مشكلتي مع راتبي

[مشكلتي]

السلام عليكم
ان شاء الله راكم الكل بخير
يا خاوتي انا نسلك تقريبا 4 ملاين و عندي 6 سنين خدمة و دون زواج عييت نوفر من راتبي كل شهر نقول الشهر الجاي
و كل شهر يروح في مصريف هكذا
اذا عندكم فكرة انصحوني
عملت دفتر توفير - مع اني نرفض ناخذ الفوائد- لكن كل شهر نقول الشهر الجاي اول ما نسلك نخبي فيه قبل ما نصرف والو
اذا عندكم فكرة انصحوني...

[السي محمد]

اعطيهم للحاجة ( الوالدة)

[amineb64]

مشكيلتك هي انك ما حسيتش بالبطالة و التشومير لوكان حسيت بيها تعرف وين دير ديك 4 ملاين
4 ملاين تاكلها في شهر ناس ب 2 ملاين معيشى عايلة الله يهديك زير راسك و عرف وين ديرهم

[nibou]

دير برنامج شوف واش هوما مصاريفك،مثلا النقل قداه يسقاملك،الأكل قداه يسقاملك،الكسوة كل قداه وقداه تتكسى،هل تتكيف و لا حاجة أخرى و نتمنى انك ما تكونش هك طبعا،قداه يسقامولك،يعني مثلا دير دراسة لمدة شهر كااااااامل و شوف المتوسط تاع المصاريف و مبعد حط المصاريف اللي ماراهيش شهرية،يعني مثلا الكسوة وكتاه تتكسى وبقداه تسقاملك،مثلا الأنترنت،إذا كنت ما تسلكش كل شهر،دير حساب لهداك الشهر بلي راح زيد دراهم الأنترنت،مثلا للدار لاكان كشما تشري حاجة كي تجي مروح و لكن ما تكثرش مدام حاب تصدر،المهم قيد كللل مصاريفك،راحنمدلك على سبيل المثال فقط،أنو الشهر يخرجلك لمليون و نص و أنت تسلك ربعة،إذا 2 ملاين خليهم ديما على جنب و يصرى واش يصرى،راني نقولك يصرى واااااش يصرى ما تحبدهمش،أنسااااااااهم و كل شهر هك،و لاكان راك تسلف دراهم للناس ما تكثرش بالتسلاف و لاكان كترو عليك قولهم الله غالب ما عنديش،هادي كبدايةقلنا ديما 2 ملاين ما تجبدهمش و مليون و نص أصرفو على روحك والخمسمية هاديك،خليها بلاك تسحقها في كاش مصروف مفاجئ
و لما مثلا ما تكفيكش المليون ونص،زيد أجبد الخمسمية،نفرضو ما كفاوكش 2ملاين لشهر هنا واش راح دير؟؟؟؟رد باالك زيد تجبد لااااالا روح نتا سلف،فهمتني سلف غير قد ما تحتاج ما تكثرش،باه هكا تقدر تزير روحك و طبعا لما تسلف راه يقرب يخلاص الشهر،إذا غير تسلك ردهم لماليهم فهمتني و هكذا ما طولش عليهم،و ابقا صدر ب 2 ملاين حتى تكمل 10 مثلا،العشرة هادو خلاااص مالازمش تهبط منهم و رتح شوي،يعني أصرف 4 ملاين على روحك لاكان كشما حتجت و بعدها زيد أبدا صدر على 10 ملاين هادوك والدورو اللي تصدرو أنسااااااه،ديرو كلي مكانش،عمرك ما تقول اني مخلي فهمتني و حاجة اخرى و مهمة دراهمك لما تجبدهم أقرا أيات ولا أدعية وأدعي ربي باه يكونو حلال ويباركلك فيهم،هادي اههههههم نقطة و ربي يوفقك

[blanche rose]

عندي اقتراح ان شاء الله يعجبك
عندما تسحب راتبك اذهب مباشرة الى دفتر التوفير ووفر المبلغ الذي تريده و الباقي اصرفه بطريقتك

مثلا
اذا خبأت 3 ملايين و تركت مليون ستجبر نفسك على التعامل يالمبلغ المتوفر لديك أي مليون مثلا لأنه ليس لديك غيره
لكن ان بقيت بين يديك 4 ملايين ستصرفها كلها.وان سألت نفسك فيما صرفتها؟
فلن تجد الجواب ..لأن أغلب المصاريف تافهة.. لكنها تستنزف كل المال.

