حيثيات التسجيل في كلية الطب - قسنطية (نصائح + المفات المطلوبة + انطباعات) كلّ هذا مع نعمة القدوس ...تفضّلوا

[نعمة القدوس]

السسلام عليكم ورحمة الله وبركاته

كيف حال الأعضاء اليوم ؟
أنا تعبة جدا رايحة نموووت من التعب


(( واش عندي مدة ماكتبتش موضوع من هاد النوووع
يااخي حالة .. راني تووحششششت يااووو ))


المهم السبب وراء كتابة هذا الموضوع هو الفترة تاع التسجيلات التي بدأت اليوم
2 من الشهر الجاري (أوت) إلى غاية يوم الخميس 7 أوت

وبما أن هذا الموضوع رايح يكون ضمن اهتمام الكثير من الطلبة
من ولايات الشرق
(سكيكدة، أم البواقي، جيجل ...)
قررت أنني أكابد التعب اللي راني فيه وأصف الأجواء التي خيمت على أول يوم من أيام التسجيل
وذلك في

كلية الطب بقسنطينة

أول شيء وقبل أن أصف لكم الأجواء كان لابد أن نعلم مكان الجامعة
(أنا ذهبت برفقة أمي ولولاها لتهت ولوجدت نفسي كيما يقولو في "قرحة بوتلّاف" ههههه)

هذه صورة بالقمر الصناعي للموقع الخاص بالجامعة



يمكنكم الاستعانة بـ Google Maps للحصول على الطريق الأقصر للوصول من مقر سكناكم إلى الجامعة بالسيارة
واللي ماعندوش السيارة كي حالتي
يشوف انسان يعرف البلاصة وخلاص
هو يديه يركّبو في طاكسي !

كيما حالتنا أنا وماما حكمنا طاكسي من "فيلالي" إلى حي "الشالي" (الصنوبر)

المهم كي توصلوا
تلقاو "غار" متكون من ثقبين ( يا عيني على التعبييير )
روحوا من الأيسر لأنو الأيمن فيه الما فالأرض (حاشاكم)

مبعد تمشيو في طريق نحو اليمين تلقاو واحد البناية
المهم شفيت على عبارة Bon Pasteur فيها ههههه
تتوجهوا نحو اليسار
( كاينة بوابة كبيرة )
اعبروا البوابة وامشيوا في الطريق
تلقاو باب فيه "أدراج" جاي على يسار الطريق
اطلعوا فيه وادخلوا

تفضلوا، هادي صورة حاولت باه نتفكر المكان ههههه
وحددت الطريق كما تذكّرتها



تقابلكم بعيدا شويا سبورة فيها المكان اللي يوجهوكم ليه باه تسجلوا
كاين تاع الطب - الصيدلة - طب الأسنان

أنا رايحة نحكيلكم على الطب
واللي راح وسجل في الباقيين له الحرية يتكلّم عما رأى وسمع ههههههه


تروحوا على يسار الأدراج اللي طلعتوا فيهم باعتبار أنكم دخلتوا لأول مرة
(نتمنى فهمتو هاد العبارة)

تلقاو قائمة فيها الأسماء تاع الطلبة اللي قبلوهم طب
رقم البكالوريا تاعهم، وواحد الرقم هكا
(لازم تحفظوووه)
نحبّ نقوللكم باللي القائمة مرتبة حسب الأحرف الأبجدية اللاتينية للألقاب
باه يسهل عليكم البحث عن اسمكم
لأني بحثت على اسمي وقريب مالقييتوش
(( بالعربية، مافهمتش أسكو الترتيب حسب رقم البكالوريا أو الاسم أو اللقب ههههه ))

الرقم اللي هدرتلكم عليه واللي لازم تحفظوه مكتوب بالشكل التالي
M14/000
في بلاصة الأصفار تلقاو الرقم تاعكم
أحفظوووه .. أكرر .. أحفظوووه !

