مشكلة ودعوة شر

[مشكلتي]

ماقدرتش نزيد نتحمل واعصابي تحكو وقتلوني بلسطر
حكايتي مع وحد اللئيم دايمن يوعد ويخلف وكل مرة يجيني مكتوب يوقفلي فطريق ويقلي نديرلك ونعملك ونشريلك ووووو
للدرجة بديت نشوف بني جنسو كلهم لئام
دمرلي حياتي ومستقبلي وشافني عاقلة وساكتة وصابرة عليه وهو يضيعلي فوقتي ويقلي استناي ماعطاني حتى سبب للتاخير
ضركا عندي ربعة وثلاثين سنة وحياتي راهي تروح
ماعنديش وشكون يعيشني عندي زوج خاوتي متزوجين ويسكنو بعيد ويما عجوزة كبيرة ومريضة وزوج خواتي تزوجو اصغر مني بقيت غير انايا
منلقاش حتى وشكون يشريلي حاجة كينحتاج
ياناس هدا الخداع كل مرة يجبدلي سبب تافه باش يخليني نستنى
والحل الوحيد نقبض السجاد ونصلي وندعي عليه اسوء الادعية وربي ينتقم منو لانو ضيعلي حياتي
وضركا جاني خطاب لباس عليه ومخلانيش نعيش حياتي ومزالو يماطل
ايا قلبي تعمر ومتعقبش صلاة الا ورفعت يديا للربي ياخد منو حقي
المرة هدي وعدني يجي بعد العيد بصح وعدو دهب في خبر كان وكدب مش مرة ولا تنين الكدب عندو صلاة وعبادة
المهم راني ندعي عليه ليل ونهار ربي يجيبها في عمرو ونتهنى منو وربي ينتقم من كل غدار خدع بنات الناس ولعب بيهم
ربي وكيلو ادعو عليه عسى ربي ياخد فيه الحق

ر

[عدو الجهل]

ربي يفرج عليك

[amira1989]

ترقي و متستناي حتا واحد

[أم عبد الكريم]

انتي لي ضيعتي حياتك بيدك.................عطيت يه فرصة يلعب بيك و يفوت بيك الوقت و يضيع عليك فرص نتاع زواج .....اختي جاوك رجال نتاع الصح لي ناويين لحلال و نتي قعدت تبعية فيه و تاني فيه وحياتك رأهي تجري................وا اسفاه كاين لي يغلط لكن يفيق مع روحوا و كاين لي يغلط و يبقا في الغلط نتاعو و يلوم الزهر وووووووووووم
ربي يف ج عليك اسمحيلي

[daciismail]

وكلي عليه ربي بصح انت غالطة تستناي فيه لي يجي يخطبك وانت مريحتلو تزوجي بيه خليك من الذئاب والله وليت نشوف نفس مسلسلات قصص حب والله حب غرق مع تيتانيك نتع فليم اذا كنت تشفايلو

[مانقراش]

انتي تعرفي غير تدعي بدعوة الشر ؟
ادعي شوية بالخير باه يوصلك الخير
و ، ، ، و كيما يقولك ؛ ما من دابة في الارض الا و الله رازقها
تفائلي خير تجدين خيراا
و خواتك j'aimais يسمحو فيك ، كوني متأكدة

[مجرّد إنسان]

ادعيلو ربي يهديه
وإذا جائك خاطب جديد فوافقي ولا تنتظريه
وربي يرزقك بزوج صالح

[يسمينة البجائية]

مكانش اللي ما يغلطش .الاخت فهمت و أخذت الدرس . و كلنا ناخذ دروسنا في ذنوب اخرى . كل واحد وين راه نقطة ضعفه .

كاينة واحد الحكاية اقريها مليح و فهميها . جا واحد الامام في المسجد أعطى درس للمصلين و وقف قليلا و قال لهم يا جماعة فلان ابن فلان زنى بأمه
فهلع المصلين لما سمعوا و ظهرت علامات الفزع و التأسف لما فعله الرجل بامه ...و تبدلت وجوههم و شتموه و بدئوا يلومونه .. ما يحشمش و لازم يعاقب أشد العقاب و هاك و هاك ...و الامام ينظر اليهم و يسكت
و في اليوم التالي بعد الدرس قال الامام للمصلين فلان ابن فلان ذبح شاة لغير الله . فسكت الجميع و قالوا ربنا يهديه . لا هلع و لا فزع . يعني عادي ماشي grave كيما اللي زنى و عمل فاحشة بأمه .

