طمينة , بسيسة , زرير القمح من مطبخي للأخت إلهام و faizarbh

kakinova · 2013-01-11, 15:58

بسم الله الرحمن الرحيم

هادي لبسيسة او الطمينة نتاعنا مكونة من القمح , العدس و الحمص

و لي حب يزيد اضافات ممكن يزيدها لكن هي بهاذ الثلاث مكونات تكفي

هادي صورتها

هادي لبسيسة نضيفولها رشة ملح و نحطوها في علب محكمة الاغلاق , اذا عملنا كمية كبيرة نحطوهم فالفريجيدار تبقى حتى لعام او اكثر

نخلط القليل من العسل الساخن مع قطعة زبدة حتى تذوب و نتركه يبرد قليلا

لي ما عندهاش عسل كيما انا ما كانش عندي عملت شوية سكر حطيتو على النار تبدل لونو و ضفتلو ماء مغلي و خليتو غلى حتى ذاب كامل السكر

هنا لما ذابت المرغرين مع العسل

و نبدا نحط بالملعقة من هاديك الفرينة نتاع لسيسة و نخلط

هادي لما خلصتها انا ما نحبها ناشفة ما نحبها جارية بزاف وسط و كل واحد و ذوقو

فرغتها فالصحون و زينتها بالدراجي و حبيبات كوكاو رغم انها ما تحتاجش تزواق

و تتاكل مع حليب الصباح أو قهوة المساء و تقدم للضياف حكاجة حلوة اذا ماكانش القاطو

و كيفاش تتحصلي على بسيسة كيما هاذي فالردود التالية

ملاحظة مهمة : لبنات و الله تعبت بزاااااااااااااااااااااااااااااااااااااااااااف في عمل الموضوع و الكتابة على الصور و تحميلها و الكتابة فالموضوع و خصوصا انو قطار ماش موضوع صغير , يومين تحضير , ثم 5 ساعات في تحميلو و تجهيزو

لبنات و الله يومين و انا معاه نخدم و نصور , و كاين مواضيع من قبل تعبت عليها و صورتها ثم الأخوات يعملو موضوع بوصفتي , و كل الشكر و التقدير ليهم و أنا دعوة خير ماكانش , و الله غاضني الحال بزاف

انا تعبت و ما بخلت عليكم بحتى حاجة يا ريت دعوة خير فقط من كل وحدة قراتو او استفادت منو و شكرا

kakinova · 2013-01-11, 15:59

بسم الله الرحمن الرحيم

طريقة التحضير :

هادي لبسيسة نتاعنا مكونة أساسا من القمح و العدس و الحمص هادي لاباز أو القاعدة نتاعها و من بعد عند التقديم ممكن ننكهوها و نضيفولها إضافات عديدة مثل المكسرات مرحية , التمر اليابس المرحي , الزقوقو مرحي و كل واحد وذوقو
حنا نعملوها دائما للمرأة النافس بعد ما تخرج من غرفة التوليد نديولها مع شوية تيزانة شخونة الطمينة حتى تهز صحتها كيما نقولو كونها مغذية جدا نعملوها للنافس عموما بالزبدة ماشي بالمرغرين و العسل الحر , لكن يمكن عملها بالعسل نتاع السكر و المرغرين
البسيسة او الطمينة أكلة مغذية جدا تاكلها النافس حتى تسترجع صحتها , و كذلك لأنها مدرة للحليب و تاني ياكلوها الناس لي عندهم الأنيميا " مرض فقر الدم "
ناس بزاف يتناولوها دائما لقيمتها الغذائية و لأنها بنييييييييييييييييييييييييييييينة بشكل ما تتصوروهش يتناولوها كحلوى مع فطور الصباح أو قهوة المساء , أنا عن نفسي نحبها باردة ماشي دافية ولا سخونة مع كاس حليب بارد أممممممممممممم
نخليكم مع الصور و نكمل الموضوع راني درتو بالصور و الشرح الممل من الألف للياء
المقادير :

في هاد السيار " الغربال " نغربلو العدس ثم القمح باه نصفيوه شوية من الأتربة و الحجارة الصغيرة و القشور

نحطوه تحت العين " الحنفية نتاع الماء " و نغسلوه بفركو بين الكفين باه يتنحالو التراب و المواد الكيميائية و كذلك القشور

كل مرة نفرغو الماء من فوق حتى تروح القشور و الأعواد و يبقى القمح ثم نفرغ في اناء آخر و نخلي لي فالقعر يبقى فيه لحجر

هنا كل القشور و الاعواد راحو مع الماء لي فرغناه بعد الغسل المتكرر للقمح

و هنا القمح تغسل و الماء اصبح صافي تماما

نقطروه في سيار عينيه كبار باه يقطر بسرعة و يقطر مليح

ثم نغسل العدس مليح

ونقطروه

ثم نغسل الحمص و نقطروه

لما يقطرو مليييييييييييييييييح ننشرهم في حاجة عريضة

و كل مرة نحط جزء فوق المدفئة باه يجف و اذا كان الجو ساخن نحطوها تحت الشمس

هنا العدس لما جف نحكوه مليييييح بين الكفين حتى ننقص من القشور لأنها تعطي لون اسود للبسيسة و ذوقها يغلب

