القريوشة*من*مطبخي

[القبطية]

اولا السلام عليكم ورحمة الله
متأسفة جدا لعدم وضعي للمقادير الوصفة لاني اولا والله ماشفت الردود ديالكم وثانيا كان عندي خلل في الكلافي وثالثا انا نقرا بعيد على دارنا درك كي نجي لدارننا ماعنديش وقت باش نحتلكم الوصفة
والان تبعو معا الخطوات
4 عبار فرينة و
1عبر سمن المدينة
قرصة ملح
1 حبة بيض
مغرف فاني
دوك تقولو نسيتي خمارة لالالا مانسيتش لانو ميلزمش الخمارة في هدى العجينة
كاس شائ ماء الزهر
وماء لجمع العجينة

الطريقة
ندوب السمن و وندير الفرينة في ليان كبير وندير السمن في الوسط نبسبس الفرينة مليح نضيف قرصة ملح لفاني حبة بيض ماء الزهلر ونخلط مليح ونلمها بالماء للمعلومة ماتخدموهاش يفرنة تاع الحمامة راهي تجيكم تتقطع ومافيهاش العلك اخدميها ب فرينة لابال ولا سفينة
المهم تتحصلو على عجينة طرية ومتماسكة نخليها ترتاح 15د
الان طريقة التشكيل
نحل العجينة في ماكنة البقلاوة في الرقم ماقيل الاخير ونقطعها مستطيلات طولها 15سم وعرضها 7سم تقريبا ويلا حبيتها تكون صغير نقصى انا هدا واش نعتمد ومن بعد بالجرار وماعلاباليش كل واحد كيفاش يسميها نعمل خطوط متساوية تكون تقريبا 6 او7 خطوط الان تبعو معاي نهز خط في يدي ونتخطى خط هكا حتا نكمل يعني يكونو ادا كان مستطيل في 6 خطوط نرفد 3 ونحط 3
الان طريقة الطهو
هدي لازمك طيبيها في علبة معجوم طماطم اوم معجون مشمش او علبة حليب الاطفال الرضع تنصفي العلبة زيت وتحطيها فوق النار كي تسخن مليح ارفدي حبة يعني تهزي الحبة االي يكون تلت خطط في يدك ولخرين مليين وترميها في الزيت بلعقل ماتخافيش ادا الزيت هداك بدا يغلي
للحتراس اعملي سلك في العبة باش تشديها وباش ماتعيياش لانو تبداي خايفة زيت ادا يتفرغ عليك
وهاكدا نكون كملتلكم طريقة الشرح اقلي وخطي في كسكاس حتى تكملي كامل العجينة وعسليها بالعسل ماشي عسل مخفف لازم عسل لانو يلا عسلتيها بعسيلة مخففة راح تخضارلك وجيش شابة وخليها تقطر في كسكاس ومن بعد حطيها في ليكيسات

ان شاء الله تكون فهمتو الطريقة ويرحم والديكم ماتزعفوش عليا والله الضروف ماسمحتليش و والله حتى لهدا وين دخلت شفت ردودكم الي ممكن عندها عامين كبما قالت الاخت ام انس

اعتذر وان شاء الله تكون تقبلتوه