للزوالي.............دولمة اقتصادية و البنة ممممممممممممم

[أم تيم الله]

السلام عليكم اخواتي
اليوم جبتلكم دولمة اقتصادية سهلة و بنينة
نبداو على بركة الله بالمقادير:للحشو:
- نص صدر دجاج بدون جلدة أو عظام.
- نص ربطة معدنوس مقطعة رقيق

- تقريبا من 4 إلى 5 مغارف روز طايب.
- قدر مغرف و نص ماكلة بصلة مبشورة .
- من 3 الى 4 سنات ثوم مربيين.
- توابل: ملح ، فلفل أسود .
- بيضة.
- 5 حبات بطاطا متوسطين، 5 حبات كوسا متوسطة.
نرحي المكونات نتاعنا الكل في الروبو و بعد ما ننزعها نضيف البيضة كاملة و نخلط و نحطها بجنب.

للمرق: بصلة متوسطة مبشورة + 4 سنات ثوم مبشورين+ توابل: ملح ، فلفل أسود، على راس المغرف الصغيرة سكنجبير و عرق أصفر مرطبين + عود قرفة صغير+ رند+ عظام الدجاج+ حمص منقوع و طايب في الماء+ نص جوا فلفل حار للي يحب الحر+ زيت أو سمن
و نقلي كلشي على النار

نحفر الكوسا نتاعي و البطاطا بحذر و نعمرهم بالحشو و نقليهم في شوية زيت


هنا قبل منقليهم

هنا بعد ما قليتهم

على فكرة الحشو لي قعد درت بيه كفتة/ المهم المرق نتاعي نخليه يتقلى مليح و من بعد نمرقو بكمية مليحة ماهي بزاف و ماهي قليلة نخليها تغلي شوية و نلوح المحاشي نتاعي بعد منثقبهم بالكيردون و هذا شكل الطبق النهائي اللي ماجيت نصورو حت لقيت أبو تيم كلا نصو

أرجو اني نكون مطولتش عليكم و بالصحة و الهنا ان شاء الله و دعوة خير ليا و لزوجي بالذرية الصالحة و الهنا و الصحة تكفيني

[أم تيم الله]

التعب هذا الكل و ماكانش تقييم وينكم يا أحبائي

اممممممممممممممممم يشهييييييييييييييييييييييي يسلموو حبيبتي على الوصفة ساعات نجي نحشي الجريوات بالجاج لكن نخاف من طعمه خخخخخ
معاك تشجعت يبان اممممممممممممممممممممم ربي يجازيك ويحفظلك اولادك ويسخرلك زوجك ياااااااااارب

[أم إناس]

ماشاء الله اكيد لذيذة
بارك الله فيك على الوصفه

[طهراوي ياسين]

ماشاء الله ...

[sabrina1979]

يااطيك الصحة اختي وربي اخليلك تيم

[louli2007]

baraka allaho fik

yaw jawwa3tini

[مرام 1987]

يعطيك الصحة طبقك أكييييييد بنين

[ام محمد78]

يعطيك الصحه

[أم تيم الله]

المشاركة الأصلية كتبت بواسطة sabrina1979

يااطيك الصحة اختي وربي اخليلك تيم

الله يسلمك أختي و بالنسبة لابني تيم راه الآن طير من طيور الجنة ان شاء الله فرحني غير 4 أيام و توفى ادعيلي ربي يعوضني أنا و زوجي....

[أم تيم الله]

شكرا ليكم الكل على المرور العطر الكريم

[om loujayne]

ماشاء الله.....ربي يزيدك من فضلوا و يحفظلك صحتك.....رووووعة

[أميرة الورووود]

يعطيك الصحة ربي يحفظك أختي

[إكليل]

أممممممممممممم ما شاء الله روعة سلمت يداك

[نيفرتيتي.]

هااااايلة انا كي نديرها نقلي البطاطا فارغة وبع نعمرها اما الكورجات فكرة مليحة كي نقلوها لانها طايبة في المرقة ماتتكلش