ثم نغربلوه في سيار الزرع " بوعين كبيرة " و هادو لقشور لي نزلت

و هادو الحبات الصافية

هادا القمح بعدما ما نشف بيتو الليل فوق المدفأة اصبح جاف تماما

kakinova · 2013-01-11, 16:01

نكمل

هادا القمح المغسول لما جف

نحطوه في غربال و نزيدو نسيروه

ثم في حاجة عريضة نقيوه من حجارة بقات أو نباتات ضارة

هادا القمح مغسول و منقي مليح

ودركا نبداو نحمصو فالمكونات نحمصو اولا العدس في قدر او مقلة ثقيلة مع التحريك , هو المفروض يتحمص في طاجين الطين , انا ما نحبش نحمصو فالطاجين يتحرقو يديا و رجليا و وجهي خخخخخخخخخ فوق الكويزنيار في حاجة ثقيلة احسن و النتيجة نفسها

هنا بعد ما حمصناه

نفرغوه في غربال و هكذا ما يعرقش و يترنخ

ثم الحمص نحمصوه

ثم القمح تحطو غير بالحفنة هكذا ياخذ حقو فالتحماص

و نحرك مرة على مرة كذلك و القمح رح يترطق مثل الذرة و يتنفخ قليلا

هنا كملك جميع الكمية نتاع الحبوب و خلطتهم

نخلوها تبرد ثم نديوها عند الرحاي لي يطحن الفريك و الكسبر و غيرها المهم لي عندو مطحنة كهربائية , اليوم جمعة الدكاكين مغلوقة رحيت شوية فالمطحنة فالمنزل حتى نكمل الموضوع و تفهمو اكثر

هنا بعد ما طحنتو

نقوم بغربلته فالسيار الرقيق جدا لي نستعملوه للفرينة و الاشياء الرطبة جدا

نتحصلو على البسيسية و هي الجزء لي ينزل و لو حبيناها رطبة جدا نحاول نغربل غير شوية حتى ما ينزلش الخشن و تبقى ناعمة

و هادا الجزء الخشن لما نغربل كامل البسيسة نلموه و نحطوه في كيس و نرجعوه للرحاي يزيد يطحنو و نعاودو نفس الخدمة

و هذا نكونو تحصلنا على الذ بسيسة نظيفة و بخدمت يدينا و حاجة لذيذة و مغذية

messaoudiKanza · 2013-01-11, 16:12

اختي يا ريت تعطينا المقادير بالضبط وشكرا

kakinova · 2013-01-11, 16:16

راني ندير فالموضوع أختي اصبري شوية برك درك نكملو و نحطو بالمقادير بالطريقة بالنتيجة بالتفصيل الممل

الموضوع شوية طويل خخخخخخخخخخخ صورت بزاف الصور درك نكتب اسمي و نحملها و من بعد نوجد الموضوع

وتشوفيه ان شاء الله كامل

بوعنينبة · 2013-01-11, 16:38

شكرا لك رانا فالانتظار

tong · 2013-01-11, 16:44

يعــــــــــــطيـــــــــــــــــــك الصحـــــــة

oum anas 69 · 2013-01-11, 17:36

mmmmmmmmmmmmmmmm tchahi ya3tik asaha ana nastanaw fik

faizarbh · 2013-01-11, 17:37

يعطيك الصحة راهي تبان روووووووووووووووعة لازم نجربها اجري راني مقلقة نشوف الوصفة هههههههههههه

ramzi0405 · 2013-01-11, 18:56

شكرررررررررررررررررررررررررررررررررررررررررررررررر را

لينا11 · 2013-01-11, 19:28

نعم حبيبتي هنا في قسنطينة مايستعملوش عدس شخصيا الي كليتها بلا عدس

وتبقى مسألة اذواق لان اختي كلاتها وماعجبتهاش وانا عجبتني

bissan.sousou · 2013-01-11, 20:43

شكرا اختي يعطيك الصحة

kakinova · 2013-01-11, 21:53

الحمد لله بعد يومين تحضير و 5 ساعات كتابة و تحميل خلصت الموضوع ان شاء الله يفيدك ختي فايزة و اي وحدة ما تعرفش الطمينة

زهرة البيلسان البرية · 2013-01-11, 22:08

يعطيك الصحة أختي و لا حرمك ربي الأجر ،، شكرا على الإفادة أنا أول مرة نشوفها و أكيد بنينة و زيد صحية جدا

faizarbh · 2013-01-11, 22:36

صراحة دوختني عجبتني شهيتينيييييي رووووووعة الله يبارك ما شاء الله و حاجة جديدة اول مرة نشوفها و تبان صعيبة ان شاء الله نحاول نجربها ايلا صبت وين نطحنها نشوف مع جدتي عندا طاحونة يدوية تاع بكري نقولها تطحنلي ههههههه ايلا ما حاوزتنيش