الرفيس من مطبخ ريتاج تيارتية

[ريتاج تيارتية]

جبتلكم الرفيس نتاعنا هههههه اللي وين مايدخل الربيع يلاق يندار ولو مرة وحدة نموتو عليه والاغلبية يبغو ياكلوه باللبن يجي تووووب بلا منطول عليهكم هدا الرفيس خدماتو ماما

نبداو

اول شيء بالمبسس او المثكرة او المتقبة كل واحدة واش يقوللها

نحتاج لكمية من السميد متوسط

نبسسها بكمية من السمن او الزيت حنا ماما دير وصاي حوالي ثلاث كيلات سميط ب بنص كيلة سمن ولا قل على حساب نوع السميد كاين اللي يشرب وكاين اللي مايشربش المهم نبسوه مليح كيما موضح في الصورة

نضيف شوي ملح على جيهة ونذوبها بشوي ماء في القصعة اللي نخدم فيها ونرش ونخلط السميط بدون عجن حتى نلم مليح ونخبزو ونقطعو لازم يكون شاد روحو مليح

هنا نروحو للطريقة الموالية في هدي كل وحدة واش تبغي دير كاين اللي يقلوه وكاين اللي يطيبوه في الطاجين

هنا ماما قلاتو في الزيت

هو يتقلى وتكوني موجدة الغرس نتاعك منقيتو من العلف

وكل ما تقلي حبات المبسس تحطيها فوق التمر وتفتيها حتى تقلي كيمة معتبرة

تبداي تعركي فيه مع التمر وهو سخون شوي باش يدخل مليح مع التمر وكي تشوفيه التمر كثر من المبسس زيدي لو المبسس هاكا حتى يجي نيشان

كاين اللي يبغيه حلو بزاااااف ويبغي التمر غالب على المبسس بزااف

المهم كي تكملي ضيفي شوي زبدة ولا سمن يكون طري بزااف ولا ذايب وتعركي بيدك حتى يدخل مليح في الخليط

وتقدميه بالصحة والهنا

هدا هو جاهز وتقدري تقميه مع اللبن يميميم

زوووم هههههههه

ان شاء الله تكون عجبتكم الوصفة