راهو جىا عيد الاضحى

[امّ اياد]

بناسبة عيد الاضحى ياله نحطو وصفات خاصة بيه من بوزلوف مصران محشي ملفوف وشوي وايضا لي عندها وصفة خاصة بالفخذ في الفرن تفيدنا
ا

حنا فيالعيد في صباح بعد تنقية الدوارة نشوطو الراس وحدة تخدم الملفوف ,في الغدا نديرو الطعام بالرقبة اما فاليل نشو الملفوف والليستاك ونقطعو سلاطة بصل وطماطم باه تنح الدسم اماغدوة من ذاك ناخذ طراف لحم ملاح ونقطع في كيكوطة كمية كبيرة من البصل ونضيف له الحم ونقلي ومبعد نديرو الملح والفلفل اسود والكمون ونمرق بكاس ماء فقط ونغلقو عليه ونخلوه على نار قليلة جدا حتى يطيب ومبعد ندروه فالفرن بح لازم نسكبوا عليه شوية زيت ونملحوه من فوق

[rasha holwa]

ياريت كل الاخوات يقولولنا واش يديرو وصفات احنا نهار الاول بعد ما نقو الدوارة و نشوطو البوزلوف نديرو الكبدة للفطور مع سلاطة نشبعو بالخف
اما العشا نديرو الدوارة و اليوم الثاني نديرو طعام فطور و نقلو اللحم للعشا و هكذا
ربي يدخله علينا بالصحة و يتقبل منا ان شاء الله

[اعجوبة الحياة]

ان شاء الله

[sabine 1988]

احنا صباح العيد نديرو ملفوف الكبدة ناكلوه هكاك بلا خبز وفي الغداء كاين اللي يديرو بكبوكة اما احنا ما نحبوهاش فنديروا الدوارة مقلية في الكوكوط اما العشاء نديرو الشواء لانو العايلة تكون ملمومة النهار الاول
وفي الغد من ذاك نديرو اما شخشوخة او بربوشة و نذوقو الجيران وفي الليل نقلوا

[soumia92]

احنا النهار الاول بعد تنقية الدوارة و البوزلوف نديرو شكشوكة دوارة مقلية و مشوية,و ف العشاء نديرو لحم في الكوشة
اليوم الثاني في الصباح مع الشاي نديرو الملفوف و الغذاء الطعام .(أنا شخصيا le charme تاع العيد عندي هو الملفوف صباح بكري في اليوم الثاني)و هادي عادتنا من زماااان

[ام معاوية 09]

حنا صبيحة العيد نشوطو الزليف ونغسلوه مليح ونغليوه وكاين لي يطيبو للعشا وكاين لي يخبيه فالمجمد ونقيو الدوارة ونديروها عصبان للعشا والفداء كبدة مقلية مع لي فريت وثاني عيد نقطعو الكبش ونصدقو منو والفداء بالطبع لحم مشوي وانا دائما نطيب لي كوت بالمعدنوس والعشاء لحم طايب مثوم أو غيره بصح جامي ولا نديرو طعام ماكانش لي ياكلو
اللهم بلغنا عيد الأضحى وتقبل منا ياحي يا قيوم

[ام ريان عبدالله]

قلولي واشنو الملفوف

[سنوات الضياع.]

مشكورة اختي

[bestof]

واش هو الملفوف ومادابيكم كل وحدة تشرحلنا طريقة عمل البكبوكة
والدوارة وعصبان.على اختلاف مناطق الوطن
لكي نستفيد كلنا وشكرا

[ام معاوية 09]

حنا نديرو عصبان بعدما نقيو الدوارة ونغليو المصارن والرية نقطعو كلشي رقيق شوية وندوزنوها بحبة بصل والثوم كثري شوية وطماطم تاع الحب وتاع البواط وتوابل وحميصة وقصبر ومعدنوس ونعناع مقطعين وشوية زيت وشوية أرز وخلط الكل نملا الكرشة وخيطها ونديرها في قدرة معمرة ماء ونخليها تطيب

[هندة 74]

ربييدخلوا علينا بالصحة والهناء وربي يتقبل منا جميعا

احنا نعرف ان من ستة الرسول صل الله عليه وسلم اكل الكبدة صباح اليوم الاول من العيد

احنا اول حاجة نغسل الدوارة مليح ونشوط الراس والكرعييين نعمل الكبدة مشوية على الفحم كيما يقولوا الملفوف لاكن بدون توابل على الغذاء مع سلاطات مشكلة والعشاء ممكن

بكبوكة او بوزلوف طايب طبعا بالتوابل واكشما يبقى من الكبدة وفي اليوم 2 طبعا الكسكس بالكتف الايمن للكبش كاين الي يعمل شخشوخة والا لفطير كل واحد واش يحب

[nawelg1]

اسال الله العظيم ان يبلغنا العيد سالمين نحن واالمسلمين جميعا ويعده علينا باليمن والبركات. عادتنا فيه ننشويو الكبدة والرية والقلب في الغداء مع كسرة خمير
ة وفي العشاء نعملوا شواء على لفحم وغدوة من ذاك كسكس بالكرايم ولكتف .

[thiziri89]

بصحتكم لبنات مي واش هو ااملفوف

[sabine 1988]

الملفوف هو الكبدة مدورة بالشحم مشوية

[هندة 74]

المشاركة الأصلية كتبت بواسطة thiziri89

بصحتكم لبنات مي واش هو ااملفوف

الله يسلمك اختي الملفوف

هوالكبدة تتحط بزيها فوق الشواية تشيح شوية ومنبعد تتقطع قطع مربعة وتتملح ويوضعوا عليها بهارات خاصة مانعرفهاش ويلف عليها شرائط من الشحم الي يجي فيالخروف ويكون رقيق احنا نسموه الدنتال وتعاد فوق الشواية حتى تحمار هذي خاصة بناس الغرب اكثر