صابلي بنكهة النيسكافي

[إلهام07]

البسملة1


أخواتي للمرة الثانية أكرر تأخري في كتابة الوصفات راجع للكسل فقط و خاصة أن موقع التحميل رجع صامط بزاف

أما البخل خاطيني وتعرفوني مليح منين نلقى وصفة مميزة نحب نشارككم بيها لسبب بسيط ....وهو دعاوي الخير




هذي الوصفة درتها في عيد الفطر ماتتصوروش الناس كامل تسأل على الوصفة ريحة وطعم النيسكافي فيه باين والريحة تضرب من البعيد وطري يذوب في الفم وبنييييييين يهبل من طعم الصابلي للكريمة للقلاصاج نتاعو كي تخدموه تشبعو لحيس هههههههههه


هذي طريقتي أنا يعني من راسي جربوها بإذن الله تعجبكم وعلى العموم سبقتكم أختي وجربتها فعلا روعة طري يذوب في الفم ونكهة القهوة محببة عند الجميع وقلاصيتو بالشوكولا بدلا من القلاصاج باش يجي بنين ... ديما نركز على البنة قبل الشكل

للعجينة :




250غ مارغارين فلوريال ،5 م ك سكر ناعم،3 صفار بيض،3 م ك نشاء ،2 م ك نيسكافي سائلة مركزة،1 م ص نكهة القهوة( انا شريت نتاع الميزان اللي تتباع سائلة عند اللي يبيعو لوازم الحلويات نكهتها مركزة )


½ خميرة حلويات ، 1 م ك فاني ، فرينة لجمع العجينة



للكريمة :



100غ زبدة ستار،5م ك سكر ناعم،2/3 علبة دانيت شوكولا،1م ك فاني،2م ص نكهة قهوة، نيسكافي سائلة مركزة حسب الحاجة


للقلاصاج :



500-400شوكولا بيضاء ،1م ص نكهة قهوة، حليب حسب الحاجة،نيسكافي سائلة حسب الحاجة
وهذي صورة الشوكولا المستعملة ماديروش نتاع

الميزان ماشي بنينة كاينة بيضاء أو سوداء اللي تحبو أشريو منها للقاطو واستعملوها هي أحسن من شوكولا الميزان





الطريقة :



- نحضر عجينة الصابلي:
نضرب الزبدة والسكروالفاني مليح ونضيف القهوة السائلة ونكهة القهوة ثم نضرب ونضيف النشاء والخميرة ونخلط ثم الفرينة نضيف غير بالشوية هذا الصابلي راهو ينشف بسرعة حذاري لازم نخلي العجينة طرية مايجيش الصابلي يابس لأن القهوة تيبس الصابلي
- ونطرحها ونطبعها ونطيبها ومانحمرهاش في الطياب باش يجي طري الصابلي .



- نحضر الكريمة:نطلع مليح الزبدة على أقصى سرعة ممكنة مع السكر والفاني ثم نضيف الدانيت ونكهة القهوة ونضرب ثم نضيف النيسكافي بالشوية ونطلع حتى نحصل على كريمة خفيفة ونذوق إذا محتاجة سكر نزيد
حذاري ، القهوة المركزة نضيف بالشوية يعني بالملعقة نتاع الأكل كل مرة ونخلط لو نبالغ في وضع السوائل رايح تفسد الكريمة وترجع تشبه للحليب لما يروب

- نلصق حبات الصابلي بالكريمة وتكون طبقة الكريمة باينة (1م ص لكل حبة ) ... كمية الكريمة راهي مضبوطة لايفترض أن تبقى كريمة بعد الانتهاء .
الكريمة رايحة تزيد تبنن وطري الصابلي


- نذوب الشوكولا البيضاء : في حمام مائي نحط الشوكولا البيضاء مبشورة مع نكهة القهوة وشوية قهوة مركزة ونخليها تذوب ... لما تذوب نحرك ونضيف القهوة السائلة وإذا حسيتوها رايحة ترجع غامقة في اللون نضيف حليب حتى نحصل على القوام المطلوب ، المهم ضيفو السوائل غير بالشوية باش ماتجراش الشوكولا من بعد ماتجمدش مليح

- نغطس حبات الصابلي في الشوكولا والتزيين حسب الرغبة ونخليهم يقطرو فوق شباك .


هذه الكمية تعطيك حوالي 40 حبة .




وهذي صورة الكريمة


أنا نقصت شوية شوكولا اللي ذوبتها مع النيسكافي وزدتلها شوية صغيرة شوكولا سوداء ذايبة تحصلت على لون بني فاتح حطيتو في كيس وذوبت شوية شوكولا سوداء وحدها مع شوية حليب وحطيتها في كيس وعملت قلاصاج منمر
على العموم القلاصاج المنمر أحسن شيء يجي بالقلاصاج باش يسيح ويجي مستوي أما بالشوكولا يجي بومبي ماشي مسطح وكل وحدة وذوقها





وهذا تطبيق أختي


كي تنشف الشوكولا مليح نزيل زوائد الشوكولا من الأسفل بالسكين باش جي خدمة نظيفة ومتقونة .
إذا عملتو قلاصاج منمر ماديروش ملمع أما إذا عملتو قلاصاج عادي كيما نتاع أختي لازم ديرو ملمع ذهبي يجي باهي بزاف انا نسيت ماصورتوش .

طبعا لازم منين تخلصو تحطو الحبات في حاويات ورقية ويتخبى في علبة محكمة الإغلاق باش ماييبسش القاطو ويحتفظ برائحة القهوة الزكية .

وماتخافوش الشوكولا البيضاء هذي ماتذوبش في السخانة كيما الشوكولا السوداء على بالي رانا في الصيف نتفاداو حلويات الشوكولا .


وهذا درتو الاسبوع اللي فات لعرس بنت خالتي



أتمنى جربوه ويعجبكم

تحياتي .... أنا لهلوبة