اللي حابة تتعلم الخياطة تدخل

takwaaa · 2014-05-12, 22:16

السلام عليكم
شفت بزاف منكم حابين يتعلموا الخياطة و الله حاجة مليحة تهني حتى من روحها الوحدة ما تبقاش لاحقة ورا الخياطات
عندي نصائح ليكم من خلال تجاربي
اول حاجة لازم تكونو حابين هاد الحاجة على خاطر حبكم ليها هو اللي يخليكم تتعلموا
ثاني حاجة لازم تجربو ما كانش منها تتعلموا و انتم مكتفين يديكم و غير تقرو و تشوفو و مش طبقوا
و بش تتعلمو اللي عندها قندور قديمة بش طيشها تفتقها و تفصلها و تخيطها لطفلة صغيرة و الا بدليلها المودال انا هك كنت ندير لقشي لي نكره منها نبدلها و كي عدت متمكنة من الخياطة عدت نشري قماش و نخيط،و لخياطة للبنوتات الصغار ممتعة و تعلم و بشوية بشوية ابدي خيطي قنادرك تاع الدار و تاع لعراس خليه للخياطات حتى تتعلمي و تعودي تخيطي قشك الكل وحدك
كاين قداه طريقة بش تفصلي
اسهل طريقة هي تحطي قندورتك على لقماش و تبعي هكا بديت انا و مع الوقت بديت نتشجع و نكتشف عدت نهز لقياس و........
كاين اللي يفصلوا بالشبر و كاين اللي يفصلو بالكارلاج و كاين بالميترة و كاين بالباترون انا جربت كلش الا الباترون مادرتوش
هاد النصيحة مهمة اي حاجة قديمة بش طيشيها سروال شميز قندورة .....اي حاجة فتقيها من 0 و حديها و خليها باترون كي تحتاجيها خرجيها حطيها فوق لقماش و فصلي طريقة ساااااااااااااااهلة و مريحة
اما لخياطة ساهلة اخر مرحلة و كي تكون فصالتك صحيحة لخياطة تجيك ساهلة غير ما تحطي الحاشية مع الحاشية و تخيطي.
انا ما دخلت تعلمت ما والو التجارب هي اللي علمتني و كي تغلطي ما تتقلقيش اذا ما غلطتيش ما تتعلميش و قلبي الحاجة و شوفيها بش تعرفي كيفاه ادارت و كي تتعلمي راكي تعودي تشوفي الحاجة من بعيد تفهميلها من ورا خبرتك
ان شاء الله نكون خفيفة ظل عليكم و افدتكم و اللي تحتاج مساعدة راني هنا الا اذا ما لحقتش الله غالب
شكرا لكم

بصيرة2 · 2014-05-13, 07:38

يعطيك الصحة وكل كلامك صحيح

فايزة1207 · 2014-05-13, 07:47

كلام من ذهب ربي يحفظك عجبتني هاذ الجملة
هاد النصيحة مهمة اي حاجة قديمة بش طيشيها سروال شميز قندورة .....اي حاجة فتقيها من 0 و حديها و خليها باترون كي تحتاجيها خرجيها حطيها فوق لقماش و فصلي طريقة ساااااااااااااااهلة و مريحة

~ لؤلؤة مسلمة ~ · 2014-05-13, 07:54

جزاك الله خيرا تقوى
و الله نصائح مهمة جدا لاي مبتدئة
انا تاني حابة نتعلم ا لخياطة لكن الوقت هو الي ماعنديش
ان شاء الله في هده العطلة راح نجرب ليا و لبنتي
جعلها الله في موازين حسناتك

ام هاديل وياسين · 2014-05-13, 08:03

بارك الله فيك

om meriem · 2014-05-13, 08:07

بارك الله فيك

R I A D · 2014-05-13, 08:27

يعطيك الصحة تقوى

تسنيم مسلمة · 2014-05-13, 08:32

بارك الله فيك

اسم مرا · 2014-05-13, 08:44

استاذة راني غير نتبع فيك ههههههههههههههههههههههههههههه

kaouka · 2014-05-13, 10:15

Merci oustada hada houwa sah nchaallah nt3almo manak

الوردةالجورية · 2014-05-13, 10:16

كلامك صحيح 100 % بالمئة وانشاء الله رايحة انطبق كلامك

_nassima_ · 2014-05-13, 11:01

شكرا لك رانا نكرهو في العطلة و مادابينا نتعلمو انا نحب التصميم بصح منعرفش الفصالة

takwaaa · 2014-05-13, 11:03

الحمدالله كي شفت اسمك يا اسم مرا وينو تطبيقك الهدرة ساهلة و علابالي راكي تشوفي ف مواضيعي حابة نشوف تطبيييييييييقك .
ان شاء الله نفيدكم و اللي تحتاج حاجة تقلي و ان شاء الله نعاونها و ما تنسوش اهم حاجة في الخياطة هي المماااااااااااااااااااااااااااارسة اهم من اي خطوة و كل حاجة تخيطيها تتعلمي فيها حاجة و وقت ما تحبو قولولي نحطلكم موضوع الخياطة نخيطو هاديك القطعة اللي فصلناها خيطو حتى فطرف صغير يجي لبوبية المهم تتعلمو و شكرااااا

farawla01 · 2014-05-13, 12:08

يعطيك الصحة بارك الله فيك

أم فاطيمة · 2014-05-13, 12:23

جزاك الله خيرا و ربي يزيدك من فضل
ومن فضلك اريد مساعدة فيما يخص المشينة
عندي ماشينة سانجربيدال كانت مليحة و ظرك كي نخيط بيها خيط الابرة ما يحكمش
مليح يبان غير خيط طويل و من تحت لخياطة مليحة ادا كانت عنك فكرة ممكن تجاوبيني