مبعد تهبطوا في أدراج أخرى جاية على مقربة من القائمة المعلقة
عند نهاية الأدراج كاين باب خشبي
ممكن إذا رحتوا باكرا تلقاوه مغلق والغاشي مكووفر ههههه
كي يتحل
تلقاو باللي دخلتو إلى قاعة محاضرات ولا ماعلاباليش كيفاه يسميوها ههههههه
المهم فيها كراسااا بزاففففف

هاهي صورة موضّحة


في المدخل تاعها يعطيوكم نسختين لذلك ننصحكم تديوا معاكم قلم للكتابة
وماتخافوش أنكم تغلطوا في ملئها فهم سيزودونكم بأخرى جديدة إن كان ضروريا

وهذه صورة للاستمارة

وهنا في هذا الرد شرح لكيفية ملئها
https://djelfa.info/vb/showpost.php?p...1&postcount=20

ورايحة نمدّلكم بعض النصائح باه تتجنّبوا البهادل اللي طحت فيهم أنا ههههههه

- الاستمارة تملأ باللغتين : العربية والفرنسية
- تملؤا كلا النسختين اللتان تعطيان لكم الثانية ليست للاستعمال في حالة الخطأ

كي تخلصوا يوزعوا عليكم استمارة أخرى خاصة بالضمان الاجتماعي
هاد الاستمارة تملأ من الأمام فقط
ويوجد جزء في الصفحة رقم 3 من الاستمارة لأنها مضاعفة
تملؤوه وتمضيوا


هذه صورة كذلك للاستمارة


توزع عليكم ورقة تصريح شرفي بأنكم لم تسجلوا من قبل في الكلية
تملؤوه كذلك .. سواء بالفرنسية أو العربية
وتمضييوا

هاهو التصريح


أخيرا
يطلب منكمم أن ترفقوا هذه الوثائق بمجموعة من الوثائق اللي تكونوا جبتوها معاكم
وننصحكم جيبوها قبل ماتروحوا لأنو المكان تقريبا مافيه والووو
حنا شطنا باه جبنا الطوابع للأظرفة
(كاين فوتوغراف للي ماعندوش الصور ولكن بما أني درت هاد الموضوع
لازم واحد ماينسى حاجة من اللي قراو الموضوع)

الوثائق المطلوبة في ملف التسجيل

- (3) شهادات ميلاد (لا أدري إن كانت الاصلية مطلوبة)
- (5) صور شمسية مكتوب عليها الاسم واللقب والرقم هذاك اللي قلتلكم أحفظوه
(من الخلف طبعا) وجيبوا معاكم صورة سادسة ستطلب منكم فيما بعد وترد إليكم في نفس الوقت
- (2) نسخ عن ورقة التوجيه التي تطبع من الموقع (لا يشترط أن تكون مصادق عليها)
(الذي لم يستطع طبعها، فيمكنه طبها مي قاعة الانترنت الموجودة في الكلية، شفتهم بعيني يدخلولا للموقع ويطبعوهم)
- كشف النقاط الأصلي (واللي هو بعد شهادة البكالوريا، ولا داعي أنكم تديروا الشهادة تلك التي لونها أصفر ووردي، لأنها غير ضرورية البتة رأيتهم بعيني يردوهالهم كيما يدفعوا الملف) ونسخة عنه مصادق عليها
- (3) أظرفة عليها الطوابع وعنوان الطالب
يقدروا يطلبوا منكم 2 فقط ولكن في مرحلة قادمة من مراحل التسجيل توجد من تطلب منك 3 أظرفة
لذلك تحسبا اديوا 3

