الا كرامتي ...... انا مقهورة من خطيبي

[مشكلتي]

السلام عليكم
اولا اريد ان اعتذر مسبقا لان موضوعي سيكون طويلا قليلا فانا لم اجد لمن افضفض ولمن افتح قلبي
تعبت كثيرا وليس لي بعد الله الا انتم ....فلا تبخلوا عليا بالنصيحة والمشورة .. او حتى الدعم النفسي
كونوا لي الصدر الحنون .... واجركم على الله فرجوا همي فرج الله همومكم

لن اطيل وراح ادخل في الموضوع
انا فتاة عمري 25 سنة جميلة ومؤدبة وخلوقة ومحبوبة جدا من الجميع والحمد لله.
كانت حياتي بسيطة وسعيدة مع اسرتي الصغيرة ...وكنت ارى الحياة جميلة وهادئة ...حتى اني كنت استغرب كثيرا من شكاوي الناس ...ففي رعاية والديا كمنت دائما اقول لا شئ يستحق كل هذا سهلها تسهال وكلشي بالمكتوب ونهايتها موت ولي كتبو ربي مرحبا المهم عندي ربي امي وابي واخوتي
كنت متفوقة جدا في دراستي .... كانت حياتي عبارة عن علاقتي مع ربي اهلي ودراستي ...هذا كل ماكنت اعرف عن الدنيا وكنت في قمة سعادتي
كنت اعرف بقوة شخصيتي ....حيث كان ابي يقول عني اني انا هو ابنه الذكر (نحن بنات فقط)
المهم اكملت دراستي وتخصصت في ميداني
في القسم الذي اعمل فيه كان هناك زميل كان الاعزب الوحيد في القسم وكان محط اعجاب الجميل لما كان يملك من مواصفات جمالية واخلاقية ...لا انكر انني اعجبت به قليلا في البداية ثم تهربت ورفضت الموضوع وكل هذا بيني وبين نفسي وقلت ان في القسم العديد من الزميلات لا يمكن ان يكون من نصيبي خاصة مع خجلي هذا ...المهم نسيت الموضوع وكان كل شيء عادي .....
كانت جميع زميلاتي تحاولن التقرب منه ولفت انتباهو كل واحدة بطريقتها ....وكان هو تاني كل مرة يحاول استمالة واحدة منا ثم يغير للاخرى وكانة كان يدرس فينا الواحدة تلوى الاخرى ...هوما كانو يمشيولو فلحكاية ...يعني يعطيولو وجه حتى انهم احيانا كانو يحكيو في مواضيع بالنسبة لي اراها مواضيع لا تجوز للنقاش ( انا احب الجمال ...انا افضل الممثل الفلاني ...الفيلم الفلاني .....لماذا لم تتزوجن ......) يعني كان داخص شوي عليهم رغم انوا من المفروض يخلي شوي حدود ....
انا كنت كل مرة يكون فيه نقاش كيما هاك اما نسكت او نغادر المكان .... كنت اهتم بعملي بشوشة محبوبة الكل يمدح في اخلاقي وفي نفس الوقت مانيش فرفاطة ولا داخصة
في نهاية العام احسست باهتمتمه الزائد بي فقد كان يتصل بي كثيرا على اساس انو يطمئن على الدراسة ويعرض اي خدمة او مساعدة ...بصفته من المشرفين على دراستنا
بعد الامتحان نجحت وكنت الاولى في دفعتي والحمد لله....بعدها بشهر اتصل عليا واعترف لي برغبته في الارتباط بي
فوجاة وقتها وانتابني احساس غريب مزيج من الفرح والخوف اعطاني دقيقتين للتفكير وانا طلبت اسبوع
بعد الاسبوع اتصل عليا واخبرته عن ترددي وخوفي من الموضوع واني لا اعرف عنه شيئا ولا اعرف كيف ساتعرف عليه
هو اقترح ان نتحدث مدة للتعارف وقال لي انا اخذت وقتي وفكرت ودرست وقررت ومتاكد من قراري وانت خذي وقتك كما تشائين
