من يجلس بجانبك ، أمك أم زوجتك؟

Hicham Ahmed · 2013-08-31, 22:09

زرت اليوم مسقط رأسي .. فالتقيت بأصدقاء طفولتي.. من حديث الى حديث .. حتى وصلنا الى أحد المقاهي الشعبية .. جلسنا نحن ثلاثتنا .. وبدأ نسترجع أيام الصبى – أأه أأه ليث الشباب يعود يوما! ..- المهم .. ونحن جالسون بالمقهى حتى مرت أمامنا سيارة الله الله – فمشطناها بأعيننا – طبعا السيارة!- .. لكن صديقي الذي بجانبي قال لي أنظر أنظر .. قلت له أنا أنظر ما شاء الله – قال لي لا لا هشام أنظر الذي في السيارة .. فنظرت أنا وصديقي الأخر ..- ففهمننا قصده .. رجل يسوق وزوجته بجانبه وأمه في الخلف ..
قال صديقي الأول : سبحان الله على هذا الزوجة .. ترضى تقلش روحها من القدام .. وتخلي عجوزتها من الخلف مرمية .. ياخي حالة ياخ .. والله كيما قالك عيش تشوف.. النسا تاع آخر الزمان .. لم يصبر صديقي الأخر وانفجر حتى هذا الرويجل ماهوش راجل .. يطيش أمه في الخلف .. يخلي لالاه معاه .. ياخي حالة .. كنا بكري نسمعو .. بصح درقا ولينا نسمعو ونشوفا .. يا حصرا على الرجال والمساطيش تاع بكري!..
قلت لهما – حوحو يشكر روحو – ممكن الوالدة راضية وهي اللي قالتلها ريحي من القدام - .. قاطعني صديقي .. واش خو امالا حتى انت ديرها .. قلت له : لا لا عمري ما نفرط في يما .. بصح هذيك ثاني زوجتي .. ولازم نحكي معاها من قبل ونقولها ..يما خط احمر ..بلاك هاي عيني .. هههههه .. عجبو الحال صاحبي وقال لي راجل والله .. فقلت له لا لا راني غير نضحك معاك .. كون جيت أنا ....................

كون جيتوا أنتوما واش اديروا: يماك ولا زوجتك؟! زوجك ولا عجوزتك؟!

BAROUD · 2013-08-31, 22:14

لالا انا بالذات اللي نركب في المقعد الخلفي

mehdi179 · 2013-08-31, 22:43

السيارة سياحية قد تجلس الام او الزوجة ماالمانع

اعتقد انه بالامكان تجاوز الحادثة ولا مجال لتصنيفها مع الحقرة او التهميش وطبعا..العقوق

ام نسمة · 2013-08-31, 22:55

ههههههه موقف يصرا بزاف انا نخلي عجوزتي من القدام ومرة هي اللي قعدت تحلف عليا وقالت لي لازم تركبي انتي بجنبو
المهم يعني كي يكون برضاها ماعليش ولاذا جات على الحلفان راح الزوج مسكين يستنى ساعة وهوما غير يحلفو على بعضاهم شكون تركب من القدام
وانا كي نكون مع خاوتي ونساهم الكبير يحبني انا حداه ومرتو ماتزعفش والاخر العريس الجديد انا اللي مانحبش نركب من القدام نخلي مرتو تقعد حداه واذا كانت ماما فأكيد هي المعلمة ههههههه واصلا ماتتنازلش على بلاصتها

Hicham Ahmed · 2013-08-31, 23:35

اقتباس:

المشاركة الأصلية كتبت بواسطة mehdi179

السيارة سياحية قد تجلس الام او الزوجة ماالمانع

اعتقد انه بالامكان تجاوز الحادثة ولا مجال لتصنيفها مع الحقرة او التهميش وطبعا..العقوق

نعرف انه قد تجلس الام كما قد تجلس الزوجة..
طيب .. لو اردت الخروج في نزهة .. وتأخرت امك قليلا .. واستبقت زوجتك للسيارة وركبت بجانبك .. ما موقفك .. من ركوب امك في الخلف؟.. هل ترجع زوجتك للخلف ... ام تطلب من امك التقدم؟ ام.....؟؟؟

oumserine · 2013-09-01, 05:55

ايييييييييه موضوع جد حساس و رغم بساطته الا انو سبب مشاكل كبيرة للكثيرين
المهم ،،،،،أنا نظن انو كلشي مبني على الاحترام للغير ، الزوجة في دار باباها تركب من الوراء ،مع أخوتها كذلك،و حتى مع مول التاكسي هيئه هيهيهيه ولكن يا إخوتي كي تلحق للزوج فمكانها أمامه و العجوزة تركب من قدام مع راجلها ولا وليدها العازب إلا إذا العروسة هي طلبت منها و إلا فهي حقرة و إيحاءات من العجوزة بانها هي number one و هي اللي تحكم و رايحة تخلق حساسية بيناتهم

moslihe29 · 2013-09-01, 09:35

اقتباس:

