تليتلي في الفرن وبطريقتي

[zahra30]

وان شاء الله تكونو كامل بخييير

سمحيلي حبيبتي ام يسرا طولت عليك الله غالب النت كانت مقطوعة وكي رجعت ثقالت بالسيف ماكتبت الموضوع وبلا ما نطول عليكم نبداو باسم الله

اولا نحضر التليتلي ديري الكمية اللي بغيتيها في شوية زيت و في مقلى وتجمريه وبعد ما يتجمر وهو هكذاك في المقلى زيدي عليه كمية من الماء وعندك لا تتحرقي نحيه على النار وزيدي وكي ييتشرب قطريه وخليه بجهة .

ثانيا نحضرو صوص بيضاء يعني بصلة وثوم ودجاج وحبة طماطم ( تقدري تستغناي عليها ) ملح زيت فلفل اسود راس

الحانوت كسبر معدنوس فلفل اخضر حمص انا ماكانش حاضر ( بطاطا وجزر انا ما درتهمش في الصوص اولادي ما يكلهاليش امالا الجزر اقليتو والبطاطا حطيتها دوائر من الفوق وطابت وتحمرت في الفرن ) كي يتقلاو مليح مرقي بصح ما تكثريش الماء قد ما يطيبو نص طياب ويبقالك قيس كاس صوص .

ثالثا وجدي الصينية حطي التيلتلي وزيدي فوقو الصوص ثم البطاطا واللحم وغطيه بالالمنيوم والى الفرن حتى تشوفي باللي تشرب هذيك الصوص ونحي الالمنيوم باش يتحمرو.

وفي الاخير قدميه وزيني الصحن انتاعك بواش عندك انا درت البيض والجزر مقلي فلفل مرقد ولا مقلي ولا مفور وووو الصور توضح اكثر

وان شاء الله يعجبكم وتجربوه

دعوة خير تكفيني