مشكلة مع عائلة زوجي

[مشكلتي]

السلام عليكم
حبيت نحكيلكم مشكلتي وحبيت نعرف لوكان جيتو في بلاصتي واش تديرو
المهم بحكم عمل زوجي البعيد جدا وبقائه لفترة طويلة هناك انا تحتمت علي نجي لدار بابا دايما
ذات يوم اتصل بيا زوجي وقال لي انو اخوه المتزوج جاي لدار بابا باش يطل عليه لانو كان مريض ومقبل على عملية مع العلم انو المسافة بين الولايتين 5 ساعات بالسيارة ذهاب و 5ساعات رجوع صراحة استغربت شوية بصح راجلي قالي باللي خوه جابتو الطريق لانو يحوس على بياسة للطونوبيل وكي شاف روحو قريب لينا قرر يجي
المهم وصل اخوه مع زوجته واولاده عادي ...قعدنا نحكيو مع مرتو وهو مع بابا وبعد مدة بسيطة لقيت مرت سلفي جبدت ماما على حدا وطلبت منها انو بابا يسلفلهم مبلغ من المال 10ملاين مانيش عارفة علاش المهم ماما استشارت بابا وتمت العملية لان بابا حشم يرجعهم هكاك
وكان الشرط من مرت سلفي انني مانقولش لراجلي باللي سلفوا الدراهم من عندنا انا من الاحراج قلتلها هيه وراحو يروحوا مع العلم انو سلفي ماهدرش مع بابا على الموضوع ابدا

المهم كي روحوا عيط راجلي وهو فرحان بالجاست لي داروه وقالي حمرلي وجهي وكذا وانا صراحة مانقدرش نخبي عليه حكاية كيما هادي هدرتلوا واش كاين وهو ما امنش وتبهدل وغضب بزااااااف بصح انا طلبت منو انو مايقولش لخوه تفاديا للمشاكل المهم بابا دار العملية ايام بعد هاد الحادثة وسلفي مام با عيط ولا سقسا عليه المهم فات حوالي اربع شهر او اكثر جا راجلي من الخدمة وتلاقى هذا خوه ماحكمش روحو قالو علاه ماقلتليش باللي رايح تسلف من عند نسيبي المهم كي نعرف وماعندي مادخلني بيناتكم تصورو خوه واش قالو؟ قالو نورمالمون تفاهمت معاه على بابا انو مايهدرش وهو هدرلك منبعد نعيطلو ونقولو علاه هدرت .....مع انو مرتو اللي سلفت وهو ماهدرش خلاص
المهم بعد هاد الحادثة عاد سلفي يتجنب راجلي ومايجيش لعندنا كي يجي من الخدمة وكل ما يتلاقاه فالطريق يدور وجهو
ومرة من المرات جات لعندي مرتو بسبة انها تعرضني لمناسبة بصح قالتلي رانا مغششين منكم وراحين نطرطقوا وقالتلي كي نحكم امك نتفاهم معاها ولوكان جا عندي ذهب نبيعوا و نردوا صوارد باباك وبابا هادي مدة عام والله ماهدر على صواردو وماقال ردولي وهوما من نهار جاو سلفوا سلفي ماعيط لبابا ما سقسى عليه ماخسر عليه حتى اينيتي
هادي هي المشكلة انا والله جاتني مستحيل نكذب على راجلي ونخبي عليه حاجة كيما هادي وراجلي قالي لوكان ماهدرتيليش وفقت كانت تخلص بيناتنا واصلا ماتجيش نجي مع سلفي ومرتو كونتر راجلي كفاية انو خوه كذب عليه ودار طريق على ضهرو وراجلي غاضو الحال بزاف وتبهدل قدامي وقدام بابا
قولولي واش رايكم ؟؟

[azera dz]

الموضوع للرفع .

[oumyacine]

men rayi nti kan 3andek el haq ki khabarti rajlek ou houma ghaltine rabbi yeslah binatkoume... sayssihoume fi wejh rabi ou rajlek

[أم ريتاج زهرة]

darti haja mliha ki golti l rajlak w hadi mart salfak ghayara w gatlak matgoulilahch bach tayhak p piége w dilak prob maa, rajlak w ana man rayi matzidich trouhi andha w rahi taara&d fik bach dilak un autre prob ivitiha w fayda f rajlak w nass bakri galou * salfa halfa *salam

[محمد جديدي التبسي]

أنت على حق وكنت تتلامي لو ما خبرتيش زوجك بالموضوع
وسلفتك وزوجها ما يحشموش خليهم في حالهم وادعيلهم بالهداية

[- بصمة خير -]

ماتعزعفيش
الغلطة تاعك
حتى لو عرف زوجك كنت قادرة تقولي
ماقالوليش ماسمعتش

انت نيتك مليحة تحكي لزوجك كلش واش يصرا معاك و ماتخبي عليه والوا
لكن سامحيني انت الغالطة

الحل:
لا أعرف
الله يفرج عليكم

[oumhana]