وفقط

إييييه نسيييت

يعطيوكم ظرفين كبيرين بلون بنّي
تملؤوهم تاني

هادي صورة لهما



مبعد

تجي مرحلة أخرى من التسجيل في نفس القاعة
وهي مرحلة التأكد من الملفات (وهنا يتم توجيهكم في حالة نقص في الملف تاعكم أو زيادة في الملفا فترد لكم الوثيقة الزائدة)
تتم هذه المرحلة بشيء من النظام بحيث "تكوفروا" على مجموعة العمال اللي يقوموا بمراقبة ملفاتكم
واللي قاعدين في طاولة مثل "لجنة التحكيم"
(نتمنى تكونا قريتوها مثلما تقولها هاديك تاع الحان وشباب هههه)
بعبارة أخرى : تديروا لاشان بالكراسا هههههههههههه، ونخليهالكم مفاجأة
كي تروحوا تسجلوا تفهمووا


المهم كي تخلصوا
يتم توجيهم إلى قاعة أخرى يسميوها "قاعة الانترنت"
يقولولكم هوما أون فوغنسي "La salle Internet" هههههه

هيا أنا تعبت دركا
نخليكم تكتبوا شوي ردود وشوي تساؤلات حتى نزيد نكتب في رد جديد المرحلة الثانية من التسجيل



سلام عليكم

يتبع ...

[نعمة القدوس]

مرحبا مرة أخرى

راني جيت نكمّل رحلة العذاب اللي عشتها اليوم

بالصح والله مغامرة ملييحة

واين وصلنا ؟

هيه هيه تفكرت .. وصلنا كيما يتأكدولكم من الملف تاعكم
قلنا توقفوا عند لجنة التحكيم
وتعطيوهم الملف تاعكم يتأكدو منو ويحطوهولكم في أحد الأظرفة
ويوجهوكم لقاعة الانترنت

وايني قاعة الانترنت هادي ؟
يعني لا ماعرفتوش أسألوا برك
الغاشي كامل ينعتلكم
والله
ماخاب من استشار

المهم تروحوا منين قاعدين يسجلوا تاع الصيدلة وطب الاسنان
على ما آظن (والله نسيت)

المهم تلقاو أدراج ضيقين شوي
تطلعوا فيهم ومبعد تمشيوا بجهة اليمين ثم تلقاو طلعة نحو اليسار
تقابلكم فيها هادي قاعة الانترنت

تدخلوا فيها وحدكم
مايدخلوش معاكم الأولياء لأنها صغيرة والغاشي فيها
المهم تكملوا فيها لاشان تاع الكراسا
حتى تجي دالتكم باه تروحوا تسلكوا فيها حقوق التسجيل اللي هي بالمناسبة
200 دينار بالتمامم
واللي تتم في قاعة "الحجز" هكدا اسمها

كي تدخلوا كذلك تلقاوا لاشان تاع الكراسا ههههههههههه
تكمّلوها قاعدين حتى تجي دالتكم وتسلكوا حقوق التسجيل تاعكم

كي توصل دالتكم تروحوا تقعدوا عند الراجل في المكتب
تعطيوه أحد الأظرفة باه يهز منها المعلومات تاعكم ولا يقدر يسألكم فقط

المهم كي تسلكوا وتخلصوا يعطيكم الوصل تاع السلاك

هاهو الوصل اللي عطاوهولي
صورتوا كي كنت قاعدة نستنى



مبعد تخرجوا من قاعة الحجز هاديك وتروحوا لقاعة أخرى جاية منين كنتوا قاعدين مدايرين لاشان
ماعرفتش كيفاه نوصف المكان تاعها ولكن راكم تشوفوا إخوانكم يدخلوا ليها قبلكم
سما ماتخافوشش

حلّوا عينيكم مليييح وودنييكم
وماش رايحين تضييعوا
واسألوا ماتهابووشش !

