سؤال لأم أماني ؟

[سيرين 5]

السلام عليكم و رحمة الله تعالى و بركاته،
أولا و قبل كل شيء بارك الله فيك و يعطيك الصحة على كل الوصفات لي قدمتيهومنا جربت لحد الآن أربع وصفات خرجولي روعة و حمرولي وجهي قدام عجوزتي خاصة أنها تحب العجين ، فقررت كل ما تسيء لي نصنع أكل و خاصة لي تحبو و نبعتلها هكذا نضرب شحال من عصفور بحجر واحد من جهة نلهي نفسي عنهم بالطبخ باش ما نبقاش نخمم في الاساءة تاعهم ، و من جهة نرجعلها السيئة بالحسنة و نكسب أنا الأجر و نخليها هي في ذنوبها، و من جهة نبينلها بلي أنا مام خدامة برا قادرة على شقاية في الدار و ما نسناش يصدقو عليا مكلتهم... لأنها تمدلي و تهين مع العلم أني حامل
جربت وصفة الخبز بالياوورت الطبيعي خرجلي هايل و عجبها بزاف عجوزتي قاتلي الخبزة لي مديتيهالي كليتها وحدي عاودت خدمتلها 4 خبزات و زادت بعتتلي بنتها باش تدي الوصفة.
و جربت وصفة خبز الكوشة (الدار) جاني تان هايل يعطيك الصحة و بعتلها منو تان
و خدمت خبيزات بالفرينة و السميد و بعتلها منهم بارك الله فيك
و أخيرا خدمت بريوش بلاكرام فراش جا هايل و ريحتو في الدار دارت حالة و بعتلها تان منو
الله يعطيك و يمنيك أختي أم أماني الله يحفظك كاين ناس ما تحبش تمد الوصفات و تخليها عندها حصرية و مام كي تقوليلها وريلي الوصفة تكذب في مكوناتها باش ما تتعلميهاش ؟
المهم أنت إنسانة الله يبارك طيبة و تحبي الخير للناس ان شاء الله يرجع هاذ الخير لدارك و عايلتك و أولادك يباركلك ربي فيهم ان شاء الله، و راني جمعت أغلب وصفاتك كاين للأسف ما بانوليش الصور ألي هي 99 بالمئة تشرحلك الوصفة .
عندي سؤال بما أنك إختصاصية ماهرة الله يبارك في المعجنات، البارح جربت وصفة تاع بريوش الكوشة نسيت منين جبتها ألي حطت الصور البريوش تاعها بانلي الله يبارك خفيف و منفخ بصح كي جربتو ما خرجليش مليح ؟؟؟ دوك نحطلك مكونات الوصفة :
4 كيسان فرينة، كاس زيت، كاس و نصف سكر، 3 بيض (2 كاملين و وحدة البيض الابيض فقط و الاصفر ندهنو بيه من الفوق) ، 2 ملاعق أكل خميرة الخبز مذوبين في 4 ملاحق أكل حليب، قرصة ملح ، 1 خميرة كيميائية، زاست تاع حبة قارص، و ماء نلمو بيه.
أنا لما بديت نخلط العجين لما حطيت الزيت حسيت كاين خطأ في الوصفة بزاف الزيت كاس كامل شمخلي قريب كامل الفرينة كي زيدت البيض و الخميرة المذوبة في الحليب ما بقاتش بلاصة للماء ؟؟؟؟
البريوش خرجلي تقيل و ما تنفخش
شربنا بيه قهوة الصباح و ألي بقى طبعا ما خليتوش في الكوزينة خملتو و مديتو منها صدقة و منها ما تشوفوش عجوزتي و تبدى تتفلسف عليا و تزوخلي ببناتها يعرفو يديرو كلش ؟؟؟
إذا عندك من فضلك وصفة مليحة تاع بريوش في الكوشة ألي يجي كيما خبز الدار (الكوشة) برك بالفرينة و يكون حلو ، حنا بكري كانت ديرهونا يما و ديرلو الزعفران يجي صفر و دوكا مسكينة ما تقدرش تخلط و كي نسقسيها على الوصفة تقولي المكونات بصح بدون كمية و تقولي عينك هي ميزانك أنا تنرفزني هاذ الجملة و ما نخدمهاش علاجال مازال ما عنديش الخبرة الكافية في الطبخ باش نعتمد عليها ؟
تعيشي إذا ممكن تحطينا الوصفة إذا تقدري ؟

و شكرااااا بزاااااااااااااااااااااف بزاااااااااااااف قد ما نشكرك قليل عليك

[إكليل]

السلام عليك اختي ماشاء الله عليك راكي شاطرة الله يبارك و خصوصا في المعاملة .

