كرهت من الدنيا

[مشكلتي]

السلام عليكم راح نحكيلكم حياتي باختصار حتى لا تملوا منها المهم و الله ضاقت بي السبل
أخي أقرب الناس إلي أكرهه .......... أكبر مني كنت سنده في كل شيء كان يخدم و كي نخلص انا نمدلو صدقوني انه وسواس خناس كان يوسوسلي على اخوتي لخرين هذاك داير و هذيك دايرة ووووو المهم قرر يتزوج حبست عليه الدراهم لانو كي قرر يتزوج راه عندو املا.المهم تزوج لا مصروف في الدار لا والو احنا نخدمو عليه حتى زوجتو مخليناش عليها حمام لبسات حتى الذهب مخليتش عليها تروح لعراس ب50 مليون ذهب ووو ملابسها نغسلهملها كلها حتى.......... اكرمكم الله ممبعد حبت دارها راحو يكروا نهار متهنيناش كل يوم عدنا يشتكي الكراء الكهرباء وووووو خطرات يقول ليما رايحين يطردوني من العمل المهم متهنيناش نهار
قعد تقريبا كاري 6 اشهر زوجتو مخلات مهدرت فينا جوعوني دارولي فعلولي والديا سمعوا كلش مادرنا والو سكتنا ممبعد ولات تجي لعدنا نورمال نهدرو معاه كلي ما سمعناش
جاء اليوم اللي حب يرجع احنا محبيناش قلتو انا نخلص الكراء و كلش المهم ارجع بصح معاملتي لها تبدلت عقلية نغسلك حوايجك مكاش تلبسي من عندي والو
المهم ولا هو ما يهدرش معانا حتى والديا ارجعوا معاها وليت نخلي فراشي نروح نخدم و نرجع يما متحوسش حتى ترفدو تغسل لكامل لخاوتي غير انا واختي نشفا العيد رحت نسلم على يما دورت راسها
بالرقية باش رجعت تعاملنا شويا بصح لازم ما تشكيلهاش على العروسة. العروسة اللي دارت العقيقة لحفيدتنا و محضرتش يما لانو ما قلتلهاش راحت لناس و قالتلهم يمات راجلي شوفو واش قالت فيكم حتى حكمو يما بهدتلتنا و مع هذيك دايرتها خير من بناتها
عندي زوج خاوتي في العسكر كي يجو يروحلها لشمبرتها هي الاولى يشرولها و يجيبولها الهدايا ووووو معاديين يما يغيبو ب 6 اشهر نهار يجو يروحولها و ينساو يماهم
هذو انا ربيتهم و انا كسيتهم و شريتلهم نقلع من روحي و نمدلهم خيري ارجع قاع ليها ولات هي عينهم المهم الله يسهل
عندها 3 سنين كي رجعو معانا كل ما نفوت تغلق الباب في وجهي نقنط في دارنا و مذلولة لا يما و لا بابا صدقوني راني نعاني تغيضني عمري نقري تلاميذ رجال يحترموني الناس كامل و هي لا نيفو لا والو ذالتني في دارنا حتى..........راجلها يديرلي نفس الشيء متقولوليش سند ظهري و صلة رحم صدقوني ايلا خرجت من هذي الدار منرجعش حتى و تصرا موت في الدار نكرهو الخير اللي درتو فيه .........
المهم قاتلها يما راكي تغلقي عليها الباب قاتلها ان شاء الله يجيبها في اولادي ايلا صح منها
خايفة ربي يستجب و انا والله ان شاء الله ربي ما يتقبلي لا صلاة و لا صوم من اول نهار في حياتي الى اخرها ان شاء يلعني كما لعن ابليس ايلا انا راني نكذب
مليت كرهت تخيلو ولا بابا يحوس يزوجنا بسيف باش يبقى مع وليدونهار كنا صغار و الخطاب يجونا كان يتشرط لازم قاري و دارو وهذاك باباه واعر لازم يسكنك وحدك ووووووووو وذوك ارخس الناس اللي يجي يجي يجري و كلو امل باش نقبل
حسبي الله ونعم الوكيييييييييييييييييييييييييييييييييييييييييييييي يييييييييييييييييييييييييييييييييييييييييييييييييي ييل في اللي درت فيه الخير و في زوجتو من الغرفة منخرجش خطرات نجمع صلواتي باش نتوضا وضوء واحد باش منفوتش عليها و تستفزني لوكان نهدر معاه على بالي بابا يدير روحو مرض و يما طلعلها الضغط ووووووو مالقيتش كفاه ندير لوكان بابا سهلي لوكان راني باولادي و دوك حاب يدمرني وين جات واش درنالو احنا النساء الرجال مدروهلوش بصح يموت فيهم و قدام الناس يقول بناتي يما اللي تطلبها بالملاين جبناهلها وليدها يعطيلها 20 الف في العام تبقى غير تهدر فيها ما عندنا الزهر في الوالدين
نتمنى ان شاء الله نخرج من هذي الدنيا نهائيا قدامهم نتمنى بابا يزور قبري لانو الحاجة الوحيدة اللي تشفي غليلي من المعاناة اللي راني فيها اللي هو سببها بالدرجة الاولى
اسمحولي ايلا طولت عليكم

