مشكلتي

[مشكلتي]

السلام عليكم
مشكلتي طيرتلي النوم من عينيا وعذبتني بزاف.. على وجه ربي نتمنى منكم النصح والتوجيه خاصة الناس المجربين..
أنا بنت عمري 25 سنة من الشرق الجزائري.. راني نقرا ماجستير ونخدم في منصب عمل دائم والحمد لله,, ومن عائلة محترمة ومحافظة..خطبوني بزاف ناس وفي كل مرة كنت نرفض إما بسبب عدم تكافؤ المستوى الدراسي أو بسبب انه ما يخدمش ولا يخدم في خدمة ماشي مستقرة.. طبعا بعدما نشوف الدين والخلق.. حتى تقدملي وليد خالتي.. أكبر مني بعام.. إنسان هايل,, طيب وحنون ومتربي ومثقف ومتعلم وكامل العايلة يحبوه.. أنا وافقت .. وبالشوية حبينا بعضانا بزاف..وكان هدفنا الحلال وفقط.. لكن كي حكيت لماما رفضت وقالتلي الموضوع هذا نحيه من بالك لأنه وليد اختها وعلى حسابها ماهيش حابة علاقتها بأختها تفسد ومن جهة ثانية كان يخدم في العقود فقط ومازال ماشي مكون روحو.. المهم الصدمة كانت بزاف كبيرة.. بكينا في زوج وودعنا بعضانا.. علاقتنا خلاصت لكن الحب مازال.. فاتو عامين درك ومازالني نحبه كيما الاول ولا اكثر.. وهو تاني كيفكيف.. لأنه أحيانا يبعثلي رسائل على الهاتف يقولي أنه مازال أمله في ربي كبير.. والشي اللي زاد عذبنا أكثر أنه كنا نتلاقاو بزاف في الأعياد والمناسبات العائلية.. وعلا هاد السبب ما قدرناش ننساو بعضانا.. وجاوني من بعده بزاف خطاب ورفضتهم. ممبعد جاني إنسان آخر.. عندو حوالي 3 اشهر.. هو يخدم معايا إنسان محترم ومتربي وفحل أكبر مني بعامين.. ومرتاح ماديا يعني لاباس بيه ومكون روحو كيما لازم الحال.. في البداية كنت رافضة الفكرة.. ممبعد خممت مليح وقلت الإنسان راهو يكبر وبالاك وليد خالتي ماهوش مكتوبي.. وباش ما نزيدش نعذب روحي ونعذب وليد خالتي العزيز معايا صليت استخارة ودعيت ربي وقلت بالاك لوكان نتزوج انا ننسى ووليد خالتي ينسى.. و اعطيت زميلي موافقة مبدئية بعد 3 أشهر من التفكير والعذاب.. ممبعد هدر مع بابا وبابا وافق وراهم رايحين يحددو موعد الشوفة.. لكن ليامات اللي فاتو جات عندنا خالتي.. يا خاوتي ماقدرتش نحمل.. منين تجي عيني في عينها تجيني الدمعة.. وكي تحكي على وليدها قلبي يتقطع.. بكيت بزاف.. وحسيت بلي محال ننساه.. ودخلني التردد والشك في قرار الزواج من الانسان الثاني.. وزاد وليد خالتي كي سمع بلي رايحين يخطبوني بعتلي ميساج ذبحني.. قالي بلي ماقدرش ينساني ومازالو يحبني وبلي راهو يتعذب بزاف على جالي.. وقالي اسمحيلي على خاطرش خليتك تنضري بسبتي وتتقاسي بزاف.. ومن هذاك الوقت وانا في حالة.. ما قدرتش نحبس البكاء.. ما يروحش من بالي كامل ونخمم غير فيه.. حتى اني درك راني نخمم كيفاش نتراجع على كلمتي مع الثاني ونولي لوليد خالتي.. وأكثر حاجة معذبتني اني كنت قادرة نضغط على ماما ونقولها بلي غير وليد خالتي اللي نديه وكنت قادرة نتمسك بيه حتى تقتنع ماما وتوافق لكن أنا لالا.. استسلمت بالخف.. ما حبيتش نواجهها ونعصي كلامها.. لأني ماحبيتهاش تغضب عليا.. لكن فعلا ندمت لأني فرطت فيه.. ودرك راني حايرة.. ماعرفتش واش ندير.. من جهة نحب وليد خالتي وحابة نكون معاه ومستعدة نتحمل ظروفه ونشجعه ونستناه حتى يكون روحه.. ومن جهة ثانية الإنسان الثاني مليح وعندي فرصة كبيرة معاه أني نستقر ونعيش حياة مليحة وما يخصني والو..وممكن هو اللي ينسيني في وليد خالتي مع أني ما عندي حتى مشاعر تجاهه.. وتاني حسيت انه فات الأولن وماحبيتش نكسر كلمة بابا.. صليت استخارة لكن ماني حاسة بوالو.. عقلي مخربط وراني في حالة بزاف صعيبة.. من قضلكم خاوتي عاونوني.. قولولي واش ندير قبل ما تكون حاجة رسمية بيني وبين الخاطب هذا.. يقولو أنه الحب يأتي بعد الزواج لكن مانظنش اني رايحة ننسى وليد خالتي ونحب هذا الانسان.. وفي نفس الوقت خايفة نضيع من يدي انسان مليح ونكتشف من بعد انه الحب تاع وليد خالتي ماهوش حقيقي كيما نسمع الناس يقولو وانه ممكن يروح مع مشاكل الدنيا والواقع الصعب.. نخير الحب ولا الاستقرار؟؟ ساعدوني الله يحفظكم ويعطيكم ما تتمناو..

