حلوياتي البسيطة مع الشرح "تقبل الله منا و منكم "

[زينب 83]

السلام عليكم و رحمة الله و بركاته

باقة أزهار وورود
وسلة بخور وعود
والعيد عليكم يعود
وكل عام وانتم بخير

حبيت نقدملكم اليوم حلوياتي في هذا العيد و هي حلويات بسيطة و سهلة و اقتصادية نوعا ما ، طبعا لا ترقى لابداعات الاخوات لكن حبيت نشاركم بيها ، يا رب تعجبكم و لو شوي ههههههه

مقروط

المقروط عملتوا بالوصفة التقليدية لي هي 3 كيلات دقيق متوسط سفينة بكيلة زبدة ستار و فنجان زيت و بليته بماء زهر و رشة ملح ، و الغرس نقيتو و فورتو و زدتلو القرفة و القرنفل مرحي و ماء الزهر بودرة و عصرة ليمون و جلجلانية محمصة ، جاء رووووعة هشوش و بنيييييييييييين









البقلاوة

البقلاوة هي عجينة 5 كيلات فرينة بكيلة مارغرين التوريق و ماء زهر بارد و حليتها في الة البقلاوة لكن في الاخير كي حليتها في الرقم 9 رشيتها بالنشاء و طويتها على اثنين و عاود حليتها في الرقم 9 ثم حليت الطية و لات كأني حليتها في الرقم 18 و جات رقيييييييييقة ، يا رب تكونو فهمتو الفكرة

القطايف

لقطايف عملت قطايف تركية شفتها في احد المنتديات مع الشكر لصاحبة الوصفة ، الصراحة وصفة ساهلة و بنيييييينة ، و طيبتهم في مول السيليكون و هذي كانت فكرتي و جاو امممممممم

حليت القطايف بالزبدة الذائبة و مباعد عطيتهم في مول السيليكون مع الضغغغغغغغط ، ثم حطيت الجوز مدشش خشين من دون اي اضافات و في الاخير طبقة اخرى قطايف و ضغطت مليييييح ، كي طابو عسلتهم بعسل بارد ، و الله بنان بزاففففففففف ، على فكرة 100غ جوز دارتلي 24حبة

Domes au chocolat

هذي الوصفة سهلة و بنينة

250غ زبدة بحرارة الغرفة
60غ سكر غلاسي
2 بيض
فانيليا
20غ كاكاو
تقريبا 360غ فرينة

و الحشو درت كاوكا ًو محمص و نيستلي كاراميليزي

و الباقي موضح بالصورة ، فقط بالنسبة الشوكولا انا نحطها في صحن و نحطها في الكسكاس و تحتو الماء على نار قلييييلة و بلا مانكسر الشوكولا تذوب تحففففة ، لانو اكتشفت انو الحرارة الزائدة هي لي تخلي الشكولا تتكتل لانها تحترق حتى لو كانت في حمام مريم

صابلي مارغريت

هذا الصابلي اسهل مايكون و شكله باهي

125غ زبدة بحرارة الغرفة
100غ سكر ناعم
فانيلا
فرينة حسب الحاجة ، تكون العجينة طرية

نشكلو الصابلي بمول المارغريت و نطيبوه فوق مول les dômes مقلب طبعا نحتاجو واحد كبير وواحد صغير
و نلصقوهم بالمعجون او جولي










صابلي الكابريس

هاذي الوصفة حطتها الغالية عطر الذهب في الكوزينة و شفتها تاني في الفيس لذيذة جدا
انا فقط غيرت الشكل عملتها في مول السيليكون و زينتها بالشوكولا البيضاء.

مربعات الشوكولا

هذه الحلوى سهلة و لذذذذذذذذذيذة
180غ فرينة
200غ شوكولا مذابة
200غ سكر مسحوق
180غ زبدة مذابة
4 بيض
ملعقة صغيرة خميرة كيميائية
نخفقو البيض و السكر و نزيدو باقي المكونات نتحصلو على عجينة رخوة نطيبوها في مول مفروش بالورق الكبريتي
بعد طيب تزينوها كيما تحبوا ، انا عملت مربعات شوكولا بيضاء و قصيت الحلوى بنفس الحجم و لصقتهم بالشوكولا الذائبة












الحواشي لي بقاولي فتتهم و زدتلهم مشمش مجفف مقطع و نيسلي كاراميليزي و حشيت بيهم الشوكولا جاو اممممممممم













يا رب تكون حلوياتي عجبتهم رغم بساطتها

في امان اللّه