حانجيتك

[khaoula1997]

السلام عليكم ورحمة الله وبركاته
"حانجيتك" كي توصل 10 تاع الليل هذ الكلمة تقولهالي نانا وبالمناسبة تحية خاصة ليها "سليماني الزهراء" كل يوم تحانجيلي وماكانش لي ما يسمعش بهذ الكلمة هي عبارة عن الغاز قديمة كانو يقولوها ناس بكري تخليك تخدم مخك صح صح وانا اليوم راح ننقللكم شوي من محانجياتها ونخليكم تخدمو مخكم تاني
ومانعطيلكمش الاجواب الا بعد يومين من التفكيييييييييييييييييييير العمييييييييييييييييييق بلاك تلقاوها نخليكم مع الخمسة الاولى
1/-على مرايتنا فضة جات من جبل الياقوت,ما صنعها صانع ما تحط في حانوت.
2/-على عبد الصمد شاف شوفا قال يا زبوني, شفت حبيب يمرمد في حبيبو ولا كذبت اذبحوني.
3/-على لي جات وجبات بسناسلها دبات وما دريناها وين تبات.
4/-اللي محزم من وسطو يا طرارايدي قالو وش بيه راسك مكسر قالو مضروب بسرارايدي.
5/-بيض رفروف يشرب الماء كي لخروف.
هيا اتمنى التفاعل ومش راح نبخلكم بجديد راني راجعة بعد يومين هيا خدمو مخاخكم هههههههه
وهكذا نرجعو عاداتنا وتقاليدنا
بالتوفيق