بعد 03. اشهر جاء لخطبتي وتمت الخطبة ( ولكني فوجأت فلم تاتي ولا واحدة من خوتاتو وهوما 4 جات امو ومرت خوه ) المهم فاتت عادي وانخطبنا وكانت فرحتي لا توصف وفقد كنت قد احببته كثيرا فهو كان رقيقا معي وحنونا ورومنسيا جدا
كان مستعجلا في الزواج قالي ديسمبر 2013 ووافقته على هذا فانا ابي الحبيب كان مصابا بالسرطان وكانت حالته شبه ميؤوس منها وصحته تتدهور وكنت اتمنى الزواج في حياته ليفرح بي وليطمئن عليا فنحن بناته كنا همه الكبير خاصة بسسبب علاقتنا اللسيئة بالعائله بسبب الغيرة ...يعني معندنا حتى واحد وكان ديما يخاف يموت ويخلينا
كانت اختي الكبرى على وشك الولادة فقلت له ان نأجل العرس حتى تلد ... بصح هو زعف زعفا كبيرة وقالي تمسخرتي بيا انا هكذا برنامجي اكل تعطل لوكان دريت هكذا كنت مزال مخطبتش حتان تزيد اختك هذا ماشي عذر ( مع ان الموضوع ماشي عام قضية شهر ولا زوج ) المهم خاصمني مدة قالي لوكان الاحسن رحت نحوس في اسبانيا هكذا ماربحتها والو ....بعد اسبوع مكلمنيش فيه رحت انا صالحتو وتصالحنا قالي حتى انا نستنا اختي حتان تزيدفي افريل2014 ( يعني بدل الشهر صارو 4 شهور) قتلو كيما تحب وهذا اكل بيني وبينو مافكرش طول يجي يحكي مع ابي هذي هدرت رجال وانا كي الغبية مفرضتش احترام اهلي عليه كنت نطاوعو في كلشي كيما يحب نخافو يزعف وهو زعافو صعيب كنت نحبو بزاف
وكل مانقولو روح احكي مع بابا يقولي هيه لازم هاني نروح !!!!ومايروحش قالي انا نقوللك وانت تقوليلهم
هو دائما كان يعبرلي على حبو ليا ويكون حنين معايا وانا كنت مبينتلو بلي نموت عليه ومانقدرش نخليه وان حبي ليه حب غير مشروط يعني نقبلو بمحاسنو ومساوؤوا بصح هو ديما يقولي ماكانش حب غير مشروط دائما الحب مشروط يعني انا نحبك بصح نحب تتحسني في حوايج كيما نحب انا ،( ومنحبكش تسماني طول .....الخ....)
كان يقولي انا علبالي بلي كنت راح تقبليني وعلابالي بلي كنت نعجبك من قبل .....هو انسان مغرور ومعجب بروحو مثقف جدا ( اكبر مني 10سنوات) ودائما ينقص من قيمتي ويحاول يبينلي اني مانيش مثقفة واني مانيش عصرية
احيانا نحسو يحبني ويخاف عليا ويغار عليا من الريح واحيانا نحسوا يحاول يذلني وكانو متأكد اني نحبو ومنخليهش
وفي كل مكالمة لازم يسقسيني اذا كنت نحبو ولا لالا !!!!
كان في وقت من الاوقات جد قريب مني ويحسسني بحبو واهتمتمو واحيانا يخاصمني بدون سبب ويتجاهلني بالايام مع اننا في نفس مكان العمل حتان نروح انا وبستفسر اذا درت حاجة زعفاتو سعات يعطيني سبب جد تافه وسعات يقولي هكذا برك مكان والو انت خاطيا مع انو يكون متغير غير معايا انا في الخدمة اكل معاهم عادي .....وانا في كل مرة نروح ونستفسر ونعاتبوا ونقولو عود فهمني ما تزيدش دير معايا هكذا منحبش نشوفك زعفان ....وهو يفرح ونتصالحوا
