حوار جمع بين لى قاعدة فى البيت ولى عايش فى الغرب....

هبة الله الرحمن · 2009-07-27, 21:25

بعد الصلاة وسلام....على لى حضر وعلى لى غاب...ونشوفو هذا القلم واش من الحكاية كتب....على شخص يقول أسمو الطيب...خلى بلادو وراح لبلاد الغرب.... لى يحبها اكثر من العرب....المهم تعرفت عليه وشوفو واش صرا بدون ما نكذب....جمعنى معاه هذا الاستجواب....قتلو شكون انت يا طيب....وعلاش خليت بلادك وروحت لبلاد الغرب....
رد عليا وقال-انا معروف فى مدينتى وكبير النسب....
ومن المشاكل لى جاتنى من الخدمة حبيت نهرب....
بعد هذا قلت فى بالى للزواج نجرب....
رديت عليه وقلت-علاش الزواج ولا مخبر نديرو فيه التجارب....
نطق ليا وقال-لأنىبعد هذى التجربة وليت من دارة وجديد عازب...
قتلو -مافهمتش علاش فشلت فى هذ التجربة.....
سكت شوية وقال-سمحيلى غيرى السؤال لانى مانيش رايح أنجاوب...
رديت عليه وقلت...واش اديت من هذا الزواج لى فيه حبيت أجرب...
نطق ليا وهو يضحك وقال-عندى شمعة ضاويةمن حبى ليها وخوفى عليها نضل نأنب...
قتلو-ان شاء الله يفرحك بيها الرب....
بصح كى تحبها هكذا علاش خليتها وروحت لبلاد الغرب....
رد عليا وقال-لى خلانى وصلت لبلاد الاجانب....
هى الهموم والغبينة لى راهى فى القلب....
قتلو -ماعليش هذا واش ربى عليك كتب....
بصح قولى واش من حاجة لى تخليك للحياة تحب....
رد عليا وهو واثق من نفسو
وقال-انا الحياة عندى لازم نخدم أوبالحلال نحب نكسب....
أوكى نحب نعاشر للرجال نصاحب....
ونحب نطالع بزاف باش اذا سؤلونى فى حين نجاوب....
نكملكم الحوار معاه بدون ما نكذب....لانى كنت من حين لحين نقولو علاش تحب تتكلم معايا واش فيا يعجب.....يضحك ليا
ويقول-اجى نهار لى نطلب منك طلب.....
المهم بعد شهور أوفات نطق ليا وقال
راه جا النهار لسؤالك نجاوب....
وتلبلى هذا الطلب.....
قتلو -ان شاء الله مايكونش عليا صعب....
قال-اليوم رانى حاب تكلمينى بالحنانة والحب.....
رديت عليه وقلت-هذا الكلام حرام وعيب......
أوزيد ماولفتش نتكلم فى هذا الكلام الغير متهذب....
نطق لى وقال-علاش رانى حاب نسمع صوتك لى بيه نذووب...
قتلو-ربى على كل كلمة نقولهالك راه يحاسب....
أوزيدرانى خايفة عليا وعليك على واش يعاقب....
رد عليا وقال-علاش واش درنا ذنب....
قتلو -على الكلام لى راك تقول فيه راح نديرو ذنب....
نطق ليا وقال-علاش راكى تقولى هكذا....
قتلو-تعرف مانيش لوم فيك ولا نعاتب....
لان هذى حالة لى خلى أهلو وبلادو وراح لبلاد الغرب...
فى اخر الحوار قال-واش كاين بعد هذا الجواب....
رديت عليه بكل تهذب....
وقلت-اليوم رانى معاك وغدوة ماضنيتش,وان شاء الله نكون أحسنت الأدب...
هذى هيا أناوهذى هى سيرتى لى ديتها من الأب...
وهذى هيا حالة لى قاعدة فى البيت,وحالة لى عايش فى الغرب......