ربي يعينك اخي

[- بصمة خير -]

دير جمعية مع مجموعة من زملاء العمل

و كل ما كان العدد اكثر احسن

المعنى من الاحسن تكونوا في 12

و كل واحد يحط 2 ملايين

و ديروا القرعة و كل شهر كل ماتكون دالة واحد فيكم يدي 24 مليون و خبي صواردك
*فرضا راكم في 12 و كل واحد يحط 2 ملايين*

حتى المردودية تقدروا ديروا بها جمعية تكونوا في 4 و كل ما تدخل المردودية يديها واحد على حساب القرعة

و دفتر التوفير لازم تخدموا في اقرب وقت

و اذا تقدر دير جمعية ب 2 ملايين و المردودية و تبقالك 2 ملايين

1 مليون تصرفوااااااااااا و 1 مليون تخبيها في دفتر التوفير

+

كل شهر تخرج مبلغ للمال صدقة

+

فكر انك لازم تتزوج لاكمال نصف دينك
و الا تكبر و تندم على الوقت اللي ضيعتواااااااااا
و الندم ما عندوا ما رايح يديرلك

سلام

[samirabahi]

الحل اخي مباشرة عند حصولك على راتبك الشهري كما قال الاخ الفاضل مباشرة الى صندوق التوفير ضع مثلا على الاقل 15.000.00 والباقي في مكان مامن عليه في البيت والباقي في الجيب لانه مادام الممال في الجيب اكيد يكون تبذير ولا تعلم المال اين يذهب او اعمل حساب اخر مثلا احنا الوالد ديالي يقسم مثلا 40.000.00 يكون 20.000.00عند الحاجة الوالدة لمصروف البيت اي احتياط والباقي كان يعرف كيف يتصرف به.

[محمد جديدي التبسي]

يظهر أنك كريم ياسر لذلك لن يمكنك التوفير من مرتبك خاصة وأن الشهرية في دزاير ربا في ربا كما يقال ...الحل الوحيد أنك تخليها في حسابك وأنسى طريق مركز البريد إلا في حالات الضرورات القصوى وما تهزش الشهرية كامل خذها بالجزء وزير روحك ونقص من الخرجات للسوق والمصاريف التي لا معنى لها خاصة مع الأصدقاء ..وأهم شيء يخليك دير حساب للشهرية أنو لازمك تخطب وتسعى للزواج عاجلا..ربي يفتح عليك

[sarl02]

والله رانا في نفس المشكل ...رانا ضايعين لا دار لا دوار...والدراهم كيما ايجو كيما اروحو....الله اجيب الخير

[Malek12]

لو تذكر لنا بعض من مصاريف يومياتك حتى ربما تكون النصيحة في محلها

و على كل حال تسطيع بالارادة فقط

[ام القاسم]

قو ل بسم الله اللهم بارك لي ...عند استلام الشهرية من البريد

[" أبو عبود"]

مكان لاه تعب روحك حبيبي لي جيبو مقعور عمره ما يدير الدراهم. راني اكثر منك. راتبي 67000 بلا المردودية بعد 15 يم من سحب الراتب نتسلف المصروف مع اني لا مدخن ولا شارب خمر ولا بناء ولا حج ولا زواج ولا سيارة هههههههههه
روح ارقي هذي عين قادرة ومن بعد دير برنامج. اشري اليويور وافتح كونت دوفيس وجرب وان شاء الله سيطون لديك ما تريد

[منال100]

والله أعجبني كلامك يا سي عبود الظاهر لكاتب عليه الشقاء يبقى شقي

[AKIS]

لو كنت تصرف راتبك على الأهل لحاجتهم إليك ربي يجزيك خير
أما لو كنت تصرفهم على الأكل و اللبسة و التحواس زير جيبك و شد الحزام و أو كل ما أشتهيت اشتريت

[*نسرين]

دير جمعية هكا خير