أصابع الروز لذيذة

[omo marwane]

السلام عليكم و رحمة الله و بركاته
اليوم حبيت نوريلكم طريقتي في صنع هذا الطبق اللذيذ بشهادة كل من أكله عندي حتى وين منعرض كاش واحد يقولولي ديرينا أصابع الروز
و قبل مانبدي حبيت نتأسف منكم لأنني لا أستطيع ادراج صور لأنني ماعرفتش نحملهم من الايباد و الميكرو رآه خاسر
بِسْم الله المقادير :أرز من الاحسن ماشي مفور
قطع دجاج واش عندك لكن لازم شوية من الصدر ضروري
كمشة حمص فرماج شابلير
اول حاجة ديري الأرز يطيب و ملحيه ممكن تضيفيلو زعفران اختياري و لكن طيبيه مليح حتى يتعجن لهذا قلتلكم من الاحسن لماشي مفور كي نشوفو تُعجن نحيه وتخليه يقطر من الماء مليح باه ميطرطقش كي نقلوه
نحضرو صوص بيضة و لكن تبعوني مليح هذا هو السر باه تجيك مليحة نحطو قطع الدجاج مع شويه زيت و زبدة او سمن نزيد الملح الفلفل الأسود كركم او زعفران شوية فلفل احمر (يعطي لون مليح )راس الحنوت شويه برك و نقليهم مليح مليح مليح حتى يحمرالدجاج نقطع بصلة الى مربعات صغيرة و نضيفها و نزيد نقلي حتى تذوب تماما و نضيف القليل من الطماطم نرحيها نصف حبة صغيرة فقط ممكن تستغناي عليها لكن تبنن الصوص و نقلي مليح انا احيانا نقلي الصوص هذا 45د باش في الأخير نتحصلوا على صوص لذيذةماشي مرقة المهم كي تشوفي المكونات تقلاو مليح مرقي بماء سخون و هذي نصيحة دائماً مرقي اللحم او الدجاج بماء سخون و ديري الحمص و خليه يطيب اذا جاتك خفيفة شربيها
كي يطيب الدجاج نحي الصدر فتبه و ضيفيلو الأرز و الفرماج المعدنوس مقطع رقيق و البيض و كل ماكثرتي الفرماج يجي بنين انا ندري الشاف خاصة نتاع الزيتون ذوقها رائع و البيض ديري بالحبة حتى يولي الخليط شوية جاري و مباشرة قبل ماينشف البيض رمديهم في الخبز المرحي (شابلير)وشكليهم أصابع و قليهم في زيت سخون على نار قاوية باه يجو مقرمشين و لازم طيبيهم مليح مي ماشي تشيطيهمالمهم يجي لونهم احمر ماشي اصفر
اذا درتي طراف نتاع الجاج قليهم في الزيت انا ندهنهم بالموطارد و ندخلهم للفرن و نشعل من الفوق باش يتحمرو
ديري الاصابع في المرقة ياخذو غلية فقط
في الصحن حطي الجاج و الحمص و الاصابع و شوية مرقو زيني بالمعدنوس و القارص و البيض المغلي و المايونيز
ملاحظة 1:ممكن تخلي الاصابع ناشفين بلا ما ديريهم في الصوص يجو كمقبلة رائعة مع الميونيز انا شوية نديرو في الصوص و شويه نخليه
ملاحظة 2:باه تجيك الوصفة مليحة لازم تقلي الجاج و حدو مليح و من بعد تقلي البصلة مليح باش تجيك صوص خاثرة و يبقاو الاصابع مقرمشين و لازم الاصابع يطيبو في الزيت على نار قاوية و لازم ياخذو لون
بالنسبة للحمص انا نشمخو و نطيبو في لاكوكوت و نديرو في المجمد و في اطباقي نزيدو في الاخير يغلي مع الطبق شوية برك يجي بنين هذي النصيحة نتاع ام اماني ربي يحفظها
صدقونى هذه الوصفة رائعة تصلح مقبلة و تصلح طبق رئيسي اذا كثرتي الجاج و تنفع للضياف و طبق مناسب جدا في رمضان
دعوة خير لي و لزوج و لأولادي بان نكون من أهل الجنة تكفيني و لكن بالمثل
في أمان الله