في يوم قتلو مكتا نديرو الفاتحة زعف مني وعيط عليا وقالي انت ماتفهميش يخي قتلك انا هدرتي منبدلهاش على جالت حتى واحد وقتلل نديروها شهر قبل العرس يعني شهر بلا مايدير قدر لحتى واحد هو يقرر وحنا نفذوا...... انا زعفت كيعاد عيط عليا وقلت خليه هو يراضيني بصح هو ماسقساش عليا طول ويتجاهلني حتان رحت انا وعاتبتوا ومن بعد راضيتو
ونهار سقسيتوا على شهر العسل زعف مني وقالي انت ماتراعيش وهكذا تحرجيني كان من المفروض تقوليلي المهم نكون معاك وانا ما عنديش ....دارلي حكاية وانا غير سقسيتو برك ...قالي تمنيت لوكان مسقسيتينيش وانت مادية !!!!!!
انا راضيتو واعتذرت وقلت لم اقصد .... و بصعوبة رضى
وهكذا مرة عادي ومرات يزعف و يخاصمني بدون سبب
والاسوء انو كان يستهزا بمشاعري يعني مرة كنا قاعدين ساكتين قالي احكي قتلو مالقيتش واش نقول قالي امالا نعيط لصاحبي نحكي معاه خير هو يحكي خير منك ،....وفعلا عيطلو في وجهي وكي كنت راح نوض قالي هيااقعدي بركاي وانا قعدت وقلت ندير روحي زعفت مي هو ماداهاش فيا طول وقعد يلعب بالموبيل وكي قتلو انا نروح قالي باي
الفرق بيني وبينو هو انا كي نحس برك بلي راهو زعفان نتصل عليه نستفسر اذا كنت زعفتو بلا ما ننتبه ونعتذر ونراضيه بصح هو حتى كي يكون متأكد اني زعفانة يخليني وميراضينيش وبعد ايام نروح انا نحكي معاه وهو يقولي كنت نحسب حبيتي تبعدي شوي محبيتش نقلقك مع انو سعات باينا راني زعفانة من حاجة ويقولي الحب ماهوش ثابت مرة يزيد مرة ينقص
مرض ابي مرض شديد وهو وقف معايا ومخلانيش ومات ابي رحمه الله كان موته كالصاعقة اضلمت الدنيا في وجهي تحطمت بالكامل وكان هو سندي كان يحدثني بالهاتف
في اليوم الثاني جاءت امه فقط للعزاء لا اباه ولا اخوته ولا اخواته جات وحدها وقعدت يا ربي عشر دقائق وراحت وماجابو والو احنا عندنا عيب لازم النساب يجيبو الضيفة انا والله بالنسبة ليا متهمنيش الماديات بصح تبهديلا قدام لافامي خاصة هوما ميحبوناش وديما يعسونا ...انا بنات عمامي اكل جاو امالين رجالتهم يعزيوهم في دارنا مات عمهم حتي لي مخطوبات كيفي برك الا انا يالي مات ابي وماجاتني حتى وحدا من خواتاتو (انا اصلا نعرف 2 برك )
كي خلصنا يمات لعزا هدر معايا قتلو غاضني الحال من خواتاتك على الاقل تيليفون ....انا قتلو هكذا هو تحول وقالي هذو خواتاتي ودارنا مادقيسيهمش وانا نشتيهم قتلو ماقتلكش اكرهم انا برك فرغت قلبي وحكيت لراجلي وين المشكل قالي اذا حبيتي ديريلهم كيما دارولك بصح انا ماتهدريليش قتلو انا راح نحترمهم على خاطر نحبك يعني على وجهك قالي ذرك نخليك ترتاحي راكي تعبانة ومحكاش معايا 5ايام
وكان احيانا يشريلي الغداء وديما يعاودلي لازم تخلصيل شي مرة حتان خلصتلو وهو رضى
وكان كي يعيطلي وميكونش عندي رصيد ونبيبيلو ونقولو عاودلي يقولي هذيك بكري قبل ماتقبلي .... وسعات نقولو بتمسخير افليكسيل يقولي تحلمي وعلاه انتوما النساء ديما لازم عندكم الراجل لي يمد و يصرف .... مرة انا مرة انت ....
