مشكلتي الخيانة

[مشكلتي]

السلام عليكم ، ندخل فالموضوع مباشرة حنا في دارنا 2 بنات ووولد ، عايشن لباس علينا الحمد لله
اختي الكبيرة متزوجة وعندها ولد ، واخي تم انا المدللة
علاقة ابي وامي مع بعض عادية مع انه في بعض الاحيان يضاربو على الدراهم وعلى القضيان
لكن عادي ككل العائلات الجزائرية
المشكلة بدات من حوالي شهر لما هزيت هاتف ابي وبالصدفة نتبهت لرقم مكتوب اسم رجل فيه
عدد المكالمات معه كانت كثيرة ، يعني النميرو هداك يبيبيلو بزاف ووجدت اخر مكالمة عدد دقائقها 20
دخلني الشك لانه الرجال عادة مايطولوش في حكايات التلفون ، هزيت النميرو وعيطت لقيتها طفلة وتبان صغيرة
لقيت روحي كل مرة نشوف هاتف ابي بالسرقة عليه مع انه رجع ميحطش هاتفه في اي بلاصة كما الاول
اصبح ماينحيهش من لجيب حتى لما نقوله اعطيني نهدر بيه يكون قريب ليا
المهم مع الايامات تأكدت انه على علاقة مع هدي الطفلة خاصة انه لديه محل انفورماتيك مع الجامعة
تكون وحده من تاع الجامعة لانه مرات نلقى النهار كامل غير يبيبيو لبعضهم ومكالمات خفيفة
يعني اكيدة تجي عنده للمحل ، من قهري حكيت لاختي الكبيرة تصدمت خاصة انه علاقتنا مع ابي هايلة
ولا مرة حسينا يكون من هدا النوع من الرجال ولا ممكن في يوم يخون امي مع وحده أخرى
والكارثة البارح بيبيتلها بالماسكي لقيتها اوكيبي رحت نعيط لابي كان برا فالليل قبل ادان العشاء
لقيت هو الآخر اوكيبي بمعني معها ، لمدة ساعة وهما يحكيو بعدها ادنت العشا دخل للدار صلى وعاود خرج
لما خرج بقى قلبي حاسسني عاودت بيبيتلهم للزوج لقيتهم اوكيبي ، وانا ابي مش من النوع لي يسهر برا يعني مورا الصلاة بالشوي خرج ولما طليت على انافدة وجدته فالسيارة ومش باين غير الضو تاعها من الداخل
لانها كانت الظلمة وماشفتش مليح ، لكن الاكيدة انه كان يحكي فالسيارة ، وبعدها دخل للبيت ماقدرتش نشوف حتى معاه هو يهدر معايا حسيت روحي رايحة نطرطق ، ياخاوتي من البارح وانا منقدرش نشوف فيه وهو بحكم اني المدللة ينوض يتمسخر معايا وكدا وانا الدموع يجوني ، مالقيتش حل واختي الكبيرة قالتلي نهدر معها قلتلها من الاحسن نعرفوها اولا شكون ولوكان نتلقاوها ونحكو معها وجها لوجه خير
مع العلم انه امي معلبالهاش واش راه صاري ومش حابين نقلقوها لانها رايحة تعمل عملية على المرارة مش حابين نقلقوها أكثر ، وتاني معلومة هاد الطفلة نبيبيلها فالليل نلقاها اوكيبي شحال من مرة
يعني مش راها تهدر معاه برك على حساب مافهمت
فهموني ياخاوتي راسي رايح يطرطق ولقاولي حل ، خايفة الامور تطور وتخرج من يدينا
كفاه ندير ؟؟ كفاه نتصرف ؟؟ نواجهو ؟؟ وواش راه يحوس من الطفلة هدي؟؟
الله يجازيكم عاونوني في اقرب وقت بحل مناسب خابفة تديلو عقله بما انه رجع يخرج من الدار ويحكي معها بالسرقة لمدة ساعتين اي كارثة ياخاوتي ، والله قلبي رايح يتقطع وغير نبكي من البارح وماما تسقسي وش بيك
سمحولي طولت عليكم قلبي معمر مالقيت لشكون نفرغ