مشكلتي الجسدية والنفسية

[مشكلتي]

السلام عليكم
شكرا على هذه المساحة .. عندي مدة وانا متابع لهذا القسم تاع مشكلتي اعجبني ياسر ولكني ماعنديش عضوية صاحبي هو الي اخبرني عن هدا المنتدى بصح ما سجلتش لاني نادرا ماندخل للنت لاعلينا المهم عندي مشكلة ان شاء الله تفهموني
أنا شاب 26 سنة عندي مشاكل صحية ولكن مش ضارة ولكن ضرتني نفسيا كيما تعرفو الواحد يكون شاب وزايد طالب جامعي رايح يتوله لنفسه ويقارن نفسو بالشباب الاخريين وهو في عمر الشباب رح يبدا يتعرف على معالم الرجولة في نفسو وعلى هذا انا عندي نقائص في جسمي عقدتني وخلاتني نمشي مع الحيوط في الجامعة مانعرفش نحكي مع البنات ابدا وماعنديش الثقة في روحي دايما نحس روحي مرفوض وانني مهما تقدمت لاي فتاة رايحة ترفضني لانها مش محتمة تقبل بواحد معيوب كيما انا
انا شاب عندي الخنف ولا يسموها الخنة المهم صوتي يخرج من أنفي أزعج به السماعين سببلي هدا الخنف التأتأة الاحراج وأنزعج من الكلمات الي فيها النون والميم واحيانا يعلق عليا الناس ويضحكون من صوتي عقدتني هده الحالة خلاتني مانقدرش نعبر على واش حاب ومع اني عندي الافكار الا انا منخرجهاش بسبب العقدة ومنقدرش نشارك في الحوارات بسبب الاحراج ثاني شي عندي ظهري معوج ورقبتي قصيرة نوعا ما وعندي آالام في الظهر مانقدرش الوقفة ولا القعدة بلا الم هدا الاعوجاج عقدني حتى اللبسة ماتخرجش عليا نحب نلبس لكن أي لباس ما يخرجش عليا زين وانا وصاحبي مع اني عطيتلو نفس الجاكيت الا انه خرجت عليه زين اما انا جاتني مبهدلة ....ثالث شي الحب الشباب ومشاكل الشعر فوجهي معمر بالحب والاثار وكدا شعري مليان قشرة ويتقصف وعمري في حياتي ولا درتو الجال كيما الشباب لانو يرجع يحشم كرهت خلاص أما اللحية فحلم بعيد المنال .... ورابع مشكلة هي حصى الكلى لحد الساعة ما بريتش منو وكل يوم الالم مرة ينقص مرة يزيد بصح ما يزيدش ..
علاه لازم نكون ناقص عن اقراني انا مشكلتي في الاطباء اكثر واكثر دايما يعاملوني باستهزاااااء ومايراعوش لحالتي النفسية السيئة انا شاب نحب نعيش كباقي الشباب فرغم انا قامتي لا تتعدى 170 الا اني نحب نكون جسمي معدول ونحب يكون عندي لحية ونحب وجهي يكون صافي وضاوي ونحب ندير الجال ونحب صوتي يكون زين ونحب نكون رجل سوي علاه ديما نروح للاطباء ولكن نتعرض من طرفهم للاستهزاء وتصغير للمشكلة والاستهانة بها ..
قاعدين ياكلولي في الدراهم يحسبوني نطبع فيهم .. مزالني نشفى للطبيبة تاع الجلد لجيتها على مشكلة الشعر والوجه قاتلي بالنسبة للحية ماتهمش لوكان عارفها ماتهمش علاه نجيها
الصراحة كرهت حتى من الكتابة كل هدا من القنطة
حاب يكون لموضوعي جزء ثاني نشرحلكم فيه مشكلتي مع الاطباء
شكرا على الاصغاء