احيانا يعبر عن حبو ليا امام الجميع واحيانا يحرجني قدامهم حتان نبان غبية !!!!
نجي للمشكل الاخير انا كنت متفقة معاه انا نشري parure على جالت الفاتحة وهو اعطاني المبلغ ( كان قليل قتلو الذهب غالي ....ناض كلاني وقالي انا هكذا قتلك من الاول وهدرتي مانبدلهاش كي يصرا لي يصرا اذا ماكفاوكش هتيلي انا نلقالك...رغم ان حالتو والله جيدة ...والاخ زعف وطبعا انا رضيتو )....بعد شهر من وفات ابي انا قتلو ماما في العدة وماعنديش مع من نشري ....هاك خليهم عندك وهيا نشري معاك ..... تصورو هو عدهم قدامي وقالي يمكن ناقصين وغلط في لحساب وقالي شفتي كنت راح تهفيني انا عاودت عديتهم قدامو وخرجوا كاملين وقتلوا ان هذا ماهوش تصرف واني غاضبة ولكن هو ضحك وقالي انا نحبهم وهوما عزاز عليا....تصورو وماحاولش حتى يراضيني ...و رفض بشدة يروح معايا وقالي نعطي ليماه وهي تشريلي وانا ماعرضتش ،...... وفجأة الاخ تبدل وزعف رجع جدي جدا .... انا قتلو نروح راح الحال وهو معتاد يودعني بلطف ويقولي كلام لطيف .... ولكن هو جلس ساكت انا خرجت وبعد لحظات عدت قتلو مانرضاش على زعلك وهو جاملني .... يعني من المفروض انا يالي نزعف !!!!!!
وبعدها 20يوم وهو يعاملني بجفاء كبير ويتحاشاني وميعيطليش مع انو كان يعيطلي تقريبا كل يوم حتى انها كانت عندي مداومة معاه 24.. ساعة بدلها تصورو انا قتلوا راك زعفان قالي لالا قتلوا يخي غير الخير قالي عندي شغل في الدار على هذا بدلتها ....ويتحاشا حتى يشوف معايا ...وانا هاذ المرة قلت ماغلطش ومانراضيهش ولي يصرا يصرا ..... ولكن تصوروا سمعت في الخدمة بلي راح يخرج عطلة وماقاليش ....وفي الاسبوع لي فات عيطلي رحت سقسانس اشيا عامة ببرود وانا جاوبت قد السؤال وقعدنا ساكتين ساعة حتان استأذنت ورحت وماقاليش على العطلة!!!!!
واليوم نروح ونتفاجأ بلي العطلة بدات اليوم ....(انا متاكدة راح يروح لاوروبا تحواس).... حسيت بالاهانة وحسيت روحي تافهة وماعندي حتى قيمة ....حسيت حاجة تكسرت فيا .....انصدمت !!!!!!
وعرفت بلي هو غدوا جاي يدي حوايجوا ( العطلة10ايام).....يعني احتمال غدوا يلعب روحوا راح يقولي
ارجوكم ....مارأيكم في خطيبي ....
نكمل معاه ولا هذا راح يعذبني ....صراحة نحسوا حقار وقاسي جدا ( هو اعترفلي مرة وقالي انا" راني قاسي ....حتى امي هكذا تقولي"....)
اعترف اني احبه رغم كل شيء ولكن لا استطيح ان اخسر كرامتي
يعني هو ماهموش نزعف ولا نبطل كيشغل يحوس عليها !!!!!!
والله انا حائرة وقلبي يتفتت وعيني لا تتوقف من ذرف الدموح فجرح ابي لم يبرد (40 يوم فقط ) وهو لم يراعي هذا .....
افيدوني ساعدوني انا دائما استخير ....
ماذا افعل غدا ان جاء وتحدث معي .... ام ابدأ انا واواجهه
انا في حيرة .....
الكل يحسدني عليه وانا اتعذب .....لا استطيع ان اكمل هكذا احس بالذل وباني افقد احترام نفسي ....واخاف ان اخسره فانا احبه

