طاجين البسباس بالداند

[سيرين 5]

اليوم جبتلكم طاجين البسباس بالداند طبق صحي ولذيذ مممممم و سهل التحضير راح نحط الخطوات مع الصور :
1- في كوكوطة (ما وليتش نخافها ههههه) رابي بصلة + قطعة داند منزوعة الدهون كليا + ورقتين رند (إختياري) + ملح (نصف الكمية المعتادة) + فلفل أسود + قصبر مرحي + راس الحانوت + ثوم + م ك زيت زيتون



2- بعد ما نقليهم على نار قليلة، نقي البسباس تاعي و نقطعو قطع متوسطة نزيدو نحطوه يتقلى شويا مع البصل و نمرقو بماء ساخن حطيت شويا معدنوس نسيتو في الدوزين



3- كنت راح نحط الحمص لكن لقيت عندي زيتون منزوع الملح راح يفسد قلت نحطو بدل الحمص (ماشي مليح الخسارة) و أنا نحب البنة تاع الزيتون في الأكل



4- و غلقت الكوكوطة و خليتها طيب واحد 40 د و كي طاب وجدت العقدة في طبسي حبة بيض + معدنوس + قارص



5- و هاوليك بعد ما درتلو العقدة و قدميه بالصحة و الراحة



ترقبو المزيـــــــــــــــــــــــــد من الوصفات الصحية كل يوم إن شاء الله