كسرة الشحمة من مطبخي بالصور

[nihal159]

السلام عليكم و رحمة الله و بركاته
ليوم رايحة نمدلكم وصفة كسرة الشحمة على طريقتي لي نقلتها على أمي ربي يحفظهالي
للعجين: نستعمل كمية من السميد+ ملح+ القليل من خميرة الخبز+ زيت+ ماء دافئ للعجن؛ العجين لازم يكون متماسك و مش رخو؛ نعجنوه من 10 دقايق حتى ربع ساعة؛ نتحصلو على عجين أملس؛ نقسموه نصفين لكن جزء أكبر من الأخر.
بالنسبة للحشو: بصل مقطع رقيق+ ثوم+ فلفل حلو و فلفل حار نشويهم و نقيهم و نقطعهم قطع صغييييييرة؛ طماطم حب و ملعقة طماطم مصبرة؛ جزر مبشور؛ شحمة مرابية باش تذوب تمتم؛ اللحم المفروم إختياري.
بالنسبة للتوابل؛ نستعمل ملح+ فلفل أسود+ راس الحانوت أنا نستعمل ماركة الذواقة تاع تونس تعجني بزاف.
في طنجرة نحط لبصل و الثوم و الفلفل و الجزر و نستناهم حتى يذبلو؛ من بعد نضيف الطماطم حب و المصبرة و الشحمة و التوابل و نخلي الحشو يتجمر في خاطرو.
نطرح العجين؛ نبدا بالجزء الأكبر؛ نطرحو على شكل دائرة و نفرد فوقو الحشو و نغطيه بخبزة العجين الثانية و نلم الحواف فيق بعض و نطيبها فالطاجين.
إن شاء الله تعجبكم طريقتي و تجربوها .