[سليم-عادل]

ما جيت نكمل القصة حتى راحولي الأفكار... لكن يا أختي الكريمة اذا كنت مع ربي مليحة راح يكتبلك غير الخير ... هذا الراجل بكل بساطة عندو عقلية شويا صعيبة اذا كنتي ما تتحمليش عقليتو قبل الزواج فإن عقليتو بعد الزواج تكون اصعب دوبل ... لأن والله نفس القصة صرات لمرت خويا وراهي تعيش في هم من عقليتو الصعيبة ... ربي يكون في عونك

[فـرح]

شوفي أول حاجة راكم دخصتو على بعضاكم بزااااااف قبل الزواج ، وهادي هي النتيجة
ومادام ما درتوش الفاتحة نرومالمون ما تخرجوا مع بعضاكم ما تهدروا ما لازمش تكونوا وحدكم خلاص .
وزيد انت يا اختي اللي ذليتي روحك اسمحيلي ، بصح تظلي تحاولي فيه ، كي تغلطي اطلبي السماح ، بصح كي يغلط معاك لاه تروحي تطلبي منو السماح؟ كيفاه يحس روحو بلي غلط مالا؟ راهو والف فيك يا اختي ورجع يتحكم فيك كيما يحب هو ومش مدايرلك اعتبار لانك انت ما درتيش لروحك قيمة قدامو ، ورايح يزيد أكثر وأكثر ف يالمستقبل
انت لازملك تبدلي عقليتك معاه قبل قبل ما قبلش ربي يسهل عليه .. هادا الخطوبة برك كرهلك حياتك ؟ فما بالك بعد الزواج ؟
انا ما نيش نحطم فيك بصح نهدرلك الواقع
وما تقوليش خلاص نحبو ومنقدرش نعيش بلا بيه .. خلي حب الله عزوجل هو المسيطر على قلبك ..
وربي يقدملك اللي فيه الخير
زيدي صلي استخارة ولاكان مش مريحك يا اخيت ما تكمليش معاه احسن

[nihale89]

يا اختي لازم تمدي لروحك قيمة الراجل مايحبش المرا الي تحط من روحها
بزااااف
لازم تكون عندك ثقة في نفسك بلي ماخصك والو و100 راجل يستناو
كي يجي يحكي معاك هزي روحك واذا تقلق ومازادش حكا معاك ما تحكيش
حتان يرجعلك اعفسي فوق قلبك
واذا مارجعش اعرفي بلي راهو يدير في المشاكل باه تبطلي
وهذا الي راني حاساتو بغا يبطل وحاب تكوني انت السبب
وزيد شكلو يحب التغيير من كثرة العلاقات يعني ماقدرش يثبت على مراة واحد
راني مانيش نقلب فيك عليه بصح لازم تاخذي حذرك هذا زواج عمر ماوش يومين
ودايما لازم تمدي ثقة لنفسكوما تذليش روحك

[ايمان ايمانو]

من خلال القصة تاعك انت ولفتيه كل ما يزعف تراضيه علاه خليه هو يراضيك قالك ناس زمان " راجلك على ما ولفتيه و وليدك على ما ربيتيه "
في راي ما تعيتيلوش حتى هو يعيطلك و شوفي الموقف التاعو و صلي صلاة الاستخارة ، وان شاء الله يفتح عليك و يوفقك ,

[h_hakima08]

اختي العزيزة رايي بالمختصر المفيد ان هذا الراجل راح يتعبك بزاف مانقولكش اخطيه بصح لازم تعاودي تردي الاعتبار لنفسك
والا راح يحقرك من بعد وتعيشي مقهورة طول عمرك معاه وهذي مش حاجة ساهلة صعيب اي وحدة تتحمل الحقرة طول العمر
عاودي حساباتك مليح قبل فوات الاوان مازالت عندك فرصة

[amine eco]

كنت اتمنى ان تختصري قصة في كلمتين افضل

بنسبة للحالتك ارى كثير من بنات يبحثن عن زواج من مكان عملهن كأن مكاش رجال غير تم

كان جميل بين صديقاتنا وكانت كل وحدة تخمم فيه و هو كان يخمم واش يخير و المشكل بدأ من هنا انت بديتي تشوفي حاجة كبير كي قيموه وانت بديت تبانيلو صغيرة

انصحك بالايتعاد عن هذا الشخص المفروش لان هدرة لي يهدر فيها تاع جياح دائما راجل يصرف خخخخ

كوني امرأة ذات شخصية ونفسية قوية

[جويرية الإيمان]

هذا الشيئ الكل صاير فيك و تقولي عندك شخصية قوية ؟؟؟

اسمحيلي اختي راكي ذليتي روحك بزاف بزاف .