كي تزيدوا تدخلوا لهاديك القاعة نفس الشي
لاشااان هههههههههه

المهم نوصفلكم القاعة هاديك شوي

جاية شويا كبيرة
كي تدخلوا تشوفوا قدامكم الكراسي المصفوفة اللي تقعدوا فيها
وفي الحواف تاع القاعة كاينين الميكروات
(الميكروات شاعلين للي يحب يستخرج بيان التوجيه
شفت بزاف من اللي خرجولهم البيان)

وكاين في آخر القاعة (على يساركم عندما تدخلون إليها)
مكاتب فيها الناس الذين ياخدوا عنكم الملفات
وكاين زوج يخدمولكم البطاقة (البادج)

على فكرة البادج هذا قاعد زي لاكارت شيفا ههههه
كي عطاوهالي حسييت بروحي كبرت هههههههههههههههههه

وأنتم تنتظرون دوركم
يجي واحد يقوللكم أعطيوني صورة تاعكم
أعطيوه صورة إضافية
يعني الصورة رقم 6 وماتعطيوهش واحدة من الملف
لأنو يخدملكم بيها البادج ويرجعهالكم
المهم اكتبوا فيها - وكل الصور الخمسة- اسمكم ولقبكم والرقم الغريب هاداك

واعطيوهالوا

كي توصل دالتكم عند المكاتب هادوك
روحوا واعطيوهم الملف

المهم الملاحظة اللي نقوللكم عليها هي حول "الأظرفة"
نظن قلتها من قبل
بالصح في الإعادة إفادة

لأنو يقولولك في البداية 2 أظرفة
ومبعد كي تروحوا لهاد المكتب يقولولك هات ظرف ثالث
أنا ماكانش عندي قالتلي ماعليش
بالصح اللي كان عندو حكمتو عليه
معناتها إذا قادرين تجيبو واحد ثالث جيبوه
واللي ماش قادر مايتعبش نفسو

الموظف اللي تعطيه الملف تاعك يقوم بترتيبه في الظرفين الكبيرين
الشي اللي شفيت عليه وقدرت نلاحظو هو أنهم

في الظرف 1

يحطوا :
- كشف النقاط الأصلي
- شهادة التوجيه
- 3 صور بالاك
- والأظرفة

في الظرف 2
يحطوا :
- نسخة مصادق عليها لكشف النقاط
- شهادة التوجيه
- الظرف الثالث
- 2 صور

ومبعد يقولولك أبقى تنتظر حتى تدي البادج تاعك
نبقاوا ننتظروا

ننتظروا ننتظروا حتى يعيطوا على اسامينا ونروحوا نجيبو البادج
في البداية بقينا واقفين
ومبعد بالاك غضناهم جابلونا الكراسا

مسكين واحد جاب الكرسي
سع أنا رحت قعدتلو فيه (حطيتو مع العمال وكي طلع راسو ضهر تلميذ هههههه)
المهم ماحبييتش ننوض (ماحبيتش نكمل في الاحساس بالتبهديلة)
خليتو هو اللي راح
وقف شوي ومبعد لقى بلاصة

نطلب السماح على الملأ هههههههه من هاد الانسان !

المهم
مبعد une fois تدي البادج تاعك يقولولك توجه للإدارة
l'administration
تزيدوا تطلعوا .. حنا دانا واحد الموظف
المهم اسألوا برك ينعتولكم واين

هذه صورة لمكان الإدارة
(لكان غلطت ولا حاجة صححولي)


تدخلولها تلقاو واحد الدخلة على اليمين
وكاين 3 مكاتب

واحد جاي على اليمين في غرفة منفصلة
جاي في غرفة اسمها "مكتب الانخراط المركزي" ولا حاجة قريبة لهاد الاسم

ومكتبين جايين فالغرفة الكبيرة

واحد جاي على اليمين ويتكون من 3 مكاتب
واحد للصيدلة وواحد لطب الاسنان وواحد للطب
والمكتب الثالث للضمان الاجتماعي

بالصح أنتوما تدخلوا أولا للمكتب اللي في الغرفة
تلقاو زوج مكاتب تاني

واحد مع الدخلة يتكون كذلك من 3 للتخصصات الثلاث
والآخر فيه زوج رجال يخدموا خدمة واحدة


المهم في المكتب الأول تقعدوا
وتمدولهم الملفين
يخدموا خدمتهم بيهم
والله ماشفيت واش داروا بيهم
لأنو المراة اللي هدرت معايا قالتلي أنت جيتي من قبل
قلتلها لالا
قالتلي سبحان الله .. حتى كنتي لابسة نفس اللبسة هههههههه
خوفتنييي !!!