[مياسم الصمت]

السلام عليكم ورحمة الله وبركاته

يا أختي صدقيني احس بك و أصدقك فيما تقولين

لأنه فعلا في مجتمعنا الذكوري قد يحدث هكذا و أكثر في بعض العائلات

ربي يصلح حالك يا أختي ويرزقك الزوج الصالح والذرية الصالحة يا رب

[أميرة البستان]

معليش حنونة ومام حنايا رانا كيفك حنا بلا عروسة وكلشي وكل واحد مشاكلو انا نقلك شوفي واحد باغي يتزوج ويهنيك منهم كامل وافرحي وديحي دمعتك غير عليه اوكي حنونة والله غير غضتيني ربي معاك وديما قولي حسبنا الله ونعم الوكيل ولي يعرف معناها معناه يخاف ربي

[السيدة اسيا]

كاين بزاف عباد كيما هكااا انا نعرف قريبة لينا هوما 5 بنات وزوج دراري كامل متزوجين البنات يضلو رايحين جايين مساكن يخدمو و يطيبو و يغسلو و شغل بلا مزيتهم اللقمة يحطولهم البايتة و ولادهم ما يحملوهمش مالقري مربيين ...و النساب ماشاء الله القضية و المعاملة الحسنة و الفواياجات الي روتور لوكان يمرض واحد من والدين نساهم يباتو نايضين...اما الدراري راقدين ف العسل نساهم فالطالعة و الحابطة يسبو في الام و هوما يتفرجو و الاغرب الحاجة المليحة كامل تروح ليهم وولادهم الكساوي و الالعاب ووووو... يعني اصبري ختي و خلي ايمانك بربي كبير يمهل و لا يهمل

[تراتيـل صبــح]

السلام عليكم ورحمة الله وبركاته
للأسف يا أختي هذه هي الدنيا
والخير في وقتنا هذا صار ابتلاء
يعني تعملي الخير وربي يبتليك هل تصبري أو لا
وأيضاً هل تقولي أنا درت وعملت وو والا لا
الحل الوحيد هو الصبر والتجاهل
واذا استفزتكِ ديري روحك ماسمعتيش
واذا حسيتي روحك رايحة تجاوبي تنفسي بعمق وابتعدي
الابتعاد عن أهلك ليس الحل
الحل أنك ماتعبريهاش وتستمتعي بوقتك مع والديك وتحاولي ترضيهم
اليوم راهم معاك غدوة الله أعلم - وهذه سنة الحياة-
الزواج ليس بالغصب أختي والرأي رأيك فالأخير
يعني إن لم يعجبكِ من تقدم فلا دعي للخوف قولي لا
حتى يأتي الانسان المناسب
ولا ترمي نفسكِ بعيدا عن المشاكل عبر الزواج فربما تجدين نفسك فمشاكل أكثر منها
ربما أنتِ أكبر مني لكن فهمت أن عائلتكِ تهتم كثيراً بالماديات
لذلك استعملي هذا الجانب لكسب والديك واهلك لكِ
لا تضري نفسكِ لكن بعض الأمور تستحق أن نتعب للحصول عليها
وطبعاً سيأتي يوم ويستعرفوا بالخطأ
لكن لا تنتظري ذلك اليوم اعملي لمستقبلك وتذكري والديكِ ثم والديك
لكن اخوتك أيضا حاولي تحسين علاقتك معهم
وأكثر شيء نفسيتك
حاولي تحسنيها
وتفاءلي يأتيك الخير
كان الله في عونك.

[KAYO]

حاسة بيك يا ختي انا نوصيك تسي تكسبي والديك و خاوتك و تصرفي كيما كنت من قبل ما تجي , انتي هي مولات الدار متخليهاش تلغي وجودك و عيشي ياماتك معا والديك لابس يجي نهار و تفارقيهم ربي يفرج عليك اختي بزوج يكون هو بابك و خاوتك و كل شي في حياتك

[مبروكة الصحراء]

