شعبـة التقني ريـاضي ولا ريـاضيـات؟

[المُعادلة الصّعبة]

سلام عليكم خاوتي سافا مع الفروض
حبيت نستشيركم مع الوقت اللي بدات فيه بوادر نهاية العام ، حول الشعبه اللي مأرقتني ومأرقتلي تفكيري و مسيطرة عليا اكثر من أي وقت مضى
انا كنت حاطه في راسي من قبل ما نطللع لليسي اني ندير تقني رياضي هندسه كهربائيه يعني ف الليسي تاعنا كاين غير هندسة كهرباء
المهم ضركا وكي شفت لي رح يطلعوا ليها ؟ غير "المسوفجين" و هاذوكم المستهترين وانا علابالي بروحي نتأثر بالجو سيرتو هوما ما يقراوش و كي يشوفوهم الاساتذه هكاكا يتهاونوا ، فأنا نتهاون لانو طبعي هكذا هههههه نتاثر بالجو المحيط بيا
بدلت رايي هذيك السع وقلت ندير رياضيات ، علما اني مانيش هذيك الfort ف المات ومشني ههذيك اللي اطّير طيران فيها بصح نجتهد ونجيب فيها ، يعني تشوفوا بلي مانلقاش روحي كي نطلع للشعبه هذي ؟ وزاد انا نحب التحدي والمغامره وتشجعت كي شفت اغلب الاذكياء والقاريين رايحين ليها يعني بثوا فيا روح المنافسه والتحدي وانا كي نشوف هذاك الجو نتحمسس عكس الجو اللي رايحتليه ف الماتيكنيك ؟ رح نتعب ياسر
انا عرفت التلاميذ اللي رايحين لكل شعبه كي هدرت مع مستشارة التوجيه و شفت التلاميذ "المرشحين" باش يروحولهم يعني ماشي نتيجه نهائيه بصح مرشحين برك
اهلي يقوولولي روحي ماتيكنيك حاسبتلهم ساهله زعما وباش ما نتعبش و يكتافيوا بلقليل يعني اذا جبت 17 معدل ما يقولوش جيبي كثر يقولولي صاحييتي مع اني عندي امكانيات أكبر
مانحبش نروح للساهل حابه نروح للصعيب باش نمرن مخي و نكبروا و نخدمو و نتنافس مع العمالقه لاني عملاقه و نشوف بلي شعبة التقني رياضي ما تصلحليش لاني حاسه بلي شعبة الرياضيات هي تع "الامتياز" وهي الاحسن
معدلي تع الفصل الاول كان 17.15 وكانت الرياضيات مطلعتهولي كان معدلي ف المات 18.00 وشرايكم زعمـاا
نحب ذوي لخبره يجاوبوني محتاجه جواب راني نخمم ياسر اشفوا غليلي الله يستركم راني يامات وانا عالقه نخمم نخمم و خايفه نختار الغالط ونندم
وووووووو اني سكتت هههه واخيرا؟ شكرا