|
|
|
|||||||
| قسم المنزل و متطلباته كل ما يخص المنزل و متطلباته بصفة عامة ، الأجهزة الكهرمنزلية .. الحديقة ... |
في حال وجود أي مواضيع أو ردود
مُخالفة من قبل الأعضاء، يُرجى الإبلاغ عنها فورًا باستخدام أيقونة
( تقرير عن مشاركة سيئة )، و الموجودة أسفل كل مشاركة .
| آخر المواضيع |
|
 |
|
|
أدوات الموضوع | انواع عرض الموضوع |
2012-01-14, 10:06
|
رقم المشاركة : 1 | ||||
|
يوم في مطبخ حبييبة
 الصلاة و السلام على أشرف المرسلين حبيبنا و سيدنا محمد و على آله  و صحبه الميامين مرحبا بيكم لبنات لعندنا في دارنا  دار والدين حبييبة  راااايحين تقضوا معااااياااا يوم كامل فالكوزينة يوم الجمعة هاد اليوم نحبه بزاف و نتفائل بيه و عنده معزة خاصة جدا في قلبي عن سائر الأيام يلا نبدوا بسم الله توكلنا على الله لاحول ولا قوة إلا بالله  بديت يومي من قبيل صلاة الفجر بثلث ساعة تقريبا توضيت و صليت و قريت الورد اليومي من القرآن و سبحت و قريت الاذكار و رتبت سريري و قشي و درت ماء الورد والكريم لوجهي و غطيت رأسي و رقبتي بخمار  ورحت مباشرة للكوزينة فتحت النافذة كان الحال مازاله شوية مظلم و بلاما ننسى رايحة نشارككم منظر شروق الشمس اللي نشوفه كل يوم من هنا عند هاد النافذة اللي نتمنى نبقى كل يوم نشوفه بإذن الله شربت كاس ماء فيه نصف ملعقة خميرة و ملعقة عسل حر كالعادة  من بعد رحت سيقت الفيرندة والدروج والمدخل كالعادة  (نسيت ما صورتلكمش الفيرندة)  و طلعت طيبت القهوة و الحليب شفتوا فرحانة بروحي راني نصور التهيت و القهوة ماشية تفيض  (الحقيقة فاضت على الكويزينييرخخخ  )ووجدت السنيوة نتاع القهوة بطبيعة الحال لا تخلوا من الكونفيتور و الزبدة و الكرواسان و البان شوكو ولازم لازم لازم لحبييبة ينحط معاها قااااطو هادا مهم جدا يعني ما نتقهواش بلابيه  (للأمانة و حفظ الحقوق القاطوووو مشري لحبيبات خخخخ) حطيت القهوة في بيت الجلوس و ريحت نتقهوى معا العائلة اللي راهم فايقين و نتبع آيات القرآن فالتيفي (الصراحة القهوة تاع الصباح نعزها بزاف و دايرتلها طقوسها و جوها الخاص فالدار وما نبغيش نراطيها لوكان نصيب قاع ما نوضش منها ماعرفتش علاش!!!  )يلا خلاص تقهوينا بصحاتنا نمشوا للكوزينوا نبدوا أشغالنا بسم الله توكلنا على الله لاحول ولا قوة إلا بالله (شفتوا القهوة فايضة على الكويزينيير )بسم الله غسلتها بمنظفي الخاص ماء +صابون الاواني المعطر+جيل الجافيل الرغوي المعطر+الخل الابيض باش تبقى تلمع و مسحتها و نظفت الجوانب و الحيطان اللي من كل جوانبها وهاهي فرحانة تلق لق و جمعت المواعين نتاع القهوة كلها في المجلى تنتفخ و بديت نوجد فمقادير الفطور من بعد رجعت غسلتهم و نظفت البوتاجي و الحيط جانب المغسلة و بديت نوجد فالفطور بما أنو اليوم الجمعة المفروض الفطور يكون الطعااااام هادا شي حتمي و لا نقاش فيه أصحاب النقاش فيه هوما برك الوالدين ربي يحفظهملي اللهم آمين هوما برك اللي عندهم الحق يغيروا برنامج الاكل لهذا اليوم طبعا خخخخ بصح الطعام رانا درناه أول