فضفضة

[مشكلتي]

السلام عليكم
خاوتي حابة نحكيلكم موضع متعبني بزاف مانعتبرهاش مشكلة لكن تعبت بزاف
انا في عمري 25 سنة سبق و تخطبت شحال من مرة و كل مرة تتفسخ الخطوبة مرات من غير سبب ومرات يكون ليها سبب و مانحكيش على لي يتقدمولي مزال ماتكونش بداية و يبطل او يهدرو عليا ومتوصلش للخطبة
المهم مريت بيام صعيبة بزاف تعبت نفسيا و وليت نخاف اني نتقدم اي خطوة للامام خوفا من انها ماتكملش دايما يافرحة ماتمت
اخر مرة تقدملي اخو صديقتي و كان عن طريقها هي هوما ناس ماشاء الله مافيهم مايتعاب مع العلم انو تقدمولي قبلو واجلتهم بسببو هو
المهم انا مانعرفوش وهو تاني هدرت معاه في التليفون وقالي راني متفاءل المهم جانا للدار على اساس رؤية شرعية وومن النظرة هاذيك وانا تجذبت ليه بالرغم اني مانعرفوش وماهدرتش معاه غير مرتين لكن اخلاقو صفاتو شكلو كيما كنت متمنية فرحت وقلت خلاص هذا هو هذي هي الغلطة لي درتها اني وثقت في نفسي اكثر من لازم ومادرتش في بالي انو هو تاني عندو راي ممكن يقبلني وممكن يرفضني
المهم جاني اتصال منو وقالي كلش بالمكتوب انا حاولت نكذب وذنيا و بقيت مصرة اني نفهم واش يقصد كاني تمنيت انو يتغير كلامو و ظاهرت اني قوية ومتقبلة لكن قلي يتقطع
المهم فاتت عليا ايامات صعيبة بزاف تاثرت وغاضني حالي و بقيت غير نخمم علاش يصرا معايا هكذا
كل مرة نتخطب وتصرالي حاجة و نتالم مانجي نخرج من صدمة ونتقبل الواقع والمكتوب يجي واحد اخر و نفرح ونصلي صلاة الاستخارة و نسقسي و نشاور باش مانتسرعش لكن بعدها !!!!!
المره هاذي هذا خو صاحبتي بقا في بالي ولحد الان متمنية انو يرجع
على بالي كلش بالمكتوب وعلى بالي بلي من حقو يشوفني و عندو رايو ومن حقو يقبل ولا يرفضني لكن حاسة تجرحت
ياريتو شافني من بعيد من غير مانعرف الموضوع
لي نطلبو منكم ادعولي ربي يفرج عليا ادعولي بالصبر
والله مفوضة امري لربي و مآمنة انو عسى ان تكرهوا شيئا وهو خير لكم
مانيش عارفة علاش مانحبش نخمم فيه وفي الموضوع حاجة فاتت لكن بلا مانحس يجي في بالي مانيش عارفة واش ندير