الجزء 139 من واش طيبتي اليوم ……كوزينة الهمة والنشاط من جديد……

ام ساجد · 2015-08-06, 20:20

السلام عليكم ورحمة الله وبركاته

يسعدني غني نفتح الكوزينة الجديدة بعد ما لقيت اخواتي ينتظرو قدام الباب هيا ادخلو وبينو حنة يديكم يا الفحلات
ويا حراير بلادي علابالي ما تغلبكمش السخانة

في 27 جويلية تزوجت اختي والحمد لله فات عى خير ولعقوبة لكل العزبات لي معانا في الكوزينةامين يا رب
هذه بعض الصور للي قدرت نتحصل عليهم لاني انا صورت بالتابلات ودغرلو ولدي كود ونساه وعاودنا فلاشيناه
وراح كلشي وهاذي صور بالبرتابل شوي عيانة لكن خير من ما كانش
نبداو بالحلويات تاع القهوة
قراوش عين الجمل وقراوش الطاجين ومقروض وغريبة

وهنا في لاصال تعمرناهم في الصحونة

وهاذم ليقاطو تاع لبواط مخبز حريم السلطان والمشموم ووبقلاوة وقاطو الشوكولا

وهنا لي يسربو يحضرو ليتابل للغداء تاع العقد لرجال

وهاذ دارتها الطباخة في بلاصت الحميص فلفل وشومبنيو وزيتون اخضر وباذنجان مشوي مرقدين في زيت الزيتون
صورتها من بعد في الدار الكل عجبتهم

والجاري نسيت ما صورتوش كرهنا منو من رمضان هههههههه

والحمد لله يا رب ربي يسعدها ويهنيها امين يارب ويرزقها بصغير تفرح بيه دعواتكن ليها اخواتي ولكن بالمثل
ربي يشفي كل مريض ويرزق كل محرومة بالذرية ويسلك وحل الحوامل ويرزق العزبات بالزوج الصالح
امين

اخواتي الكوزينة كوزينتكم ما تبخلوش عليها بطبخكم الجميل بسيط او فخم المهم المشاركة باش تبقى مفتوحة
ونتلمو فيها ممكن نغيب عليكم شوي لاني عندي ظروف لكن راح نحاول نكون معاكم اطول وقت في انتظار
اطباقكم وباروككم