ والله ما لقيت مانقول.
وزيد ليي قالتلهم أرقدوا؛ أمك تأمر بأبغض الحلال و تقول لوليدها طلق مرتك و خرّب بيتك؟؟؟؟؟ خافو ربي راكم نتوما لي غالطين فيها؛ ربي يهديكم.

[اياد حياتي]

لا اله الا الله واش حاسبين في روحكم انتم درت الديار وتحبو تخربو دار خوكم اتقوا الله باين زوجتو وحابين تحكموافي نسا خاوتكم الله يهديكم وزيد يماك الا خرجت الكلمة لا اله الا الله هذه خرجت فيكم

[HSSASNA]

لا اله الا انت سبحان

[HSSASNA]

لا اله الا انت سبحانك اني كنت من ضلمين

[امل ضائع]

واش رايحة نقولك اختي؟؟؟؟؟؟؟
من جهة عندك حق راه خوك و كارثة واش راكي تحكي..
ما تقدرش تدير دار تقعد في دار باباها...
و من جهة ثانية اختي ما تقدري ديري والو خوك هو الي عندو سلطة عليها و هو حر في مرتو.. ادا هو راضي بيها ربي يسهل عليه...
و انت اختي عليك بالنصيحة و بالتي هي أحسن و ستتغير ان شاء الله. ..
ربي يصلح الاحوال...