تدابيري وتحضيراتي لشهر رمضان

fifiarch · 2014-06-29, 00:03

رمضانكم كريم يا رب وكل عام وانتم بالف خير

اليوم حبيت نتقاسم معكم بعض تحضيراتنا الرمضانية للشهر الفضيل

اولا وكالعادة بدينا بعملية التنظيفات

ماخلينا شيء في المطبخ دون تنظيف عميق

قدرت نصورلكم الثلاجة والميكرووند

نظفت الثلاجة مليح وعملتلها بلاستيك جديد

ولانو فصل المشمش عملت القليل من المربى

واكيد عندي ليمون عصرتو وجمدتو نستعملو بسهولة عوض كل مرة نجبد ونعصر

وللمشروبات حضرت الثلج باشكال مختلفة حتى نقتصد الوقت في رمضان

ولانو رمضان هاذ السنة في اوقات جد حارة
حضرت مجموعة من العصائر المركزة بنكهات مختلفة

عصير الليمون

عصير البرتقال

عصير المشمش

عصير الدلاع

عصير الخواخ

وحطيتهم في المجمدة

هذا ايضا اختصار في الوقت حتى نجبد ونخلط برك في ايام رمضان ان شاء الله

وللمرقة الحلوة قطعت بعض التفاح ونظفتو حتى يوم ما نحب نطيبها نستعملو مباشرة ونوفر الوقت

وتانيك اللوبيا الخضراء حضرتها مسبقا

ودرت محاولة في ترقيد الفلفل لانو صراحة نحب النكهة الحامضة فيه

ولوازم الطياب

الثوم والبصل والطماطم ولاشابلير نتاع الخبز جهزتهم تان

فقط البصل والطماطم جهزت كمية تكفي يومين لا اكثر لانهم يفسدو لو يطولو في الثلاجة ميش كيما الثوم يشد روحو

والبهارات اكيد

هاذو نتاع المرقة الحلوة

القرنفل..القرفة مرحية واعواد..نجمة الارض

وحضرت تان البهارات نتاع الطياب للاسف الصورة ضاعتلي

كذلك الجلبانة حطيت في المجمد

هذه تحضيراتي المطبخية للشهر الفضيل

اتعمدت نحضرها لانو في الشهر الكريم نخدم الصباح مع السخانة والتعب حتى نسهل على نفسي وتانك يبقالي الوقت اكثر حتى نخرج من المطبخ ونؤدي واجباتي على افضل وجه

نتمنالكم رمضان كريم ان شاء الله وكل عام وانتم بالف خير

بريق الدجى · 2014-06-29, 00:15

ماشاء الله عليك يا اختي فحلة ونص
بصحتكم و رمضان كريم

ام حمزة22 · 2014-06-29, 06:41

سلااااااااااااااااااااااااام
صباحكم سعيد مليء بالبهجة والفرحة والنشاط والصحة والقدرة على الصيام والدكر والقيام
فيفي انا راني مطبقة غير 2 من هاد الاعمال هي تنضيف التلاجة وتجميد العصير هههههههههه
الله يبااااااااااااااارك عليك وما شاء الله ولا حول ولا قوة الا بالله
بالصحة والهناء صح فطوركم

أم ضياء عبد الرحيم · 2014-06-29, 07:23

ما شاء الله عليك فحلة كلش في القمة تسلم الايادي بالصحة و الهناء
و رمضان مبارك على الجميع

سمراء الدنيا · 2014-06-29, 08:21

رمضان كريم و كل عام و انتم بخير
ماشاء الله اختي فيفي شاطرة بسلامتك ... ويت تحطيتي تشرفي...
شكرا جزيلا على الافكار الرائعة ..

عبد الرحيم80 · 2014-06-29, 08:38

الله يبارك عليك حنونة عجبتني فكرة العصائر بزااف

ام خليل § · 2014-06-29, 09:49

بصحتك ’’’’’ رمضان كريــــــــــــــــــــــــــــــــم

ممكن طريقة العصائر؟؟؟

الأمنيات · 2014-06-29, 10:15

يعطيك الصحه تبارك الله

أم فاطيمة · 2014-06-29, 10:34

تبارك الله ماشاء الله رمضان كريم

شوشو 11 · 2014-06-29, 11:30

الله يبارك اختي
ورمضان مبارك

جويرية الإيمان · 2014-06-29, 11:53

الله يبارك عليك فحلة و نص .

سبحان الله أنا عملت تقريبا كل ما عملت إلا شيئين ربما و هما

العصائر ما نحبهمش خلاص عجوزتي ديما تحضر العصائر بصح أنا ما نحبش نشربهم

و الفلفل المرقد ثاني ما درتوش

التفاح نقيتو و قطعتو و درتو يفور ثواني فقط و خليتو يبرد و إلى المجمد

الثوم رحيتو و زدتلو الملح و الزيت و درتو في بورت مونجي و زدت طبقة نتاع زيت من فوق و إلى المجمد

المونشتو غسلتها مليح و طبختها قيس غلية وحدة و بردتها في الماء البارد و نشفتها و إلى المجمد

الطماطم حب غليتها في الماء و نحيتلها القشور و رحيتها في الروبو و زدت غليتها في كسرونة و خليتها تبرد و درتها حوزات و إلى المجمد .

الحمص طبعا شمختو ليلة و إلى المجمد بدون طياب باش ما تروحلوش البنة اللحم قطعتو و درتو حوزات و إلى المجمد.

هذا مكان و ربي يقدرنا على صيام رمضان إيمانا و احتسابا و أن يتقبل الله منا أعمالنا .

مرام 1987 · 2014-06-29, 13:05

الله يبارك تحضيراتك ممتعة من قبيل وانا نتفرج ونعاود ههههههه
بصحتكم تاكلوهم بالصحة والهنا أن شاء الله

fifiarch · 2014-06-29, 14:05

مساء الخير لبنات ورمضانكم كريم ان شاء الله

الف شكر على التشجيعات بارك الله فيكن

اختي
جويرية الايمان

يعطيك الصحة

انا تان درت كيفك فقط ما غليتش اللوبيا ومافورتش التفاح

خليتو طازج

واكيد الثوم واللحم والحمص كيفك

اما العصائر فكلنا نحبوها على بيها درت كمية معتبرة

اخت ام خليلي بالنسبة للعصائر

عصير الدلاع

ترحي الدلاع بالمكسور مع القليل من السكر وتصفيه ومن بعد تزيديلو ربع الكمية نتاعو سيرو رومان**غرونادين** وتجمديه

عصير المشمش والخوخ

تجيبي الكمية لي تحبيها تنظفيها وتنقيها وتضيفيلها ربع الكمية سكر وربعها ماء وتغليهم مدة 7 الى 10 دقائق وبعدين تخليه يبرد وترحيه بالمكسور وتصفي والى المجمد

عصير الليمون والبرتقال

تقطعي الليمون والبرتقال بقشورهم قطع صغيرة وتنحي منهم القلب لانو يعطي مرارة
وتديري نصف الكمية سكر وربعها ماء وتحطيه يطيب وهنا عينك ميزانك

لما تحسي الليمون طاب وقشورو طابت تنحيه وتخليه يبرد وتمكسيه بالمكسور وتصفي والى المجمد

هاذو العصائر لما تجبدوهم ذوبوهم في الميكرووند واضيفو ليهم كمية ماء وسكر حسب الرغبة

وبصحتكم

ام هاديل وياسين · 2014-06-29, 14:19

الله يبارك تحضيرات هايلة رمضان مبارك

hadjira195 · 2014-06-29, 14:40

الله يبارك عليك عجبتني فكرة العصائر بزااف