المشاركة الأصلية كتبت بواسطة البنفسجية

ماتعزعفيش
الغلطة تاعك
حتى لو عرف زوجك كنت قادرة تقولي
ماقالوليش ماسمعتش

انت نيتك مليحة تحكي لزوجك كلش واش يصرا معاك و ماتخبي عليه والوا
لكن سامحيني انت الغالطة

الحل:
لا أعرف
الله يفرج عليكم

لوكان غير تفهمينا كفاش هي الغالطة و شكراـ خاطر مفهمتش

[naamane3]

المشاركة الأصلية كتبت بواسطة البنفسجية

ماتعزعفيش
الغلطة تاعك
حتى لو عرف زوجك كنت قادرة تقولي
ماقالوليش ماسمعتش

انت نيتك مليحة تحكي لزوجك كلش واش يصرا معاك و ماتخبي عليه والوا
لكن سامحيني انت الغالطة

الحل:
لا أعرف
الله يفرج عليكم

انت الغالطة الى تنصحي فيها نصائح كيما هاذي
كون جيتي في بلاصتها كون خربتي الدار
ربي يهديك

[manothebest]

لوكان جيت في بلاصتك نقعد حايرة وحايرة ومن التالي ندير كيما درتـي...
ماتلوميش روحكــ...
ديجا هوما الغالطين جايين يطلوا على المريض ولا لاهيين بالدنيا!!
المهــم صدّقيني الأمور اللي بين الأسلاف تتحل...لكن لوكان درتي خطأ وما قلتيلوش صدقيني راح يشدهالك راجلك طول العمر هاذي إذا ما تخربتش داركــ....
المهم، مادام جاتك سلفتك قااااع وماعليش الحمد لله
ظرك صدقيني تقدو ترجعو العلاقات كيما كانت وأفضل ....الأهم أنو راجلك زادت ثقتو فيك
ربي يوفقك

[salem1985]

والله يبان لي انت ناقصة خبرة في الحياة ننصحك ما تقحميش روحك بين الرجال رايح تروحي ضحيه لانو خاوة موش رايح يفوت خوه على جالك ولا وقف خوه وبباه ضدك رايح تكرهو ليك ذدارك ربي يهديك

[melissa lola]

انا اختي نشوف بلي ماغلطتيش مليح كي قتلي لراجلك لوكان سمع من جهة يديرلك حالة وخوه لوكان جات نيتو مليحة عمرو مايروح لنسيب خوه بلا ما يقول لاخوه على الاقل يقول لراجلك هو يقول لباباك و الله اعلم

[عابد لله]

وانت علاش مقلقة روحك؟ انت درت الواجب وباباك دار الواجب وراجلك دار الواجب وسلفك ومرته ناس انتهازيين وهذا طبيعي لان من يتسلف على شخص بهذه الطريقة انسان ما يستاهلش الخير صراحة. خلوهم بينهم وبين ربي راهم يخلصوا.

[nilly]

انتي ظالمة اكثر منهم كلهم علاه كدبتي وقالتلها ايه منحكيش مراكيش طفلة صغيرة حنى تديري هدا جاست وياخي هي محكمتش بيستولي وحابة تفرغه عليك انتي لوعدتيها وخنتي الوعد ونسيتي بلي الوعد في الاسلاك كيما صلاة وصوم .
صح مرت سلفك وسلفك باينين عقارب بينين يمشيو على مصلحتهم بصح انا ضلمتك برك كي وعدتيها ورجعتي بوعدك كي هلبالك بيها ماشي مليحة تقوليلها لالا منمدلكش ضربي راسك للحيط عيناني
منحبش هدهي طرقات صغيرة ليديروها ناس على رواحهم الواحد يكون صريح . ولا خفتي تزعف هاهي دركت زعفت يعني في الحالتين راح تزعف وشفتي دركا لانك كدبتي عليها وين داك المشاكل ولاو يكدبوا على بابك وعلى يامك ودرتيلهم المشاكل مساكن اخطر دارو الخير مكنش لازم تقحمي بابك ويمتك في هدا شي .

وراجلك هدا لقالك لوكان كقلتليش غادي تخلص بيناتنا سمحيلي بصح زوجك هدا هو ثاني ؟؟؟ عاودي حسابتك معاه مع مشكل بسيط كيما هدا قالك تخلص بيناتنا شغال تهديد صافي انتي متعنيلو والو ولا علاقتكم صافي اد جاك موقف شبيه راح تطلقي .
المشكل ليس فقط في سلفك وزوجته المشكل فيكم كامل وربي يجيب صواب

[حبيبة زوجي 25]

ربي يجيب الخير حاولي تصلحي بين الاخوة .

[فاطمة 14]

يااختي كي يكون عندك مشكل ماتجيش تحكيه هنا لخاطرش كاين شي ناس مايعرفوش يميزوا بين صح و الخطا و يبقاو غي يهاجموا فيك الله يهديهم ماراكيش غالطة اختي في واش درتي