مشكلة هشام

[مشكلتي]

السلام عليكم ورحمة الله وبركاته
نحكيلكم القصة
المشكلة ما تتعلقش بيا، تتعلق بابن خالي هشام
أنا وهشام ملي كنا صغار وحنا مع بعض، ومن الإبتدائي وحنا نقراو مع بعض وهاذ العام نجوزو الباك تاني مع بعض
خالي و مرتو راهم يتشاجو بزاف وخالي هو الغالط، عندهم 2 شقق في دارهم، خالي خلاهم وراه عايش في شقة اخرى وخلاهم وحدهم ماراهش يسقسي عليهم، راهم في 3شهور هاكداك وماحبش يحشم على روحو، حتى ولادو الصغار ما علابالوش بيهم.. هشام هو الكبير و عندو الباك، ما ولاش يقرا مليح، راه سامح في قرايتو وقاعد غير يخمم في المشكلة تاع والديه.. راني حابة نعاونو مي ماعرفتش كيفاش لأنو اللي يقولها على باباه عندو الصح، خالي راه مخسر بزاف.. جرب هشام يهدر معاه باش يحلها ولا باباه يكفر عليه.. قالي كون غير ضربني وماقاليش هاذيك الهدرة.. وراه يقولي تانيك بلي باباه راه يخسرلو حياتو باغسكو علا جالو ماراهش يقرا مليح، وحتى ايلا جاب الباك ميقدرش يروح يكمل قرايتو ويخلي يماه وخاوتو الصغار، راه يحس روحو مسؤول عليهم ويماه ماراهيش تقدر وحدها..
حتى واحد من العايلة ماعلابالو بلي كاينة هاد المشكلة.. هشام حاكيلي غير أنا ومنقدرس نقول لوالديا باش يسيو يحليوها سينو هشام يزيد يحصل معا دارهم
كان عندنا أحلام باش نروحو نكملو قرايتنا في الخارج مي هشام ما يقدرش حتى يخرج من المدينة تاعنا
غادي يضيع المستقبل ديالو و مايقدر يدير والو لباباه و يماه..
كيما يدير ما يقدرش يحل المشكل، غير ايلا ربي هدى خالي باش يفيق بروحو

راني حابة نعاون هشام باش يولي يقرا و ما يخممش بزاف باغسكو وليت نتقلق كتر منو
راني حاباتو على الأقل يجيب الباك و ما يضيعش هاذ العام و يكون قدوة لخاوتو،، بالاك منا لرمضان كي يصيب خالي روحو وحدو حتى واحد واحد ما يطيبلو بالاك يهديه ربي و يرجع لمرتو اللي صبرت عليه وولادو

عاونوني الله يجازيكم كيفاش نقنع هشام باش يرجع يقرا و نطلعلو المورال مع العلم أنو ذكي بزاف ر قادر يروح بعيد

شكرا لكم مسبقا وأعتذر على الإطالة