حبيت فقط نقولك بلي أختنا أم أماني راهي حاطة وصفة البريوش و بدون بيض إقتصادي يخرج هايل و خفيف شوفي في ملفاتها و راح تلقيه إذا كنتي حابة

[lyzzabel]

https://www.djelfa.info/vb/showthread.php?t=1469857

تفضلي حبيبتي بريوش اقتصادي بدون زبدة ولا بيض للغالية ام اماني و ادعيلي انا تاني ههههه

[سيرين 5]

يعطيكم الصحة أخواتي (إكليل و lyzzabel) بارك الله فيكم نجربو ان شاء الله هو المرة الجاية.

[ام امجد14]

ياااااااختى انا معتمدة بريوش الهام روووووووووووووعة و ما يخطيش الدار اولادى يدوه دايما لمجة البارح معلمة بنتى ما صبرتش لانها شافتها دايما تجيبو
بعثتلى على الوصفة و بعثتلها المقادير ما صدقتش لانو ما فيه لا بيض لا زبدة و رووووووووووووووووعة

بلاما ننسى نضم صوتى لصوتك ربى ينورك ام امانى جربت بزاااف من وصفاتك و حمرولى وجهى

[سيرين 5]

يعطيك الصحة أختي أم أمجد ربي يحفظك .

[أم أيوب 11]

السلام اختي سيرين انا كتبتلك باه نشكرك على المعاملة لي راكي تعاملي بيها عجوزتك
اكيدانت انسانة طيبة ربي يبارك فيك ويكثر من امثالك بقاي وفية للمنتدى راح تولي فحلة نتاع الصح

[سيرين 5]

ضيفة الرحمان بارك الله فيك أختي ربي يعيشك والله أنا شكيت ليما علاجال كنت دايما مقنوطة منهم هي دبرت علي قاتلي لي يضرك شبعيه ملحك وليت نطيب و نبعتلها هاذ الجمعة درت التليتلي و هبطتلها طبسي كانو يتغداو الرشتة قاتلي بالعنف أقعدي تاكلي معانا قلتلها لالا صحة راني سقيت و راجلي راه بدا ياكل ما نخليهش ياكل وحدو قاتلي بعنف تاني أقعدي ما راح يصرالو والو كي ياكل وحدو و أنا كنت نجري نطيب في التليتلي علاجال كنت بزاف متوحشاتو، كليت زوج فراشط من فوق القلب و نضت علاجال ما نقدرش ننسالها لي مدتلي المحاجب و حاوزتي ؟

[سيرين 5]

ضيفة الرحمان علابالك واش درت لميت أغلب وصفات أم أماني و طبعتهم خرجلي كتاب فيه 129 صفحة لو كان نعرف كيفاه نحطهولكم في المنتدى ؟

[jojo dj]

يعطيك الصحة ااختي وماديري والو في بالك ماعليش انت ثاني تجيبي اولاد ويعاملولك نساهم معاملة مليحة كما تدين تدان ربي يكثر من امثالك اي حاجة تحتاجيها سقسينا ان شاءالله لي نعرفها نقولهالك كاينة وصفة انتاع بريوش بالرايب روعة حطتها اخت فالمنتدى عجبتني نسيت اسمها المهم اذا تحبي نعطيك الوصفة وكثر الف خير ام اماني ويحفضلها وليداتها ان شاءالله

[سيرين 5]

يعطيك الصحة أختي jojo dj بارك الله فيك حطيلي الوصفة تعيشي محب نوع كل مرة واش ندير ؟