البارح لما رجعلنا الوالد بالسلامة و العافية نحمدوا ربي و نشكروه ربي يخليه لينا و يدوم عليه العافية اللهم آآآمييين إذا رايحين نغيروا طقوس هاد اليوم و نطيبوا حوايج وحدخرين بإذن الله يلا نشمروا على يدينا و نبدوا  بسم اللهأولا رايحين نوجدوا مرقة بالكابوية معمرة و البطاطا هادي يحبها بابا ربي يحفظه بسم الله نحتاجوا الكوكوت (قدر الضغط يعني) ننصبوا فيها المرقة و نبدوا نفرغوا الكابوية باش نرجعوا نعمروها بالكفتة مخلطة بالروز مسلوق نصف سلقة و نقشروا البطاطا و نقطعوها على الطول باش نضيفوها على الكابوية فالكوكوت عندي بعض الملاحظات على هاد الصورة: شوفوا الطبق اللي على اليسار كنت رايحة نقشر فيه البطاطا و الكابوية حطيت عليه كيس و قشرت فيه كامل الخضر نتاعي باش تسهال عليا عملية رمي القشور لما نكمل و شوفوا تاني الصورة اللي على اليمين راني حاطة مغارف في طبق هادوا المغارف اللي استعملتهم باش ننصب و نقلب الخضر فالكوكوت و نذوق من بعد مين يطيب ووو حطيتهم في هاداك الطبق باش لما نمسح البوتاجي قطرات الاكل اللي تبقى عليهم ماترجعش توسخلي الكنتوارات) ثانيا وجدنا الحريرة بسم الله وجدنا تاني الكوكوت حطينا فيها كل الخضر اللازمة للحريرة و شوية حراوك لأن البقية تنحط بعدما تطيب (الحمص كنت منفخاته من ليلة أمس) من بعد اللي طابت طحنتها و صفيتها و ضفت عليها الحراوك اللي بقاوا معا الفرينة و شوية شوربة من بعد رحت درت دورة خفيفة على بيت لقعاد ماكانتش مربلة بزاف رتبتها و كنستها و مسحت الغبرة على السريع و رحت درت نفس الشي في غرفة والديا و غرفة خاوتي مادخلتهاش كانوا راقدين و غرفتي أنا واختي هي كملتها رتبت سريرها و مسحت الغبرة و أنا كنستها و غسلت الحمامات أعزكم الله و المغسلة و اختي مسحت أرضية البيت كلوا ماعدا الكوزينة كنت مازالني ماكملتش اشغالي فيها  عيييييت  رجعت للكوزينة وجدنا محمر دجاج عبارة عن دجاج طايب فالمرقة من بعد يتصفى و ينقلى فالزبدة بسم الله و قلينا شوية بطاطا و وجدت شوية سلاطة عادية بالطماطم و الخيار و الزيتون الاسود يحبوه بزاف خاوتي و شوية فلفلة ووجدت فلان ودرته فالثلاجة لما كملت معا الطياب رجعت لميت كلشي استخدمته فالمجلى و غسلتهم و نظفت البوطاجي و أسطح البلاكارات و الأدراج بمنظفي الخاص (شفتوا وين معلقة لحباب خالتهم دايما عند يدي خخخ) بما أنو اليوم ماعندناش برنامج قلت نخدم شوية حوايج فالكوزينة رحت على السريع مسحت العلب نتاع الحراوك و لمعتهم و مسحت مكانهم فالبلاكار و رجعتهم و العلبة اللي رايحة تفرغ رجعت عمرتها  الفطور راه يطيب الحمد و الشكر لله مسحنا علب الحراوك يلا معايا نوريلكم الطلة اللي نشوفها كل يوم من خلف الريدو فالكوزينة نسيت نقلكم باللي درت الماشينة نتاع الغسيل تخدم و درت فيها الناب نتاع الطابلة نتاع الكوزينة اللي نحبها بزاف وين نقلعها و نغسلها نعاود نحددها و نرجعها خخخ و غسلت تاني فوط و مفارش للطاولات ووو خليت شوية مواعين استعملتهم من بعد باش نحضر السلاطة و الفلفل خليتهم ينتفخوا فالمجلى و رحت نشرت