الراجل راه يحقر فيك و انت تقوليلو نحبك و زيد تراضي فيه

علاه ؟ كاين غير هو في الدنيا .مالا غدوة واش يدير فيك كي تتزوجو .

يا مخلوقة فيقي لعمرك و حطي النقاط على الحروف ديري إعادة هيكلة لعلاقتكم .

مش غير يقلك كلمة حنينة بعد ما تراضيه انت تروحي فيها .لالا يا لحبيبة

الخطوبة حاجة و الزواج حاجة أخرى.

اختي صرالها كيما انت مع خطيبها تصوري نهار كانت معاه و راحت تشري في جريدة ب 10 دج

ماحبش هو يخلصها و خلصتها اختي .10 دج مش 100 دج أو 1000 دج.

و حاجات أخرى تقريبا كيما انت و بعدها ما تحملاتوش و بطلت و كان باقي على العرس 15 يوم .

نصيحتي حطي النقاط على الحروف من الآن .

و ربي يرحم والدك و يجعله من أهل الجنة إن شاء الله .

[بنت لبحر]

وعليكم السلام و رحمة الله تعالى و بركاته

اولا حاجة ربي يعطيكم الصبر و ربي يرحم باباك و يجعلو في الفردوس الاعلى


اختي ربي يكون في عونك
انت لي وصلتي روحك لهدا الموحال يعني كل ما يزعف ترضيه حتى هو لي غالط هو دركا ديجا حاسب روحو حاجة لبنات كامل عليه و هو من بينهم خيرك انت يعني بالنسبة ليه حاجة مليحة ليك انو اختارك من بين المعجبات تاعو و انت كملتيها بدلالك و كي راكي ترضي فيه .كون عاملتيه كيما عاملك هو كون لقيتيه هو لي يجري وراك ماشي هو هو يحوس على شيىء مختلف لي يقولو لا
و من جيهة اخرى باش منضلموهش بالاك هدا هو الكراكثار تاعو يعني مخدوم هكا


ايا اختي ديري كرامة لروحك باش يديرهالك هو

استخيري ربي هو لي ينورلك طريقك و لا فيه خير ربي يقدمو و الا ما فيهش ربي يبعدو عليك


يبقى مجرد راي

[حمـ السلام ـمة]

غاليتي لم اجد ماذا اقول بعد النصائح القيمة التي قدمها لك الاخوة و الاخوات
لا وجود لحب بدون احترام
اللي يحبك يحترمك
الأفضل أن تقرري الآن إما ان يحترمك و يقدرك و تواصلي المشوار معه أو انهي كل شيء

انظري حولك
كل من لا يحترمها زوجها هي السبب
هي من اهانت نفسها حتى اصبح يحتقرها

وواضح كما قالت احدى الاخوات انه يبحث عن الاعذار ليفسخ الخطوبة
و من يدري
ربما خطبك لانه رآك صعبة المنال سابقا

أما أن الجميع يحسدنك عليه
اتركيه لهن

انا شخصيا كنت رافضة فكرة الزواج من احد زملائي لما فيها من مشاكل

بعد الزواج سيجعلك تغيرين من زميلاتك
بحيث سيهينك امامهن عادي

اذا في فترة الخطوبة يهينك قدامهم ..واش تنتظري بعد الزواج؟؟


قرري الآن
حب+كرامة
أو
لا حب و لا كرامة

تعاملي معه بأدب و ضعي الحروف على النقاط و قولي له ما تحبين و ما تكرهين
قبل
جيد
لم يقبل الله يسهلو و الله يسهلك

الزواج
مودة و رحمة و احترام و حب و خوف على الطرف الاخر..الخ

الزواج رجولة و مروءة
نعم تكون مشاكل
نعم تحدث مشادات
نعم يخطئ كلا الطرفين

لكن ان يدوس طرف على الطرف الآخر و بعقلية صبيانية تافهة فهذا لا معنى له و الضحية هم الأبناء غالبا

