شكون الي متعرفش الخليع تدخل (القديد)

[نهلةن]

السلام عليكم ورحمة الله تعالى وبركاته :
عيدك مبارك اخواتي بغيت نفكركم في الخليع واكيد كاين الي متعرفوش كيما كاين الي تعرفو المهم انا قلت نوريلكم طريقتي وهي تاخذي اللحم تاع الخروف البلاصة الي تحبيها احنا نديرو جهة الشطوب وتحكمي تحليه بالموس من الفوق بالخفيف برك يعني من الجوايه كامل من باعد ديريلو الملح كثري بزاف وماتخافيش راهو هو الي يحفظو ومن باعد علقيه في الحبل في بلاصة تكون فيها الشمس من الصباح لليل وخليه واحد ثلاث ايام حتى تشوفيه شاح مليح ومن باعد حطيه في قماش وحطيه في بلاصة فيها الظل وتقدري تستعمليه في العيش او البربوشة ممممممم بنة لا توصف وكاين الي يديرلو التوابل مع الملح
ونصيحة قبل ما ديروه في الطعام شللوه مليح وماتكثروش الملح في المرقة تاعكم وبصحتكم
نتمنى نكون افدتكم وهذه اول مشاركة لي في قسم الطبخ واي سؤال انا في الخدمة

[ام طيري الجنة]

بارك الله فيك على الافادة
انا عمري ما درتو ربما نجربو هذ المرة شكرا

[ندى العيون]

الخلييييع هااايل وخاصة كي ديريه في البركوكس
يجي فيه واحد البنة روعة

ان شاء الله نديروه

[نهلةن]

ام طيري الجنة جربيه ومتندميش راهو بنة هايلة كيما قالت الاخت ندى العيون يجي يهبل في البركوكس
وعلبالكم في العهد القديم كانت هذه طريقة لحفظ اللحوم والاسماك خاتر معندهومش الثلاجة حتى في عهد الرسول صلى الله عليه وسلم كانت هذه الطريقة الي يتابعوها

[اسمهان79]

الف الف شكر حبيبتي تقريباً نفس طريقتي مع اختلاف بسيط
انا نموووووووووووووت عليه والله بنتو رهيبة

[الزوجة البارة]

العيد بلا خليع مستحييييل انا هدا اول عيد كبير مع زوجي قتلو نص الكبش يروح خليع نموت عليه خاصة العيش بالخليع في الشتاء