القش في الحوش الخلفي للبيت و رجعت حمرت الدجاج فالزبدة و درت شوية منظفات فأرضية الكوزينة و حكيتها و جففتها و نشفتها بمنظف الارضيات المعطر توب الوردي و قطرات من الخل الابيض الحمد و الشكر لله كملنا غلقنا الشبابيك كلها و الباب و عطرنا البيت و حطينا الفطور رحت اغتسلت و بدلت قشي  بسم الله ماشاء الله للأمانة الطابلة ماشي نتاعنا و حتى صورة الفلان المقلوب على الصحن الصور حوست عليهم مالقيتهمش الله أعلم وين راحوا جبتلكم صور طبق الاصل بصح الكيسان ماشي هوما هادوك و أنا ماطيبتش الروز للفطور أما الباقي يشبهها تماما يلا تفضلوا بسم الله ان شاء الله يعجبكم طيابي خخخ فطرنا الحمد و الشكر لله الله يديم علينا هاد النعمة و يباركلنا فيها اللهم آآميين لميت المواعين نتاع الفطور فالمجلى الاكل الباقي درته في علب بلاستيكية و مباشرة للثلاجة و مسحت الطاولة و رجعتلها الناب نتاعها و رحت غسلت المواعين نتاع الفطور و نشفتهم و رتبتهم فالبلاكار و بديت نوجد في مقادير القاطو رايحة ندير المادلين اتفقت عليه الجماعة وجدته وخليته يخمر ساعتين من بعد غلقت الشباك الخشبي نتاع الكوزينة و عطرتها و رايحة نصلي الظهر و نرقد شوية باش نوض نطيب القاطو بإذن الله و في طريقي ضربت طلة على منتدانا الحبيب و اتمنيتلكم جمعة مباركة  تقريبا الساعة الثالثة بعد الظهر  نضت توضيت و رحت للكوزينة نطيب القاطو ماياخذش وقت كثير فالطياب تقريبا 12د للسنيوة و وجدت القهوة في نفس الوقت و رحت صليت العصر و حطيت القهوة بسم الله ماشاء الله (الكيك هو كيك الليمون كنت درته اليوم اللي سبق و بقى منه شوية حطيته و السفنج نشروه كالعادة نتاع نهار الجمعة ) (شفتوا الناب نشفت و حددتها و رجعتها على الطابلة خخخ  )اختي لمت مواعين نتاع القهوة و غسلتهم و أنا رحت ريحت شوية على النيت باش نطلع الصور نتاع هاد الموضوع و ندمجها معا بعض و نصغرها  لما قرب آذن المغرب رحت توضيت و قريت القرآن و ذكرت و دعيت لأنها ساعة إجابة ومن بعد دخل للكوزينة عند اختي كانت ماشية تدير العشا فرغت الثلاجة مسحتها و فرزت الخضر و الاغراض اللي نحتاجها هاد اليومين رجعتهم ليها و الباقي حطيتهم فالثلاجة الثانية فالمخزن باش تتنظم ثلاجة المطبخ شوية و مسحتها من برة (شفتوا البرنامج الشهري راه معلق على جنب الثلاجة للتنظيفات راهوا تم أربع صفحات صفحة لكل أسبوع وأعلاه جدول الوجبات اليومية لمدة شهر) فرغت البوبال أعزكم الله و نقيته و عقمته و حطيت كيس جديد و بديت نعاون في اختي باش نوجدوا العشا بكري كانت باقية الحريرة زدت وجدت معاها غراتان بيرمانتي محضر بالبطاطا المهروسة وحشوة الكفتة مخلوطة بصلصة البصل مرحي و الزبدة و الفرينة و مرق اللحم الغنمي ووجدنا كبدة مشرملة بصلصة الطماطم و المعدنوس و قلينا البطاطا لا نستغني عنها ووجدنا سلطة بمكعبات بالطماطم و الخيار و البصل و مكعبات الجبن اسمها سلطة يونانية و جنبها سلطة عادية بالارز المسلوق و الماييس و المايونيز و سلطة الفواكه للديسير صلينا العيشا حطت اختي العشا لبابا يحب يتعشا