لا تهيني نفسك أكثر.
من لا يحترمك و لا يحترم اهلك ليس برجل.
ربي يسعدك حبيبتي

[bellaluna]

أختي حكايتك تشيب الرّأس...
من وجهة نظري هذه علاقة فاشلة من بدايتها و إكمالها يعني الذلّ و المهانة مدى الحياة و لما لا العنف اللّفظي و الجسدي لاحقا.
نصيحتي أن تدعيه يسافر و لا تقابليه قبل السّفر، اجمعي أدباشه و افسخي خطبتك عند رجوعه و لا تعودي له عندما يسمعك كلمتين حلوتين..ستجدين من يحبّك و يقدّرك كامراة و ليس كجارية رخيصة و لكِ القرار النّهائي.

[fadiafofo]

المشاركة الأصلية كتبت بواسطة سمية قسنطينة

شوفي أول حاجة راكم دخصتو على بعضاكم بزااااااف قبل الزواج ، وهادي هي النتيجة

المشاركة الأصلية كتبت بواسطة سمية قسنطينة

ومادام ما درتوش الفاتحة نرومالمون ما تخرجوا مع بعضاكم ما تهدروا ما لازمش تكونوا وحدكم خلاص .
وزيد انت يا اختي اللي ذليتي روحك اسمحيلي ، بصح تظلي تحاولي فيه ، كي تغلطي اطلبي السماح ، بصح كي يغلط معاك لاه تروحي تطلبي منو السماح؟ كيفاه يحس روحو بلي غلط مالا؟ راهو والف فيك يا اختي ورجع يتحكم فيك كيما يحب هو ومش مدايرلك اعتبار لانك انت ما درتيش لروحك قيمة قدامو ، ورايح يزيد أكثر وأكثر ف يالمستقبل
انت لازملك تبدلي عقليتك معاه قبل قبل ما قبلش ربي يسهل عليه .. هادا الخطوبة برك كرهلك حياتك ؟ فما بالك بعد الزواج ؟
انا ما نيش نحطم فيك بصح نهدرلك الواقع
وما تقوليش خلاص نحبو ومنقدرش نعيش بلا بيه .. خلي حب الله عزوجل هو المسيطر على قلبك ..
وربي يقدملك اللي فيه الخير
زيدي صلي استخارة ولاكان مش مريحك يا اخيت ما تكمليش معاه احسن

عندك حق يا اختي

لازم تبدلي العقلية مايصلحش تذلي روحك في كل مرة
صحيح كاين رجال يذلوا المراة و مايعتبروهاش عبد
لكككككككككككن المراة كيان و انسان رقيق و مالازملش يستغلو حنانها و طيبة قلبها

وانت لازم توريلو العين الحمراء مع الاول باش يحتارمك و يعرف قيمتك
يعني ثقلي روحك شوي ماتقوليش على كلش هيه هيه ارفضي ابدي رايك مايصلحش يتحكم فيك من ضرك
و علبالنا تحبيه بصح مهما كان كرامتك اولى اذا ماصلحتلكش مع هذا تصلحلك مع واحد خلاف يكون يحتارمك و يقدر قيمتك و يديرك ممو عينيه
و يدير المتحيل على جالتك

و ربي يعاونك و لي كتبو ربي هو الي فيه الخير

اتمنى لك كل خيير

[سومية88]

ياختي تقريبا مريت بنفس مشكلتك وفي الاخير كان الفراق انصحك يكون قرارك بعقلك وليس بقلبك

[kamilia-1997]

انا مع الاعضاء انت لي ذليتي نفسك و ننصحك حبسي انت العلاقة معه قبل ما يحبسها هو
خلي شخصيتك قوية و اقتنعي بلي قلبك غالي و ثمين و هذا مايستهلوش فعلا كيما قالو الاهتمام الزائد بشخص يجعله يعتقد نفسه سي فلان
و في الاخير انصحك بصلاة الاستخارة و ربي يرحم بباك و يجعل مثواه الجنة

[حمـ السلام ـمة]

اتمنى ان تتفاعلي مع ردودنا اختي
ناقشينا
لتستفيدي اكثر
تحيتي لك