قلعة الشيخ بوعمامة ألم وأمل

[رائد القلعة]

قلعة الشيخ بوعمامة

ألم وأمل

قصيدة كتبتها في الثالث من شهر أكتوبر2009، بمناسبة سنة من مرور فيضانات أكتوبر 2008 التي ألجقت أضرار كبيرة بواحة القلعة التي تحوي أكثر من 13 ألف نخلة، وأزيد من 20 ألف شجرة مثمرة...

قلت فيها:

بسم الله نبدا حكايتي يا لخوان** والصلاة علىالرسول العدنان

قلعة سيدي بوعمامة في لمحان** نخلها وشجرها بايت عطشان

البطاحي يشكو وزيد لوبارات** والعين والفقارة فيها تفارات

السواقي فيها مردومة أوحال** وجنتنا عامرة كلها رمال

من واد أكتوبر ألفين وثمنية** ما شافت الساقية قطرة مية

جاو بني عمي درسوا القضية** قالوا ما لينا غير البلدية

نشوفو المير ولاصامبلي** والشاف دايرة وللقلعة نولي

انتظرنا مدة ما صبنا والو** "ما علابالناش بيكم" هكذا قالو

ناضوا الشباب قالو ما نرضاو** بالحقرة والذل هذا عهد رجال

نجهرو الفقارة ونخلصوا غاية** اولاماكانش ما نقبلو حكاية

في وسط الحيرة جاو الحكما** قالو عيب نفرطو في ملك بابانا

الجميع تطوع في الحملات** ما بقاو غير المرضى وذوي الحاجات

بعد ربع شهر من الاشغال** ما قدرناش نسرحو ديك المياه

ودخل رمضان شهر الحسنات** وطلبنا ربي فيه كل الرحمات

في العشرة التالية جاتنا حملات** دات حبابنا من المرينات

مصيبة كبيرة ألمت في الحين** وزدنا ندور على المفقودين

وبين القلعة وسيدي إبراهيم** تم نصابو دوك المرحومين

وفي هذا الواد دخلت المياه** للولجة وزادت للفقارات

في ليلة القدر وصلاة العيد** دعينا ربي جميع صغير وكبير

وبداو السكان في المشاورات** قالو نشكو حالنا للقيادات

بوتفليقة والوالي وأحمد اويحيى** مع وزير الفلاحة وثلاث وزرا

قال الوالي ماعندي خبار** من غير كلشي مليح يا سبد الوالي

يعطوه خبار كلهاغلطات** الساقية تسيل والغابة لاباس

والشعب زاهي ما يخصه قضيات** والشباب ياكل فيها بالمساك

وقلنا كيفاش الغاز ما شفناه** قالو حولناه ولمغرار جبناه

اصبرو سنين تلحقو بينا** المتوسطة والقودرون ليكم مزية

جاو العقلا من ذيك البلاد** قالو خاطينا واشراه يندار

انتم حبابنا نسابنا وخاوتنا** وفي الشدة قسمنا معاكم الخبزة

كلشي واضح باين للعيان** السياسة فرقو بين الاخوان

خمس سنين تفوت كي فاتت الاخرى** لكن العيب يبقى في الذكرى

التاريخ يسجل وما ينسى** ودعوات الشر تلحق في الاخرى

وربي ينصر قايدنا الاعلى** عبد العزيز زين الرؤسا

والقلعة تزيان وتصبح خضرا** ما دام فيها رجال يوزنو عشرا