السلام عليكم أختي الكريمة هناك الكثير و الكثير من هذه الحالات ايييييييييه خلينا منحكوش خير
المهم الشي لي بغيت نقولك هاذو والديك انت مش مرت خوك يعني عندك حق فيهم كيما اخوتك لي بغى يبغي و لا يكره
يعني حتى لو يعاملوك بقسوة ابلعيها ديريها مور ظهرك و لا تخنقتي بكي بينك بين روحك و ماطلعيش انتي العيب
حتى مع خوك و مرته تحاشييييييهم ديريهم ماكانش يديرولك عفسة بلعاني باش يضروك انت ديري الحاجة لي تنارفيهم ديري روحك ماشفتيهمش ديري روحك ماتفهميش
هكذا تريحي روحك شوي و صدقيييييييييني كل خير درتيه و راكي حاساتو خسارة فيهم لاااااا تلقيه لأن الخير في سبيل الله أولا و يبقالك في رصيدك ماتخافيش حتى إذا نساوه و لا مستعرفوش بيه
بالعكس الخير لي ديريه في الناس لي يعاملوك و لي مايستاهلوش كيما نقولو حنا بالعكس أصعب و أحسن
و الخير و الدراهم لي تصرفيهم على داركم اعتبريهم صدقة و صدقة الأهل و الأقارب عندها جزاء كبير
وربي وصانا على الوالدين مهما كانت صفتهم ماواصاناش غير على الوالدين لي يعاملونا مليح يعني والديك بيقو والديك مهما دارو معاك يستحق منك الاحترام و الحب مهما كرهوك حبيهم هذه طاعة الله
أما الزواج فنوصيك اصبري ربي يفرج عليك و كل ماتصرالك حاجة و لا تتقلقي قولي زوج جمل نوصيك بيهم "أستغفر الله" و الحمد لله" صدقيني ربي يفرج عليك اختي
و كان الله في العون

[مليحة العرب]

اللي في الوسع مشي كيما اللي ف الضيق
حسبنا الله و نعم الوكيل حاسة بيك اختي مليون بالمية
علاه ولّاو الوالدين هاك ؟
ما يقدرش الاب يصرخ و يقول هادو بناتي من لحمي و دمي كيفكم و ولايا ؟؟
ما تقدرش الام تحكي كلمة الحق هما اللي جابوها ولا هي اللي جابتهم ؟
علاش نحسو بالغربة و حنا مع اقرب الناس لينا حكما؟؟؟
علاه و علاه ؟؟؟ اسئلة من دون اجابات ..
la roue tourne
الله يسهلك وو يرزقك بالانسان الصالح عن قريب يا رب

[- بصمة خير -]

ربي يفرج همك و يسر أمورك

واصلي الدعاء و الله يرزقك الزوج الصالح

[amina260]

السلام عليكم ورحمة الله وبركاته\اختي كاينة وحتى احنا صرات عندنا في عائلة كبير بين خالتي وجدتي
ربي يهديها ويبعدها عليكويبعد شرها عليك
متقلقيش روحك وقولي حسبي الله ونعم الوكيل مارسي حياتك عادي اخدمي على روحك صلي ودوري في دارك وكيما قالك المثل السوري طنش تعش تنتعش يعني مديرهاش في بالك خلاااااااااص وهي تعيا ما تخرب فيك وديرلك في لي جاست يجي نهار لي تكره وتنحط في الارض وان شاء الله ربي يجيبلك وليد الحلال لي تعيش معاه حياتك وتتهني في بلاك
بصح ننصحك حاجة والديييييييييييييك مهما يديرولك متغلطيش معاهم على جالها باسكو هي مهي خاسرة والو
والخييييييير لي درتيه فيهم عند ربي تلقيه العرب معندهم ما يديرو
ربي يهنيك ويريح باآآآآآآآآآلك يارب

[بنت لبحر]

ربي يكون في عونك اختي

و راكي قلتي كلمة واحدة خير من الف كلمة حسبي الله و نعم الوكيل هادي تكفيهم

[عبد الله 22]

الله يلطف بك ويرزق الزوج الصالح

[ABDOU ELE]

الســـــــــلام عليكم

رزقك الله الزوج الصالح........كبري بالك و ادعي الله ان يطرق بابك ابن الحلال

[بسمة تنتظر فرحة]

السلام عليكم ورحمة الله وبركاته
فرج الله همك اختي تألمت لحالك كثيراا
وأدعو الله بصدق أن يزيل عنك الهم
فقط احتسبي أنت في ابتلاء
تمسكي بحبل الله ولن تخيبي باذنه تعالى
أوصيك بكثرة الاستغفار والذكر لا تستهيني ابدا والله يا أختي ستجدين الراحة والاطمئنان بكثرة الاستغفار
صدقة السر تصدقي ولو بالقليل
ثم الدعاء ولا تملي دعائك بصدق سوف يستجاب في يوم ما قريب باذن الله
لقوله تعالى: (أدعوني استجب لكم )

هذا وعد رب العالمين
ربي يفرج عليك بالزوج الصالح الذي ينسيك ألمك هذا
ويقذف الرحمة وبصيرة القلب في قلبيي والديك
اللهم آميــــــــــــــــــــــن

[lمنال]

اكثري من الاستغفار اختي ربي يفرج عليكي ان شاء الله