بكري و حنا رحنا تفرجنا مسلسلنا من بعد حطينا العشا بسم الله ماشاء الله تعشينا واختي لمت الطابلة و غسلت المواعين نتاع العشا و باقي الاكل الصالح للأكل حطيناه في علب و على الفريزر و مسحت أختي الكوزينة و أنا رحت كملت تجهيز الموضوع على الكمبيوتر ولما عيييييييت جهزت نفسي للنوم اغتسلت و بدلت قشي و حطيت الكريمات على وجهي و يديا و رجليا و قريت المعوذات و آية الكرسي و سبحت و رقدت خخخخخخ أخيرا استسلمت للنوم هههههه ماروكو ههههه من كثر ما نبغيها عندي السيدي نتاعها نتفرجلها خخخخخ تصبحون على ألف خيرررر   
|
||||
|
|
2012-01-14, 13:33
|
رقم المشاركة : 4 | |||
|
الله الله على الهمة و النشاط |
|||
|
|
|
2012-01-14, 13:56
|
رقم المشاركة : 5 | |||
|
الرجاء تفهمينا
سلام أخت حبيبة حبيت أنا و أختي نفهمو برك انتي متزوجة و الا لالا و اذا كنت متزوجة هل انت عاملة و الا قاعدة في الدار |
|||
|
|
|
2012-01-14, 14:00
|
رقم المشاركة : 6 | |||
|
انا منيش ننتاقد بصح الرجاء جاوبينا كلمتني أختي الصباح قعدنا نص ساعة نهدرو عليك |
|||
|
|
|
2012-01-14, 14:10
|
رقم المشاركة : 7 | |||
|
السلام عليكم حبيبة وشراكي حبيبتي و الله موضوعك رائع فرحني ياسر و زادني نشاط و حماس بعد ما بداني الكسل شوي |
|||
|
|
|
2012-01-14, 15:21
|
رقم المشاركة : 8 | ||||
|
اقتباس:
لكن ماعجبتنيش كلمة نوع من الهوس وملئ الفراغ لانو انا شخصيا كنت نخدم اكثر من البرنامج تاع حبيبة و نلقا الوقت اللازم للحوايج اللي راكي تقولي فيهم و كي اتبعت برنامج حبيبة والله بالعكس لقيت روحي احسن و زدت لقيت وقت اخر نخيط فيه و نهتم بالامور الاخرى وحتى بعد ما نتزوج نبقا نتبع في نفس البرنامج و راجلي تاني عجبو البرنامج لانو عاد يخليلي وقت زيادة و بالنسبة للبرنامج هذا راه للماكثات بالبيت و لحد الساعة وحدا ما اشتكات منو سواء في الدورة الاولى ولا الدورة الثانية وهذا البرنامج تاع العاملات https://www.djelfa.info/vb/showthread.php?t=816581 واسمحيلي مرة اخرى على التدخل |
||||
|
|
|
2012-01-14, 17:24
|
رقم المشاركة : 9 | ||||
|
اقتباس:
حبيبتي أم أمجد إن شاء الله نكون دايما عند حسن ظنك حبيبتي اللهم آمين ربي يخليك ليا |
||||
|
|
|
2012-01-14, 17:28
|
رقم المشاركة : 11 | ||||
|
اقتباس:
ميمي ميمي ميمي !!!!!! واااش ما تقوليليش انتي تاني اسمك مريم سبحان الله ربي يفرحك حبيبتي شكرا لك على الدعوات ربي يستجيب ان شاء الله يا ربي آآآمييين |
||||
|
|
|
2012-01-14, 17:40
|
رقم المشاركة : 13 | |||
|
هل من المعقوووول نفوت 3 ساعات يوميا في التنظيف بعد الرجوع من العمل |
|||
|
|
|
2012-01-14, 18:05
|
رقم المشاركة : 15 | |||
|
حبيبة قلبي حبيبة ماشاء الله كيما تخيلت سواسوا ربي يبعد عنك العين و الحسد يا رب |
|||
|
|
|
| الكلمات الدلالية (Tags) |
| مطبخ, حبييبة |
|
|
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
Powered by vBulletin .Copyright آ© 2018 vBulletin Solutions, Inc
العرض العادي
