مشكلتي

[مشكلتي]

سلام عليكم

انا شاب جــــامعي سكنت جديد في حيينا كنت قد لاحظت فتاة في هذا الحي اعجبتني صراحة عدت منقدرش نفوت نهار ومنشوفهاش جاية من القراية لدارهم
بصح انا حشام وما لقيت حتى فرصة باه نهدرلها فكنت مكتفي بتتبعها بالنظرات فقط فديما راني في شارعهم ومقابل بابهم فأنا معتقد في نفسي اني مش اهل ليها لاني مش وسيم وثاني فقير فماكان الا اني كتبتلها رسالة طويلة وعمرتها شعر وكلمات وورود كنت نتاسف لاني مالقيت حتى طريقة نهدر معاها خطر انا معقد منعرفش نهدر مع البنات ديما كي نهدر مع طفلة في اي موضوع نقول راها تخزر في قشي او وجهي مليان اثار حب الشباب فاكيد هي تستنى في اللحظة الي نمشي ونخليها

المهم كملت رسالتي وقلت فيها واش كاين في قلبي وعصرت مخي وعاطفتي باه نكتبلها رسالة شاعرية ودرت معاها في كيس عطر وشوكولاطة ووردة من النوع الرخيص مش غالي قع وبعد نوضت طفلة جارتنا صغيرة ليها واعطيتلها الهدية والرسالة وتبعتها بعينيا حتى وصلت ليها وبعد جاتني تجري قاتلي راها قاتلك استنى يجي بابا راه مسافر ونقولهالو راك تزيد دور بيا منا وجاي راك تشوف لمخليتش بابا يقطعك راه جدارمي
طبعا كنت عارف ردها هو لالا بصح مكنتش متخيل يوصل لهذه الدرجة من التهديد ..... انا مدرتلها والو حتى النظرات كنت نحرص انها متشوفنيش وانا نشوف ليها
قلت للطفلة الصغيرة وراه الكيس قاتلي راه شداتو عندها
وبعد وحد الاريع ايام هاك وانا خايف لتقولها لباباها وكشما يديرلي مشاكل كتبتلها رسالة قتلها يرحم الي جابوك رجعيلي الهديةوالرسالة واجحديها على باباك راني طالب جامعي وزوالي ودارنا آملين في ربي نكمل قرايتي ونخدم عليهم انا راني منيش تع طوايش ومنيش شرير خليني الله يخليك راه اذا قلقوك نظراتي عهد الله لنزيد ندور في ساحتكم مالا زادت شدت هديك الورقة وقالت للطفلة روحي وما رجعتلي معاها لا كادو لا رسالة

هاني درك خايف اذا تنفذ وعيدها
هذه راها حقرة وش درت انا حتى تقولها لباباها يخي الشباب كامل يمكن يعاكسو فيها علاه شادتهالي انا برك