مشكلتي المطلوع

lina23 · 2015-01-31, 16:51

انا راني نعاني مع المطلوع دارتلي عقدة و زوجي اقولي ما طيبوهاش في داركم
جامي تجي طالعة .ديما تتفش في الطاجين .و مانقدرش نهزها خاطر طرية
تعمل مزية لي تفيدني

فايزة1207 · 2015-01-31, 16:53

اذا تفشت في الطاجين معناها خليتيها خمرت فوق اللازم

ziha24 · 2015-01-31, 20:56

اختي باش يجيك المطلوع طالع وخفيف كي تهبطبه ديريه قرصة
خليه حوالي عشر دقائق في بلاصة سخونة وطيبيه علي نار
متوسطة وحركيه بشوية وماتيئسيش حاولي حتي يصلح
بالتوفيق

الناقة · 2015-01-31, 22:29

يا اختي انا يجيني المطلوع هائل نستعمل السميد الابيض و كمية قليلة من الفرينة و مغرف خميرة نلم بالماء الدافي و نخليها قريبة من الموقد مدة صغيرة نلقاها تضاعفت ندلكها بالماء البارد والملح لمدة 5 دقائق و نشكل اقراص و نسخن الطاجين مباشرة غير يسخن نبدا نطيب راح يجي خفيف وشهي

imanaz · 2015-02-01, 08:59

https://www.djelfa.info/vb/showthread...9::19::19::19:
جربيها أختي و تبعي مليح الخطوات ماراحش تندمي و تولي باذن الله سبيسياليست تاع المطلوع.
المطلوع كي يكون خفيف حليه فوق قطعة قماش و رفديها بيه وحطيها بلعقل فوق الطاجين لانه اذا كانت بقوة راح تكسريلو الطلوع.
في الوصفة نسيت ما بينتش نوع الملعقة المستعملة : هي الملعقة الكبيرة و شكرا

جيجلية · 2015-02-01, 12:58

سلام اختي

نعطيك نصيحة وحل للمشكلة

كتقرصي العجينة قرصيها فوق القماش وحطي السميد الرقيق وهزيها فوق سينية مقلوبة طبعا ماتنحيش القماش وحطي فوقها شوية سميد وغطيها

كجي طيبيها انا عندي سينية تاع بيتزا تاع الحطب نحطها فوق القرصة ونقلب القرصعة ومن بعد نزلقها فوق الطاجين ما نمسها بيدي باش ما تهبطش السميد راح يساعد باش تزلق فوق الطاجين

يارب تكون فهمتيني

جربيها ورديلي الخبر

NASSIMA Z · 2015-02-01, 13:05

انا يجيني خفيف و طالع كي تخمريه متخليهش يخمر بزاف نصف تخمار واذا طرتيه مليح ومقدرتيش تهزيه اقلبيه فوق لوحة مرشوشة بالفرينة و بهاديك اللوحة تحبطيه فوق الطاجين بلا متمسيه

oum rayanedino · 2015-09-07, 16:35

مشكلتك كانت نفس مشكلتي و قعدت عام كامل و أنا نجرب و خرجت بهدا مطلوع فووووووووووور مقادير: 3كيسان فرينة.ملعقة أكل سكر و ملعقة أكل معمرة خميرة خبزو زيديلها شوية .2ملاعق زيت ملعقة صغيرة ملح طريقة تحضير: حطي فرينة و سكر و خلطي ملح و خلطي خميرة و خلطي ثم ديري ماء دافىء و زيت واعجني حتى تتلم و تولي تلصق في يدك عجينة لكن تلصقش في طاولة عمل من بعد حلي عجينة على شكل حربوش و قطعيها بالموس 6 قطع خليها ترتاح 5د من بعد رشي منديل بالفرينة و شكلي كل قطعة دائرة و رشيها من قوق و خليها 10د من بعد هبطيي كورة بيدك و كملي حليها بالحلال 0.5سم رشي من فوق بالفرينة و خليها تخمر 30د سخني مليح مقلة فوق طابونة من أحسن مقلة قديم باه ماتتخصرش من بعد أرفدي خبزة باشوية حطيها في مقلة 1د و أقلبيها و قعدي تقلبي حتى تتنفخلك كي بالون إذا كانت ناقصة طياب كملي طيبيه إذا كانت طابت نحيها .و مشكلتكك كي تحطيه ا تنفش لازمك تبداي بمطلوعات صغار وصفتي ديرلك 6مطلوعات متوسطين ومرة قطعي عجينة 5 ثم 4 ثم 3 حتى تولي ديري بهدي وصفة 3 خبزات كبار و تقدري ترفديهم بسهولة لكن من أول مره صعبب جدااااااااااااااااااا إذا حبيتي أي سؤال راني هنا و نتمنى إذا جربتيه وينجحلك تدعيلي و يولي وصفة ثابة عندك إذا جربتيه نجحلك فرحيني معاك بالتوفيق

raboha · 2015-09-08, 22:44

ختي أولاً المطلوع كي ينتفخ جامي يبقى منفوخ كي تنحيه من الطاجين
و كي قلتي عليها طرية راها الفرينة تاعك متحبش الماء و هو اللي يزيد يطريها و متخرجش شابة
إذا عجنتي بيدك متعركيش الفرينة أخبطيها كيما السفنج و خليها تخمر مليح من بعد فشيلها الخمور و عركيها بالزيت حوالي فنجان و قرصيها حنا نقولو نخبزوها و نحطها على قطعة قماش
و نخليها تخمر بصح ميش بزاف عشر دقائق لا اكثر و طيبيها رايحة تنتفخ بصح كي تنحيها من الطاجين اكيد ترجع عادي متشدش النفخ تاعها
خطرات كي نحبها طرية نزيدلها باكي خمارة قاطو
هذي طريقتي و كي شريت بيترا نعجنها فيه و تخرج ثان هايلة