المشاركة الأصلية كتبت بواسطة hicham ahmed

نعرف انه قد تجلس الام كما قد تجلس الزوجة..
طيب .. لو اردت الخروج في نزهة .. وتأخرت امك قليلا .. واستبقت زوجتك للسيارة وركبت بجانبك .. ما موقفك .. من ركوب امك في الخلف؟.. هل ترجع زوجتك للخلف ... ام تطلب من امك التقدم؟ ام.....؟؟؟

اداحصلى هذا الموقف انزل لتركب الام مع كل محبيتى واحترامى الام ام ماتتعوضش اما للزوجة بدائل كثر ربى يرحم جميع الامهات ويحفض الباقيين

روضة من رياض الجنة · 2013-09-01, 10:22

السلام عليكم

موضوع مليح اخي الفاضل كل واحد ونظرتو في هذا الشيء
يصح انا وحدة من الناس منقدرش نديرها ديما نخلي عجوزتي تركب من القدام نحشم منها بالرغم من انو زوجي معلبالوش لي تركب تركب

ربي يبارك فيكم

سمرجان · 2013-09-01, 10:45

ممكن الزوجة تتفضل وتترك البلاصة لعجوزتها قبل ما يقوللها زوجها اقعدي في الوراء هههه

cicilya · 2013-09-01, 12:20

العجوزة اللي عيب عليها تركب من القدام لأنه من القدام معروف بللي الزوجة اللي تقعد امام زوجها لأنه العجوزة قعدت مع شيخها من القدام في قت مضى فلتترك الآن الدّالة للآخرين

houdehoud · 2013-09-01, 12:58

السلام عليكم

اقتباس:

المشاركة الأصلية كتبت بواسطة baroud

لالا انا بالذات اللي نركب في المقعد الخلفي

هههههههههههههههه ضحكتني ربي يعطيك الخير

اقتباس:

المشاركة الأصلية كتبت بواسطة cicilya

العجوزة اللي عيب عليها تركب من القدام لأنه من القدام معروف بللي الزوجة اللي تقعد امام زوجها لأنه العجوزة قعدت مع شيخها من القدام في قت مضى فلتترك الآن الدّالة للآخرين

و اذا شايبها ما يعرفش يسوق و الا ما عطاهش ربي طاكسي على خاطر كان يربي و يصرفف على ولدو باش رجعو راجل و جاب مراة باش تقول على عجوزتها عيب عليها تركب من القدام كيفاه دير هاد العجوز انا نقولك تسنى ولدها يقاري و تقول لشايبها مول 80سنة يركب من قدام و الطاكسي حابسة و هي حداه و يتخيلو باللي راهو يسوق و هي حداه
اسمع خويا هاذ المسالة تافهة كاين حوايج اهم في الحياة يخمم فيهم الواحد و كيما قال اعظم انسان في الكون امك ثم امك ثم امك

samira135 · 2013-09-01, 13:07

وعلاه في نظركم المقعد الامامي هو الاحسن ؟؟؟؟

وكان تخمو فيها مليح تلقاو المقعد الخلفي مريــــــــــح أكثر و زيد في المقعد الامامي كاين حزام الامان اكيد رايحة يقلق المرأة الكبيرة

شوفو رجال الاعمال و الوزراء .......الخ وين يقعدو في الخلف و الامام ؟؟؟؟؟ وعلاه في رأيكم ؟؟؟؟

z.abdo · 2013-09-01, 13:13

الأم بجنبي والزوجة في الصندوق الخلفي (لامان)

houdehoud · 2013-09-01, 13:24

عبدو خويا قلنا امك ثم امك ما قلناش طيح قيمة زوجتك عيب حتى هي راهي خلات دارهم علاجالك و تسمح في كلش علاجالك انت و ولادك الاولوية للام بصح بدون تقليل احترام الزوجة

قَاسِمٌ.قَاسِم · 2013-09-01, 13:32

سلام عليكم طبتم..
موضوع طيب وممتع
لا زلنا نستعمل النقل الحضري
ما لحقناش سيارة
وإذا كان السيارة توقعنا في مشاكل الأمام والخلف
ما نلحقوهاش خير.. هههه
سلام..