افكار من اجل عرضات رمضانية غير متعبة

[chawia fahla]

السلام عليكم اخواتي،،، وش راكم شوي ،،، بدات تحكم الخلعة تاع رمضان ولا مازال كيما تصرا لماما و اختي الكبيرة psk papaيقتلنا بالعرضات في رمضان صحابو خرجوها مودى رمضان يعقبوها غير عرضات .وهاد العام ومع السخانة درنا برنامج نمشيو عليه باه مانتعبوش في رمضان .دك نوريلكم المضمون تاعو وفق بعض الوصفات المعتاد نعملوها في هاد الشهر ابكريم باه منعقبوش نهار كامل في الكوزينة و انما نخصصو اكبر وقت للعبادة و قراءة القران .كنت قريت بعض المواضيع للتحضير لرمضان شهر او شهرين قبل وممكن يساعدكم في الجهة المالية وحتى البدنية ههههه .
نبداو بالسلطة
فيما يخص السلطة الخضرا تقدرو تشريوها من قبل و تغسللوها و تقطروها و تخبيوها في اكياس تاع نيلو بيضا و متقطعوهاش بالموس باه متكحالش و تحطوها فالفريجيدار حتى لمدة اسبوع و كيتحبو تستعملوها حطوها فالما البارد باه تحيا .وبالنسبة لاصوص فينيقرات ديروها ضربة وحدة في قرعة كبيرة و حطوها فالفريجيدار به تجبدو برك وتديو الكمية لي تحبوها .وللمسيدوان ولوردافر طيبو الخضرة ليتحبوها نهار ولا يومين من قبل وغلفوها بالبابي سيلفيريزي اه تعبتني هاد الكلمة ههه و احتفضو بيها بلاما ديرولها لاصوص وادا كان عدد العروضين كبير ديروها في اكواب فردية طريقة مليحة و élégante ...ندن هادا وش ممكن يخص السلطة
الشربة او الجاري
على فكرة حنا في الشرق منديروش الحريرة معندي مننصحكم عليها بصح بالنسبة للشوربة تقدرو توجود صوص تاع طماطم طيبوها و تخبيوه خاصة في الصيف الطماطم تكون مليحة و حلوة تقدرو تشريو كميات كبيرة و تخدموها و تخبيوها للشتاء وشنو نحب نقلكم الجاري حاولو تستعملو الفريك الرقيق رح يعطي بنةهايلة و تخثار الشربة خير من الفريك المرحي خشن وكل واحد واش يحب
متنساوش نحطو في طباسا صغار القارص المقطع ولكاسي و الدبشة ليحب يزيد
الطاجين الحلو
تقدرو توجدوه من قبل مايصرالو والو خليوه يغلى غلية خفيفة و قدموه بصح كيتخبيوه سكرو عليه بته متضربش فيه ريحة الفريجدار
التحلية
وجدوها الصباح ولا ليلة قبل التحليات يحبو الراحة و يحبو يطولو في الثلاجة واختارو التحليات الخفيفة ليماتغهمش
ولحلوى ليترافق التاي b1sur وجدوها منقبل انا نفضل القطايف سواء بحشوة المكسرات و الجوز يجي بنين خير من اللوز ولا بالكرام ياتسيير و شونتيي
وتقدمي المكسرات المملحة وحلوة الترك او الجوزية استعينو شوي بالحوايج الواجدين باه تنقسو عليكم التعب
وفيما يخص البوراك و الاطباق الثانوية اخدمو بالمبدا تاع الحاجة ليمانفسدش نو جدو ها من قبل و متكثروش عليكم بزاف الاطباق واحدمايقدر ياكل في رمضان حنا نخلطو نخلطو و مع الاخر يشربو غير القهوة وياكل السلاطة و يكثرو الماء و القازوز و الباقي يقعد بامانته ليمداير رجيم ولي ليستوما تاعو مريضة ووو و ننصحكم بالتحليات لضيافكم تلقاو استجابة كبيرة في عرضاتنا على خاطر غبر هادوك ليباردين و ينحيو على القلب مثل التيراميسو و موس الشوكولا وشيز كيك ...الخ نتوما و واش تحبو ومتكثروش عليكم ربي ميحبش الاسراف
نشاله تكونو كملتو قريتو الموضوع علابالي طويل بزاف هههه بصح نشاله تكونو ديتو ولو فكرة وحدة جديدة و تعملو بيها وربي يقدرنا على طاعته .
على فكرة راني بديت نجرب في مجموعة من الحلويات للعيد نجربها دك باه ادا عجبتني نديرها في العيد مانيش مستعدة ندال نخلط في السخانة و العطش في القاطو و ممبعد ميصلحليش ونتمنى تقولولنا و شنو هي الحلويات ليراكم رايحين ديروها متخليوش حتى السمانة لخرة تاع رمضان و دوخونا بوصفاتكم الهايلين ومايلقى الواحد مايخير
وسلام حبايبي