تجي امك ترفدك

[مشكلتي]

جزاء سنما ر
يومين وانا نطايش في الدار وحدي عندي مشكلة في التنفس والزكام بسبب انفي عملت حقنة عضلية تاع تيتانوس كوقاية لاني حامل يدي توجع وعضامي والسخانة يومين حاكمتني لم يكلف نفسه شيئا ميخصر عليا غير كلمة نعيط لامك تجيك او نديك لداركم هدرها من قبل وعقبتها شحال من مرة البارح في الليل كون طلعت روحي كون راني مت ومفاقش بيا انا نتوجع وهو راقد
منين يمرض منرقدش نبقى فوق راسه حتى يرتاح

انا امانة والديا حطوهاله كون نديرله واش دارلي كي يمرض ونقوله روح عند امك كون راه واحد مايرحمني
قلبي يوجع فيا غاضتني روحي هدا مرض خفيف كون نطيح في شوكة واش يدير فيا خليت دار والديا على جالة هكا

[اياد حياتي]

ربي يشفيك اختي ومعظم الرجال هكذا يحبو دائما المراة بصحتها وانتي علاه ما تسمطيهاش عليه باه يديك لداركم ربي يهديه

[sarl02]

الله غالب هذا هو الفرق بين الرجل والمراة .....روحي لداركم اتريحي وتبدلي جو واربحي صحتك .....وخليه افايسبوكي شوية على راحتو ..ما عندو ما اديرلك المخلوق

[nihal159]

ياختي ماتنتظريش من الرجل يطوّل بالو معاك و يساعفك؛ أنا كي نمرض ؛ أنا لي نقولو ياخذني لدار بابا نرتاح شوية هذي ما فيها والو.

[oumhana]

صباح الخير ختي طولي بالك الراجل و لمرا مشيي كيف كيف وزيد هو يرقد بلاك خدمتو متعبه وانت إذا هاذامولودك لول ساعفي متكبريش لحكايه وراكي مليحة مقالكش نجيب يما تقعد معاك لوكان راكي نضتي تجري هههه نقجم برك. ما رأيك في راجل كما راجلك برك كتمرض مرتو تقولو ديني لدارنا يقوللها شحال تحبي لهول ريحي في دارك .

[محمد جديدي التبسي]

ربي يشفيك يبدو ان علاقتك متوترة مع زوجك ولستم بالقرب الكافي ولا التوافق المطلوب
واش راح ديري! ما عليك سوى الصبر والسعي لاصلاح ما يمكن اصلاحه في زوجك
وكلما كانت جهودك صادقة أكثر وخالصة لوجه الله نلت الاجر والثواب .. ربي يفتح عليك

[بنت الرّحّل]

الأربعاء : 8 جمادى الأولى 1437 من الهجرة النّبوية

بسم الله الرّحمن الرّحيم

السلام عليكم ورحمة الله وبركاته

قد لا يكون لي حق في إسداء النصيحة لكني أعتقد أنك تفتقرين إلى بعض المرونة ، فالفكرة التي طرحها زوجك بقدوم والدتك أو ذهابك إلى بين أهلك ليست فكرة سيّئة! ولا تدل على عدم اهتمامه بل بالعكس تماما
فكل شقيقاتي المتزوجات حين يمررن بوعكة وخاصة أثناء الحمل كل أزواجهن يفكرون بهذه الطريقة ،وهي فكرة متقبلة عندنا جميعا

لم أفهم لماذا استأت من هذا الاقتراح ؟
هناك بعض الرجال من لا يفكرون بهذه الطريقة أبدا ،فزوجك أرحم بكثير ، فمنهم من لا يسمح بهذا مهما كان حال زوجه،بل سمعت من إحدى الزوجات أنها تتحمل المرض والمشاق ولا تظهر عناء: لأن زوجها كلّما مرضت أو تعبت يقول لها : أليس من الأفضل لي أن أجلب زوجا أخرى تساعدك
يا له من لئيم عديم الأخلاق !
فأنصحك أختي الكريمة بالتعقل ولا تسمحي لبعض المشاعر السلبية أن تؤدي بك إلى زعزعة الثقة بينك وبين زوجك
كما أن عليك اتخاذ الأعذار لزوجك فلعل طبيعة عمله تجعله مرهقا فلا يهتم لمايدور حوله إذا نام

وللأسف أختي من الرّجال في مجتمعنا من يفتقر إلى بعض الأخلاق الحسنة والرحمة والشفقة اتجاه الزوجات و لا يرى ضرورة الاهتمام بالجانب العاطفي لزوجته بالأخص إن مرضت أو تعبت ، ربّما لعدم تعويد الذكر على العطف والحنان على الأنثى في البيت فيكبر وهو يعتقد أنّ الجلافة والغلظة هي الرّجولة !
أتمنّى أن تأخذي هذا بعين الاعتبار في تربية أبنائك في المستقبل وأن تراعي تنمية العطف في قلب الأخ على أخته !

ولاشكّ لأنّك حامل تمرّين بمرحلة عاطفية صعبة جدا يجب أن تتجاوزيها بسرعة وأن تكوني حذرة من الاكتئاب لأنه يؤثر عليك بالدّرجة الأولى وعلى جنينك أيضا -والله أعلم-
فأسأل الله أن ييسّر لك الولادة ويرزقك ذرية صالحة معافاة

أتمنّى لك التّوفيق

[moussabm]

أنا نظن هذا هو العرف نتاعوا ماتلوميهش
ربي يهنيكم

[أريج الهدى]

السلام عليكم حاولي طولي بالك ومتحكميش عليه بالسيء وتفكري دائما الحاجات المليحة اللي كانت بينكم تخفف عليك ولا تكوني كاللاتي يكفرن العشير وكوني متأكد مهما صرا عمرو مراح يتخلى عليك قدري قيمة العشرة اللي بيناتكم ومتذكريش أبدا مساوء الزوج تاعك لنفرض لوكان جا عندك ورضاك راح تندمي على كل كلمة قلتيها فيه ربي يصلح أحوالكم

[رزيقة16]

اختي ربي يشافيك نشالله ايقويك با السلامة لاباس عليك حنونة كلش افوت وسعي خاطرك

[ايمان العرب]

السلام عليكم
الله يشفيك
المراة و حسب تجربتي و خاصة اتناء الحمل تمر بحالة تفسية صعبة فلا تضخمي الامور لما قال لك اذهبي لاهلك فهذا امر جيد لانه يعرف انو اهلك يهتمو بك في مرضك اكثر من اي شخص اخر

[قناعتي سعادتي]

يا اختي اصلا كاين اللي في مرحلة الحمل تتبدل الهرمونات نتاهم و يولو حساسين فوق اللازم

روحي لداركم ريحي شوي وبدلي الجو و

هو والله كيما كامل الرجال يقولك نديك لدار باباك ولا تجي يماك ترفدك في بالو راهو يساعد فيك

وانت راكي مافهمتيش قصدو برك

مبعد كي تفوتك المرحلة هاذي نتاع الزعاف تولي تضحكي على روحك

المهم ربي يهنيك اختي و يسلكك على خير انشاء الله

وتهلاي في روحك وفي دارك وراجلك على خاطر مايدوملك كان هوما

[أم عبد الكريم]

الحمل هو لي خلاك تتحسي منو ....لوكان جيت منك نروح عند ماما بدون اطالة للموضوع ....روحي عند امك تستعفاي