من التخمام ماركزتش واش كانت تخدم
المهم كان راجل معاها مانعرف واش خرّج من الملفات ولا بالاك تأكد منهم ولا مانعرف عليه

المهم نشفى غير عطاتني ملف واحد وحكمت الآخر
قالتها تحكموه ؟
قالتلي هيه .. قوليلوا باي باي هههههههههههه

وعطاتني 2 صور اللي كانو في أحد الملفات باه نمدهم للرجال اللي في المكتب الثاني
ومبعد قالتلي باه نمضي في واحد السجل

مضيت ومضيتُ نحو المكتب الآخر
أين عطيتهم الصورتين ورقمي باه جبدوا واحد الكارطونة بيضا
ومبعد قصوا الصور تاعي باه تجي قد المكان المناسب لها ولصقوهم في الكارطونة
وهذاك الراجل يقوللي درك نحط الطابع فوق وجهك فالتصويرة هههههه
وأنا نقوللو نوورمال حط على روحك

ومبعد قاللي واش بيك خايفة
قلتلو مانيش خايفة


والله ماعلابالي أسكو كدبت ولا صح ماكنتش خايفة هههههههه

المهم الموظفين كامل يهدروا معاكم باه ماتخافوش
ويضحكوا معاكم .. نورمال خلاص !

مبعد يعطيكم الكارطونة وتخرجوا من الغرفة هاديك
وتروحوا للمكتب الثاني

هاهي الكارطونة


تمدوا الملف تاعكم للموظف (كانت مرأة)
وهي تتولى كتابة المعلومات على واحد الكارطونة صفراء بالنسبة لطلبة الطب
وبالاك وردية ولا برتقالية نسيت لطلبة طب الأسنان وخضراء بالاك لطلبة الصيدلة
وتلصق صورة مع الأوراق تاع الملف وصورة تحطها في المكان المخصص في الكارطونة

خلاصة : الكارطونة الصفراء هي الملف تاعكم
مطوية على النصف وفيها يحطوا الأوراق تاعكم

ومبعد خلاص
تنوضوا من عندها وتتوجهوا لآخر مكتب اللي هو تاع الضمان
تعطيوه الكارطونة البيضاء وورقة الضمان اللي هوما آخر الأوراق اللي يبقاو عندكم
ومبعد يقوللكم اكتبوا اسمكم وتاريخ الميلاد تاعكم والاختيار تاعكم في وحد القائمة
ومبعد نسيت واش دار
لأني كنت نشغل بالغاشي ههههههههههه (نقرعج)

آآه هييه

سكانا الكارطونات البيضاء تاعنا ورجعهملنا
ومبعد خلاص

قاللنا روحوا للونفي 2

هبطنا للونفي 2 هذا ولتم اكتشفنا أنو يتم دفع ملف المنحة
ولأنو ماكانش عندي الملف كاملا
اضطررت باه نروح نروّح

لذلك هنا تنتهي الرحلة تاعي معاكم

أهم ما نقوللكم هو أنو الراجل اللي يحكم الملف تاع المنحة قاعد يمد في أوراق فيهم النوامر
باه تحكموا الرونديفوات تاعكم
لأنو في هذاك الوقت كانت 12 ونص
وقاللنا باللي رايحين يعاودوا يحلّوا على الواحدة والنصف
بالاك علابيها يمد فالنوامر

وسألتوا لكان نلقدر نجيب ملف المنحة في أي وقت من الاسبوع هذا
قاللي نعم
قاللي أرواحي في أي وقت ادفعي الملف تاعك

وفقط

انتهينا من الكلام

نمتنى نكون أفدتكم ولو بالقليل

تحبوا تسألوا .. اتفضلوا
رايحة نجاوبكم بما أستطيع

وربي يوفقكم
وان شاء الله نلتقي قريبا هناك في الكلية =)

