نطمع نشري خبز الدار من لبرا نطلق مرتي ....ماتخلعوش

[ولد حمد الباتني]

السلام عليكم ورحمة الله وبركاته
واش راكم ان شاء الله بخير

في كل موسم عيد وقبل يومين تبدا تظهر لاشان والطوابير أمام المخبزات لأجل شراء خبز الدار ...

وكم اتعجب ونحير كيفاه في مناسبة ويوم في العام حتى خبز الدار يشريوه ؟؟؟؟؟ ثم نترحم على الوالدة بالخير الله يحفظها
ماكانش قد يطيب فالدار والريحة تاعو تضرب فالدار ويديوه يطيب فالبلاطو وو هاذي هيا بنة العيد وبنة خبز الدار ، ماوش تشريه طيبهولك سماعيل الكواش وتروح فرحان تكونجليه ....
حتى إسمو خبز الدار الدار الدار
ولكن هذا كامل ومازال المشكل المحير، وهي البعض يشريو الخبز العادي تاع ألف فرنك نهار العيد ؟؟؟؟
انا نحير والله، حتى نهار العيد تضربو الخبز ؟؟ ماكانش حجة مقنعة تشري الخبز نهار العيد، واليوم والأطم قالك راهم استوردو الخبز من الإمارات مكونجلي في حاويات لتفادي الندرة ؟؟
يعني عيد عيد ونشري خبز من الإمارات جاي في حاويات مكونجلي ؟؟ كاريثة مانتخيلهاش تصرا
لا أدري المشكل في الرجال ألي مايزيروش نساهم يطيبولهم خبز الدار ؟؟ ولا لمرا ألي ماتعرفش ؟؟؟؟، ولا تاع سماعيل المخبزة بنين ؟؟ ولا ماكانش الصوارد ؟؟؟

العام لي فات كان واحد مداير لاشان يشري خبز الدار وكي لقا الغاشي خرج من لاشان وقالي لوكان نطمع مرتي نشريلها خبز الدار من برا نطلقها ، قتلو صحيت صح كنت مداير لاشان تشري لحليب ....

اذا عندكم أجوبة وأراء اتفضلوا
ملاحظة:
المقصود من الموضوع ماوش على الكسرة ولا الرخساس كيفاه يسميوه البعض هذاك الحمد لله يومي يطيب فالدار
الموضوع على خبز الدار تاع المناسبات ولا رمضانات ولا مانعرف ...
صورة خبز الدار