من اليوم ماتشريش الكراواسن هايل

fatalim · 2013-07-19, 16:05

المقادير
20غ خميرة طازجة وليست فورية لازم
100غ زبدة طرية
500غ فرينة
10غ ملح
50غ سكر
15غ حليب بودرة كامل الدسم
ماء دافئ
250غ زبدة طرية

الطريقة
في وعاء العجانة ديري 100غ زبدة/الملح/السكرو الحليب البودرة ونص الفرينة نتاعك

في اناء اخر ذوبي الخميرة الطازجة في شوية ماء دافئ مش ساخن والا ستموت الخميرة

زيدي الخميرة للعجانة

ابدئي العجن اذا ماعندكش عجانة اتكلي على يديك

زيدي الماء العجينة لازم تكون جارية شوية
زيدي نص الفرينة اللي بقات وكملي العجين لوكان عجنتي بيدك لازم تغطسي يدك بزاف فالزيت لاخطركش العجينة تتلاصق بزاف فاليد

اجمعي العجينة كما في الصورة وقصيها كماهو مبين في الصورة

غطيها وخليها تخمر وترتاح

خليها مدة 45دقيقة حتى تنتفخ وتولي كيما هكذا

كيما تخمر اضربيها على الطابلة وخرجي منها الهواء ومبعد حليها وغطيها وحطيها في الثلاجة

حلي عينيك مليح هنا الخطوة المقبلة شوية صعيبة خرجي العجينة نتاعك وحطي فوقها الزبدة لازم ماتكونش يابسة بزاف لاخطركش التوريق مايطلعش وماتكونش طرية بزاف باش نتحصلوا على الطبقات اللي تشوفيهم في العجينة المورقة قبل ماطيب

اطويها للمركز كيما رخصة السياقة

ومبعد زيدي اطويها على زوج

ومبعد زيدي عاودي افتحيها كيما في الاول وبقوة

وزيدي اطويها كيما رخصة السياقة

ومبعد اطويها على زوج

زيدي عاودي افتحيها كرري العملية 4 مرات

وكي توصلي تطويها على زوج في المرة الرابعة غطيها بكيس بلاستيكي وحطيها في الثلاجة لمدة ساعة او ساعتين وكي تحبي تخدمي افتحي العجينة بسمك 3 ملم ومبعد قطعيها لمثلثاث كيما في الصورة

ادي مثلث وقطعيه من القاعدة وجبديهم شوية كيما في الصورة كيما برج ايفل

روليها على شكل حلزون ههههههه يجوك وحدين كبار وحدين صغار

حطيهم في بلا نتاع الكوشة فوق ورق الزبدة

ادهنيهم بشوية حليب +سكر ماشي باليض

خليهم يخمرو من ساعتين الى 3 ساعات لازم تصبري باش تنجحي حاجة ماتجي بالساهل الطياب فن يتطلب التحدي والصبر

سخني الفرن 180 درجة وطيبها لمدة 25 دقيقة تقريبا على حساب الفور واليك النتائج على فكرة رائحة المطبخ تهبل

حطوهم يبردو جربوه حبيباتي واخلعوا ضيافكم واسعدوا ازواجكم واولادكم

ملاحظة
من الاحسن استعمال فرينة سفينة للحلويات وزبدة توريق خاصة كيما صالحة