علاجنا في بيتنا

[raboha]

البسملة1

هذا أول موضوع ليا في هذا القسم و حبيت نمدلكم بعض الأدوية المنزلية
من كثرة زياراتي لهذا القسم و شفت المواضيع قلت ندير موضوعي بالاك يفيدكم
كي يمرضو بناتي و لا حنا داوينا الوالدة بصوالح كاينيين فالبيت بعد ميكونو جبناهم من الغابة
كيما نقدرو نلقاوهم عند العشاب
** كي يضربك الريح يعني لاقريب
ديري الزعتر غليه نحي منو كاس الباقي خليه في الكسرونة تاعو إتغطاي مليح بكوات و دخلي الكسرونة عندك و خلي البخار يعرقك مليح
و نتي غامة روحك يمدولك كاس الزعتر ديري فيه سكر و لا عسل حر و شربيه ثم نحي الكسرونة و بقاي غامة روحك حترى تعرقي مليح ثم خلي حق اللي تتنفسي و رقدي و إذا قدرتي ارقدي و نتي مغمومة

** ثان مع لاقريب غلي أوراق الكاليتوس في قدر و حطيها على الموقد و خلي البخار تاعو يمشي فكامل البيت هذا مليح باش لاقريب متعديش و ثان تقدري ديريه بنفس طريقة الزعتر و راهو مفيد

** السعال
ديري نص فنجال عصير قارص مع زوج ملاعق سكر عادي و خلطيهم مليح حتى يذوبو و فالليل اشربيه و ارقدي
ثان ديري عسل حر مع سانوج مرحي و عصير قارص و زيت الزيتون
كيما تقدري تشربي زيت الزيتون وحدو
حلوة الترك مع عسل حر خلطي مليح حتى تولي بوماد و كليها فالليل و الصباح قبل القهوة

** القراجم أو اللوزتين
ديري ثان نفس الوصفة تاع السعال عسل حر و القارص و سانوج مرحي و زيت الزيتون
ثان نبتة القطف هايلة و هذي عن تجربة جديدة و جد مفيدة خويا عندو سمانة ملي برا منهم
ديري ارحي نبتة القطف و خلطيها بعسل حر دفيه و كولي فالليل و الله نقسو عليه فاليوم الثاني
و بالمداومة أربعة أيام راحو قاع

** الأطفال الصغار كي يمرضو بلاقريب
جيبي صابون الطرف تاع بكري و حكي صدرهم مليح حتى يولي أبيض ثم بشاش لفيه عليه بلا متزيري
و خليه يبات بيه و غدوة من ذاك ثان نفس الطريقة دريها في ظهرو
و السعال ثان نفس الخلطة اللي قلت عليها و تفيدو ثان للقراجم
و كي يكون الأنف تاعو مبلع فالليل و ميقدرش يتنفس ديري بصبعك قطرة زيت الزيتون فالجهتين رايحين يتفتحو ثم ثم و لا يعطس و يخرج كلشي
و إذا ارتفعت حرارتو ديري ماء الزهر فالكوش شمخيه مليح و لبسيهلو و زيدي شمخي راسو و رجليه
كيما تقدري تزيدي الخل كي تشمخي اليدين و الأرجل
و إذا كان كبير شوية تقدري دوشيلو بماء متلدي رايحة الحرارة تهبط

** للكبار و الصغار إذا كان عندك إسهال غلي قشور الرمان و برديهم مليح و شربيه
علاه قلت برديه لخطرش مرين و كي يكون بارد تشربيه على طريق و الصغار دريلهم سكر
ثان تقدرو تغلو الأرز و تشربو الماء تاعو و هذي نتيجتو ثم ثم
كيما تقدرو تاكلو الشيكولا و لا البانان
خياتي كاش متفكرت نزيد نحط