الى فحلات جيجل ، سؤال ؟

[sou3ha]

السلام عليكم
حبيباتي حبيت نسقسيكم على اكلة يديروها ناس جيجل في المناسبات وهي الزرير

كيفاش تندار ؟ تعيشو فهموني بالتفصيل الممل

[عبير الحـب]

وعليكم السلام
انا مانيش من جيجل والزرير الي نعرفه هو نتاع باتنة
تحميصي القمح والحمص والعدس
اللبلبي مايتحمصش ومن بعد ترحي كل هادو
وذوبي الزبدة لما تغلي زيدي ضيفي ماء الزهر والعسل وخليطي بيهم الزرير دريها جارية وزيني بالجلجلان او المكسرات المرحية،، وان شاء الله يزيدو يفيدوك البنات ،، ربما نتع جيجل مختلف ،،، موفقة

[ناديـة]

على الأقل أختي صفي لنا هذا الزرير لأنه كاين فيه أنواع وما هي مكوناته؟

[اسماء الصيدلانية]

انا من جيجل
تقلي السميد و لما يبرد شوية تخلطي معاه زيت زيتون و عسل و تمر مقطع و تحبكيهم مع بغض

[جيجلية]

اختي الزرير كل منطقة كفاش يديروه احنا كانو جداتنا يديروه بكري بصح دوق بطلناه انا ما نعرفش كفاش يديروه

بصح الجواجلة تاع البلاد مازالو محافظين على هذي الاكلة ان شاءالله يدخلوا ويعطيوك الوصفة

[الماسة الحساسة]

OKHTI ZRIR YDIROU L JWAJLA
https://www.djelfa.info/vb/showthread.php?t=1219805
احنا نديروه بسمن البقر و سميد سبيسيال و نطيبوه فالكوكوت و نزينوه بالزبيب و المكسرات

[سميرة10]

انا ما نعرفوش ان شاء الله متصفحات المنتدى يفيدوك

[sou3ha]

يعطيكم الف صحة

[mina18000]

ضعي السمن في كسرونة فوق النار حتى تسخن تماما. ثم اضيفي السميد بشوية وحركي في نفس الوقت.عندما تحسي بلي الخليط بدا يخف زيدي اضيفي شوية سميد وحركي حتى يحمر الخليط. انزعيه من النار واتركيه يبرد. عندما يبرد اضيفي السكر الرطب حتى تتحصلي على لحلاوة لي تحبيها واضيفي الجوز,الزبيب......ادا اردت ان يكون على شكل كريمة عجنيه مليح بواسطة ملعقة كبيرة و بصحتك.

[mina0718]

ربما الموضوع قديم لكن حبيت افيد الاخت
مثل ما قالت الاخت mina18000 مع بعض التعديل من الافضل قبل ان تضيفي السكر اتركيه يقطر تماما في كسكاس و من بعد اضيفي القليل من زبدة البقر و سكر قلاصي و اخلطيه جيدا بيدك رايح يكون افضل في الذوق لان السمن المطبوخ فيه يترك رائحة قد لا يحبذها البعض و يمكن اضافة كاوكاو او لوز او حلوة الترك مرحي جيدا و لا تنسي اختيار السميد من النوع الرقيق جدا مثل بن عمر و زيدى غربليه
و للعلم انا لست جيجلية لكني سكنت فيها و لحد الساعة ناس البلاد يحضروه بمناسبة الولادة و ياكلوه مع خبز الدار
اتمنى ان اكون افدتك و سلام

[ام ورود]

سلام اختي انا من وسط بلاد جيجل وحبيت نصحح الزرير نعملوه عند ولادة و في المولد النبوي يعني نحطوه بمناسبة المزيود الجديد اما الطريقة جدتى الله يرحمها كانت تديرها بالسمن نتاع البقرة والسميد الحرش مش رطب
اولا تحطي السمن في كوكوت او كسرونة المهم تكون ثقيلة لكي لا يتحرق على نار هادية تدوبي السمن ثم تحطي السميد مرة واحدة وتبقاي تحركي ملعقة الخشب بحتى تحسي الخليط نتاعك يبدا يخفاف حتى يصبح خفيف بزاف وتبقاي تحركي وتعرفي انوا طاب لما تحطيه في فمك تجدينه يقرمش هدا يعنى انو طاب
لازم تبقاي تحركيه لانو لو تركتيه راه يتحرقويتغير دوقوا
ولما تبقاي تحركية رايح يطيب بدون ما يحمار بزاف لونو لازم يكون دهبي
لما يطيب زيديلو السكر الرطب حسب دوقك وبقاي مرة على مرة حركيه حتى تدخل السمن مليح في السميد
وفي الاخير نضع حلوة ترك و الجوز المكسر ونخلط جيدا ثم نزينه بانصاف الجوز من فوق
والله بنين بزاف انا توحمت عليه لما كنت حامل بابنتى
ملاحظة ممكن تعمليه بسمن مدينة يجي تاني بنين وممكن تخلطي مع سمن البقر

[ياسمين1990]

السلام عليكم
كل منطقة يختلف الزرير نتاعها عن المنطقة الاخرى حتى في الولاية نفسها
مثلا في منطقتنا وهي تابعة لولاية جيجل لكن عندها حدود مع ولاية ميلة
نخدموا الزرير بالبسيسة نتاع القمح والحمص محمصين ومرحييين ومغربلين طبعا ويسمى (بوبخة )
وكاين لي يديروها بالشعير المرمز يعني دقيق لي رطب ويسمىى (بوخمر )
المكونات
من الاحسن للنفساء يكون مخدوم من زيت الزيتون دافء مع قليل من العسل الحر مع قليل من التمر اي نوع تكون مقطعة رقيقة
ثم تضيفي دقيق البسيسة اي نوع تحبي وتخلط الكل مع بعضهم وبصحتك
صحي يساعد النفساء على الشفاء بسرعة ورجوع الرحم الى مكانه ونقائه من دم النفاس
ومغدي لذيذ و مشبع ومذر للحليب
هذه هي الاكلة المعتمدة في عائلتي للنفساء ههههه
حتى نساء اخوة الزوج لما نكون حاضرة في نفاسهم يقولولي درينا الزرير نتاعك ههههه
يوجد من يضع في مكان زيت الزيتون زبدة البقرة الجديدة المحلية الصنع هههه
يعني تجبدها من اللبن وتغسلها وتذوبها طول وتضيفلها المكونات الاخرى
اما اذا كانت غير مؤكدة المصدر من الاحسن الاستغناء عنها تفاديا للامراض منها الكوليستيرول وامراض الجهاز الهضمي بصفة عامة
هذي ياسيدتي الزرير في منطقة من مناطق وطني العزيز ربي يحفظه من كيد الكائدين
ويباعد علينا الابتلاءات والمحن
ومبروك المزيود ويتربى في عزكم ويجعله ربي من الصالحين البارين
ملاحظة مهمة
هذا الزرير قلتلك خاص بالنفساء
اما الزائرات نديرولهم الطمينة ومكوناتها هي
في هذه الحالة لازم الزبدة ومن الاحسن نتاع البقرة ههههه
مانذوبوهاش وانما نعجنها وهي باردة ونضيفلها البسيسة حتى تختفي الزبدة وتعود ماتبانش
وليحبها حلوة يزيدلها شوية عسل ويعجنوها باليد حتى تتلم مع بعضها ثم يجمعها على شكل دائري ويوضعوها في صحن
والتزيين كل وحدة واش عندها في دارها
تقدري غير تنقشيها بالمغرفة او طابع من طوابع القاطو
وشهية طيبة