[مراد سابقا6]

سبحان الله من يقرأ موضوعك يقولك مستوالك ليس بالجامعي

أريد سؤالك فقط :

أين حب الله في قلبك ؟؟؟؟؟؟

إذا كانت عواطفك كلها لهذا الشاب

[bellaluna]

يا أختي للأسف بعض الأمّهات يجنين على بناتهنّ لأسباب واهية و لكن عندنا مثل يقول "اللّوم بعد القضاء بدعة" أنصحك أن تصلّي مرّة أخرى الإستخارة و أن تدعي الله موقنة الإجابة ان يختار لك الخير أينما كان و من وجهة نظري -و الله أعلم- أن تقبلي بهذا الخطيب و تقنعي بما قدره الله لكِ فالله يعلم و نحن لا نعلم أضف أنّ الزواج بالقوّة و فرضه على العائلة ينعكس سلبا على العلاقات العائلية و قد يُفسد زواجك و كم من أخت طلّقتها خالتها أو عمّتها (و هي أمّ زوجها).

[bfares13]

السلام عليكم ورحمة الله وبركاته

أمك أرادت أن تحافظ على العلاقة العائلية التي تجمع عائلتك وعائلة خالتف واذ بها تقوم بالفعل الذي ينسق بتلك العلاقة وهو رفضها مصاهرة اختها

أظن أن زواجك بالشخص الثاني ليس بالحل إن بل سيعمق المشكل أكثر

الحل هو هي مصارحة الخاطب بالحقيقة ومحاولة اقناع أمك بالزواج من ابن خالتك والله أعلم

[مريم الصابرة]

السلام عليكم اختي
والله قريت قصتك وغضتوني في زوج لانو من عائلتك وناوي حلال يعني مش هو المشكل يعني أي إشارة منكم يجي يخطبك
شوفي اختي اولا فالمواصفات الاول يحبك وتحبينه الثاني محترم وفيه كل المواصفات لكن المشكل حرام أن تظلميه بحب رجل آخر يعني إنت هو راه جاي يخطبك وإنت تبكي على لاخر وامك قلها ما نوصلكش للمشاكل مع ختك الامر بيني وبينو لانو تزوجيه وتحملي كان يدو عليك اولا
صدقيني او مكانك ندير كل شي لانو حرام تتزوجي براجل ما تحبيهش وعقلك عند لاخر هنا الثاني مادارلك والو لانو حتى التفكير بآخر راهي خيانة
لو انا منك احكي مع يماك وقوليلها راحين تظلموني وإبكيلها الاكيد يحن قلبها وتقبل لازمك ديري كل شي هذي يماك يعني باب النقاش مفتوح بينك وبينها إنت حشمانة تحكي معاها وتضيعي حياتك على جال حشمة خليه يقول ليماه وتحكم ختها وتتفاهم معاها يتفاهمو أي مشكل بينك وبينو هوما يبقاو بعاد المهم راهم خوتات انا من رأي حاولي بكل الطرق قبل ما يجي الراجل وتوافقي وتندمي لازم توافقي عن قناعة وتنساي لاخر
فالاخير المكتوب راح يقول كلمتو لكن عاودي حاولي بإصرار خليه يجي يحكي مع يماك ويحللها مش عيب إبكي ليماك ديري كل شي وربي يجبب الخير وطمنينا على اخبارك ربي معاك والله مرات الوالدين يظلمونا ظلم كبير
موفقة

[الفاتحة]

أختي نصيحة لك من القلب وأتمنى ان تقفي كثيرا لما سأقوله لك ، علاقتك بابن خالتك حرام ولن يفت لك فيها احد بانها حلال، حبك له باب من ابواب الشيطان لا أكثر ولا أقل ، لكن ما اعتقده أن والدتك انسانة حكيمة وترى الأمور من جوانبها الصحيحة لهذا كان قرارها الرفض، فضلا عن ذلك ارد الله بك خيرا فوضع هذا الشاب المحترم ليغلق عليك باب ابن خالتك، صدقيني الله يريد بك الخير فلا تتجهي إلى طريق الوهم ،الحب الحلال هو الذي يأتي بعد الزواج بالعشرة الطيبة والمعاشرة الحسنة، والتعاون على الحياة اما كلمات الحب والغرام والهيام هي مضيعة للوقت وقربان للشيطان وبعد عن الطريق المستقيم ، صدقيني حتى لو عاندت وأخذت ابن خالتك فلن تجن شيئا إلا ماجناه من قبلك والدليل أمامنا زواج المحبين قبل الزواج لا تكون ثماره إلا الثمار العفنة ....موفقة أختي .