و هنا الامام لم يسكت و قال لهم عندما أخبرتكم عن زنى الرجل بأمه الكل يصيح و ثارت الثائرة في المسجد و اما عندما أخبرتكم بالذي ذبح لغير الله أرى السكوت في وجوهكم يعني خبر عادي . فقال الامام اعلموا أن أعظم ذنب و أكبره و أقبحه انما هو الشرك بالله يا جماعة ان الشرك بالله لذنب عظيييييم و لن يغفر للمشرك و هو في الأخرة من أهل النار خالد فيها يعني ما يخرجش منها أبدا . و normalement الللي يسمع الخبرين يفزع و يهرع للمشرك لأنه كفر أما الزاني مذنب و لكن يبقى مسلم و لم يكفر بالله و لم يشرك ...
أما الذي أزنى بأمه من كبائر الذنوب و لكن أدنى من الشرك يعني ان الله برحمته الواسعة غفر للزانية اللي أسقت الكلب بالماء عندما رأت عطش الكلب دخلت البئر و أخذت القليل من الماء في نعلها و اسقت الكلب فغفر الله لها و أدخلها الجنة .
يعني الزنا حرام و الله يعاقب من تعدى حدود الله و يغفر برحمته من يشاء أما الشرك بالله أبداااااااا لن يغفر له .

و انت يا أختي لم تصلي لحد الزنا و لكن لا تنساي قول الله تعالى و لاااااااا تقربوا الزنى . يعني التيليفونات و الخرجات الخ تقربات للزنا و كاين زنا السمع و زنا العين و زنا اليد ...... لازمك التوبة و الرقية ليشرح الله صدرك . و بدلي رقم تلفونك و ما تخرجيش بزاااف و قطعي اتصالك بهذا الذئب ربي يهديه برك .
و تشوفي النتائج ان شاء الله حياتك ستتبدل من حال الى حال . و ما تخافيش ستحزنين لفراقه و تتوحشيه و تقولي في قلبك بالاك هاذي المرة ندم و ما يعاودش الكذب .... اخطئي ايضا و لكن حذاريييييي ثم حذارييييي الندم درجات . تندمي أمبعد تندمي و ثالث مرة رابع مرة بصح يجي يوم تمرضي روحك و يوصلك للهلاك و العياذ بالله .

[ranou gigi]

ربي افرج عليك و ربي يهديك لانك تبعي في واحد ماهوش راجل الراجل كي تحكمي عليه كذبة خلاه لازم تمحيه من تفكيرك

[Zaki Dilmi]

مفهمتش الغلطة مشي مانوا برك لوكان مصباكش ساهلة و يوسلش ليك
المهم بلا منكثروا هدرة متنفعش دوك لي صرا صرااااااااااااا ربي يهديكم و يهدينا

[بنت لبحر]

اقبلي بلي جايكمن الباب ا اما الي جايك من الطاقة ويلعب مديريلو حتى حساب

[إلهام93]

ربي يفرج عليك

[AMINA.Z]

الدعوة الوحيدة اللي لازم تدعيها قولي
حسبي الله و نعم الوكيل
انت تدفعين ثمن الخطا الذي ارتكبتيه
و من المفروض انك قطعت كل صلة به الان
التفتي لحياتك الباقية و كلما تذكرته قولي حسبي الله و نعم الوكيل

[miss me]

ربي يفرج عليك

[ابتسام smile &hope]

غاضتني يماك مسكينة
المفيد روحي جيبي بليغة وضربي روحك وماتنسايش الكفوف حتى تفطني
في عوض للي تدعي عليه ادعي ربي يغفرلك
و خطيك مالجياحة تاع المسلسلات التركية
وبدلي لابوس