سلاممم

[رنيم الجزائر]

جزيت كل خير على مجهوداتك اختي نعمة

افدتينا كثرا بارك الله فيك

☺☺☺☺

[سارق الأحزان]

محجوووز ههه

مشكككورة على الموضووع

( مي ملييحة لي دااو معااهم الشهادة باش يسجلو بيها يعجبوووني )

[قابضة على الجمر]

بارك الله فيك نعمة لكن احكيلهم شويا على المعاناة باش ما يتشوكاوش مساكن .........انا كرهت الطب و قسنطينة و سيرتهم من التعب اللي شفتو اليوم

[biba_g]

رغم ان الموضوع غير موجه لي بتاتا الا انني قراته من الاول الى الاخر وكلي اهتمامْ هه..
.
..
موفقونْ

[DTInfo]

ماهي فائدة الموضوع؟ o_O

[biba_g]

ماهي فائدة الموضوع؟

بونسواغْ

1/ اللي مايعرفش وينْ يسجل كلش واضحْ
2/ اللي يسكن بعيد مش راح يتعب كي يوصلْ.
3/ اللي ناقصاتو وثيقة يديرها.
4/اللي خلعان تروحلو الخلعة.
5/ صاحبة الموضوع ناس ملاح بوجودها فقط تحس روحك لباسْ

..............الخْ

[سارق الأحزان]

المشاركة الأصلية كتبت بواسطة dtinfo

ماهي فائدة الموضوع؟ o_o

باينة درت تخصص فلسفة

[قابضة على الجمر]

الموضوع يستفيد منه الاخوة ال=ين سيسجلون في الايام القادمة ماشاء الله الاخت اعطتهم تفاصيل تقلل عليهم التعب كثيييييرا

[إِلْيَآسُ اَلْمَكَآرِمْ]

هل وثيقة الاستمارة تملا بالعربية والفرنسية معا او بلغة واحدة فقط وان كانت باللغتين كيفاه الي يدير الي مايعرفش فرونسي ؟؟؟؟

[.زَيْنْ الْدِيِنْ.]

سلامــ ..
بصحتك ،، تهنيتي ،،،
ليوم كنت ف قسنطينة و جيت للشالي استرجعت ذكريات العام الماضي و اول يوم من رمضان
لمهم ،،
هاذيك قاعة المحاضرات اللي ضيفوكم فيها اسمها l'auditorium و راح يفتحوها غير للضياف هه أما المدرجات اللي راح تقراو فيهم ،، فماهمش بعاد بززاف علا هاذاك الدروج اللي فالدخلة خخخ ...
بالنسبة للغار الايمن ماننصحكش بيه ،، الايسر خير منو ،، فالشتاء و تعرفي علاه راني نقولك ههه ...
هاذيك la salle d'internet معرووفة باسم l'annexe ....
ماحكيتيش عال cafette ... اللي جاية فالvirage اللي مع الدخلة ... و تحتها بعد جاي المطعم ....
،، ليزا و الأبناء السبعة هههه ، ماشفتهمش اليوم مي ،، راح تشوفوهم باذن الله ،،
علا كل حآآآل شفتوو الشالي كيفاش داير ،، مي والله راح تفوتو فيه أيام رووعة
^___^

[قابضة على الجمر]

المشاركة الأصلية كتبت بواسطة m-charaf

هل وثيقة الاستمارة تملا بالعربية والفرنسية معا او بلغة واحدة فقط وان كانت باللغتين كيفاه الي يدير الي مايعرفش فرونسي ؟؟؟؟

واحدة بالعربية و الاخرى بالفرنسية

[softy]

- (2) نسخ عن ورقة التوجيه التي تطبع من الموقع (لا يشترط أن تكون مصادق عليها)

اختي علاه زوج ماش وحدى برك للي نخرجوها ؟؟

[فوزان 96]

شكرا اخت نعمة القدوس على المعلومات الرائعة
انا شخصيا استفدت