[pseudoname]

عن تجربة.زواج اولاد و بانت الخالات عادة ما ينتهى الى تشاحن و خلافات بين العائلتين.ضف الى دلك خطر زواج الاقارب على الاولاد
و يبقى المكتوب هو الى يمشى
سلام

[أم.معتصم]

حبيبتي لازم تبقاي تعاودي في صلاة الاستخارة حتى يبينلك ربي و الله يفرج

[أناييس الربيع]

والله يعجز لساني عن الرد ، أين محبة الله في قلبك

"من تعلق بغير الله عذبه الله بتعلقه بغيره"

صدقيني لا أومن بالحب ومشتقاته ،هناك زواج حلال وانتهى

وبالإضافة لصلاة الاستخارة لاتكف عن الدعاء

ولاتنجر خلف عواطفك تحت لواء الحب ،واقبلي بالخاطب

لي تقدم لك وماتدري لعل الله يحدث أمرا بعد ذلك

وحاولي تغيير رقم هاتفك وتجنبي اللقاءات العائلية

وقوي إيمانك بالله وتوكلي عليه وتزوجي ،لان الانتظار

لن يغير الواقع وقطار العمر لاينتظرك.

وأدعو الله أن يرزقك الزوج التقي والوفي

[baalache]

اختي اتقي الله علاش عطيتل لروحك الوقت باش تحبي هذه مسائل ينبغي الفصل فيها ف الاستعجالي من الاول تصارحي امك واه او لا وينتهي الامر بلا حب بلا شرشحة ولو تمضي في زواجك من الثاني دون علمه فهذه خيانة والله لا يهدي كيد الخائنين

[naamane3]

خيري اللي عندو اكبر نسبة من الخلق والدين
لانه اذا احبك اكرمك واذا ابغضك لن يضلمك

[kamel76]

يا أختي مادمت صليتي الإستخارة و كل شيء سهل تجاه الثاني فهي علامة الإختيار الصحيح فكثير من الناس يظن أنه عندما يصلي الإستخارة يحدث شيء أو يرى رؤيا ، يمكن أن يحدث شيء من هذا القبيل لكن النتيجة و الهدف الحقيقي من الإستخارة هو تسهيل الأمر بحيث أننا ندعو ا الله أن يسهل لنا فنقول في الدعاء :"... فيسره لي ..." الدعاء ...

أما قضية حبك لإبن خالتك فما من حل سوى أن تفوضي أمرك لله فالقلوب بيد الله و ليست بيد عباده فكما أحببت ابن خالتك سيمنحك الله حب زوجك و لا يغرنك الحب الأول أبدا فلا تدري ماذا بعده . أسأل الله لك الهناء

[djazia87holi]

ربي يكون الخير ان شااااااااااااااااااااااااء الله

[وليد1990]

اختي نصيحة ليك اخطيك من المسلسلات واذا تبعتيها ماتبعيهاش من قلبك ..

يبدو ان ابن خالتك يعرف كيف يلعب باوتار العاطفة .واثر فيك بكلماته وانتي نية ياسر والدليل ان من المعايير الي وضعتيها في زوج المستقبل العمل وابن خالتك لا يعمل فكيف نجى من هذا المعيار السبب واضح لانه يجيد التلاعب بمشاعرك ...........

سؤالي اليك اين كان بن خالتك هذا عندما كنتي في الـ 18 والـ 20 هل عرفك هكذا فجأة واحبك بدون سوابق ... المحير لماذا لم يعترف لك فقط الا لما جاءك المنصب واصبح مستواك عاليا ؟اين كانت مشاعره عندما كنتي في الثانوية ؟

لماذا لم يأتي البيت من بابه ؟ لم لم يعبر عن حسن نواياه ويتقدم ويضع اهلك في الامر الواقع ؟لم لم يظهر جديته ويكافح لاجلك ويضغط على أمك لانها خالته

صدقيني اخطيك منو والهاي مع الي دخل من الباب ووضح مقصودو وابدى جديته وحزمه وهذاك مازيديش تعيطيلو في التلفون لانو لوكان يفوق بيك خطيبك يهرب عليك وتشيع سمعتك في كلام الناس وواحد ما يتقدملك ...كيفاه تكلمي واحد من ورا خطيبك

[الحزين المبتسم]

السلام عليكم .. حل مشكلتك بإذن الله
قال رسول الله صلى الله عليه وسلم: إذا خطب إليكم من ترضون دينه وخلقه فزوجوه، إلا تفعلوا تكن فتنة في الأرض وفساد عريض.

المرجع الدين والخلق أختي الفاضلة ركزي على هذا جيدا