الحقووووونيييي

simou19 · 2014-07-23, 18:33

مساء الخير شطورات المنتدى واش راكم ان شاء الله تكونو كامل لاباس
اليوم وبما انو العيد ان شاء الله قرب ان شاء الله نعقبوه بالصحة والهناء وربي يتقبل منا ان شاء الله
وبعد معاناة طويلة في رحلة البحث عن الحلوة الذهبية لي دامت قرابت اسبوع في ولاية سطيف وما جاورها اخيييييييييييييييييييييييييييييييييييييييييييييييي ييييييرا لقيتهم البارح كيما نحوس عليهم كيما نتاع المبدعة ام رامي لي خدمت بيهم قاطو مول التاج دايما نلقا غير الفضي وانا حبيت نطبق الدرس شكل ومضمون
إمالا شمرت على ذرعيا وقلت ليوم نخرجو كيما نتاعها بديت نطبق في الوصفة حرفيا وفرحانة بيه طيبتو جا هاااااااااايل هش ولونه يشهي وانا راني نطل على التواقي ونزغرت قلت ليوم يخلطو بيني وبين المبدعة ام رامي :mh3 وكي وصلت لمرحلة لقلاصاج ذوبت الشيكولا السوداء في حمام مائي واضفتاها الزيت والكاكاو وهي تبرقلي في عينيييييييها هنا الهدوء يعم المنزل في إنتضار الصاااعقة دهنت المول بالشيكولا بالبانسو وهنا بدئت اشتم رائحة الانهزام تعم ارجاء البيت انا ندهن وهيا تزحلقلي في النص ماحبتش كامل تغطيلي الحبة تاع المول وانا في هذه الا ثناء بدات افقد اعصابي ومعنوياتي تتزحلق كيما الشيكولاطة درجة درجة مافهمتش السبب ومن بعد قررت اني نعمل اخر محاولة ونحطها في الثلاجة نشوفها كيفاه تجي وانا مستعجلة على النتيجة حطيتها في المجمد كي خرجتها لقيتها لاصقة في المول وشهبة شهبة تقول ماهي هية لي كانت تبرقلي في عينييها كي كانت تذوب مع اني شريت النوعية الجيدة مافهمتش السبب طوووووووول حطيت من يدي وجيت نجري لحبوباتي تاع المنتدى قلت غير هوما لي يسلكونيييييييييييييييييييييي راني تاكلة عليكم انقذوووووووووووووووووووووووووني صح فطوركم

تجويد4 · 2014-07-23, 21:34

تاسلام عليكم

ممن تكونى كثرتى الزيت فى الشكولة

بما اننى لم اطلع على الوصفة الاصلية ما عرفتشنجاوبك

ان شاء الله يساعدوك الاخوات و اذ ممكن رابط الوصفة الى عملتها

simou19 · 2014-07-23, 23:16

وااااااااااااااااااااااااااااااع ولا رد كيفاه رايحة ندير
راني حاصلة

kika85 · 2014-07-23, 23:37

حبيبتي كنتي تذوبي الشكولاطة وتخليها تبرد شوي من بعد ابداي تدهني لي مول او انك كترتي الزيت...سيي خليها تبردلك شوي وجربي ادهني المول ديالك تكون تماسكت شوي...وهاديك الي ولات لونها باهت ممكن انو الشكولاطة تحرقتلك لازم تذوبيها في حمام مائي...عاودي جربي شكولاطة جديدة ذوبيها وخليها تبرد شوي وادهني بيها وشوفي...انشا الله تنجحلك

لبنى 16 · 2014-07-23, 23:55

السلام عليكم أختي كي تدوبي الشيكولا ما تزيدلها والو لا زيت لا حليب ربي يسهلك .

لحن الحياة. · 2014-07-23, 23:58

انا صرالي كيفك الوغ ذوبت شيكولا بلا ما زدتلها زيت نقص التزحليق و مجرد ما ندهن حفرة نحط فيها حبة و نضغط شوية باش تطلع الشكلاتة للاطراف تاع القاطوة

سمسومة 05 · 2014-07-24, 00:14

جربي ذوبي الشيكولا وحدها وادهني بيها جربي كمية صغيرة وشوفي النتيجة