بوتي بان على طريقة المسمن أو معارك سهل.....ناجح .....إقتصادي

oum rayanedino · 2015-09-18, 09:15

صباح الخير........وصفة نحبوها بزاف لكن في كثير من الأحيان ما تنجحش.....اليوم جبتلكم بوتي بان و لكن على طريقة تعرفها جميع الجزائريات و هي المسمن او معارك .
المقادير:
3 كيسان فرينة
حبة بيض
ملعقة كبيرة خميرة خبز، 100غ سكر،حوالي 150غ زبدة ذائبة، فاني
حليب دافىء باه نلمو بيه العجينة
شكلاطة للحشو

طريقة التحضير:
في إناء صغير نحط شوي حليب دافىء،خميرة، شوية سكر و نخليها تخمر
في إناء أخر نحط فرينة شوية ملح سكر وملعقتين زبدة ذائبة و نخلط مليح ثم البيضة و فاني ونخلط مليح

نحط الخميرة لي خليناها تخمر ونكمل نلمها بالحليب الدافىء حتى نحصل على عجينة طرية جدا كيما عجينة المسمن حتى تسهلنا عملية حلها و نخليها تخمر

و هنا بعد ما خمرت العجينة

نأخذ العجينة ونقسمها إلى 7أو 8 كويرات و ندهنهم بالزبدة ذائبة كيما المسمن

نأخذ كرة و ندهن طاولة العمل بالزبدة و نبدأ نحل حتى نحصل على عجينة رقيقة كيما في الصورة

منبعد نطويها كيما حبة المسمن

نكمل حبات كامل

نرجع للحبة الأولى نعاود نحلها مليح

نقسم الحبة على اثنين و نحط قليل من الشلاطة

نروليها و نحطها في صينية مشي مدهونة و نخليها تخمر

هادي بعد ما خمرت

نحط حبة بيض و نضيفلها نيسكافي و ندهن الحبات

و ندخلها للفرن نكونوا سخناه من قبل على درجة حرارة 180و نخليها طيب كي طيب من تحت نشعل الشواية و نخليهم يحماروا .و هذا بوتي بان واجد بصحتكم

أرجو أنو هذي الوصفة عجبتكم أتمنى تشاركوني أراكم و تقيمكم لانه يهمني،لي عندها أي إستفسار تتفضل وراني حاضرة للاجابة
معا للأفضل
شكرا