لمن طلبوا وصفة تورتة الشيكولا

[سرسورة85]

سلام عليكم
في البداية كانت ما تصلحليش تورتة الجينواز كانت تتفشبي بسرعة مي كي عطاوني هذي الوصفة نجحتلي من اول مرة ولكن بخصوص التزيين و القناج من عندي انا ما نطولش عليكم اليكم المقادير



10 بيضات + 2 كيسان نتاع قازوز فرينة نقصوا منهم 2 ملاعق كبار ونعوضوهم كاكاو + كاس ونص سكر حرش + 4 ملاعق كبار ماء سخون +فاني + قرصة ملح
قشور حبة ليمون (مكرفجة )
طريقة التحضير :
نفصلو9بيضات البياض وحدو و الصفار وحدو
بالنسبة للبياض : 9 بياض + قرصة ملح + نص كاس سكر حرش نضربوهم مليح بالباتور كي شغل رانا نخدموا في المرانغ بحيث كي نقلبو الاناء ما يسيحش الخليط
ونحطوه على جمب نرجع للصفار
بالنسبة للصفار : 9 صفار + بيضة كاملة + كاس سكر+ فاني و قشور قارص نخلطوهم مليح بالباتور حتى يذوب السكر مليح ثم نزيدو 4 ملاعق نتاع ماء سخون و من بعد نبداو نديرو في الفرينة والبياض بالتدريج اي ملعقة بياض ونخلطوا بالباتور ثم ملعقة فرينة ونخلطوا ايضا بالباتور حتى نكملو كامل الكمية ثم ناخذ بلا وندهنو بالزيت ونديرلوشوي فرينة ثم نكبو فيه الخليط وبخصوص البلا لي يتفتح في الجمب ثم نحطوه في فرن يكون سخون في درجة حرارة 180 درجة ومدة الطهو من 30 الى 45 دقيقة ولكن لازم نتفقدوها كل مرة بالكوردون نتاع السنين باه ما يفسدش شكل التورتة
وكي طيب كي تبرد نقسموها عى 3 طبقات بالموس نتاع الخيز
ثم نوجدو السيرو : كاس ماء بكاس سكر + شريحة قارص بعد الغليان ب 5 دقايق نطفوا عنو ونحطوه يبرد
بالنسبة للكريمة لي نحشز بيها هي كريمة شي بوست عبارة عن كيلة كرام شونتيي بعد ما طلعناها + 2 كيلات كريمة الزبدة الي هي عبارة عن 125 غ سكر رطب + 125 غ مارغرين طرية + بيضة كاملة نطلعوها بالباتور واذا حبيناها تجي قهوية نضيفولها كاكاو قبل ما نخلطوه بالباتور
نديرو هذي الكرام بين الطبقات وفي الاخير نغلفوا بيها كامل الخبزة نتاع الجينواز ونحطوها في الثلاجة تبرد و تشد روحها
بالنسبة للقانج وهو الاهم : 250غ شيكولا او 2 مورصوات وهي حوالي 300 غ +70 غ زبدة +كاس ناقص زوج صباع حليب
30غ كاكاو او اكثر
لاغوم نتاع اللوز او البرتقال
طريقة تحضيرها : فوق حمام مائي نذوب الشيكولا وكي تذوب نديرولها الزبدة مقطعة قطع ونخلوها تذوب ثم نضيفو الحليب بالتدريج ثم نضيفو الكاكاو مغربل واذا بانتلكم الشيكولا خفيفة شوي تقدروا تضيفو حوالي ملعقة كاكاو وعينكم هي ميزانكم ثم ناخذ الطاوة لي فوق الحمام المائي ونديروها فوق النار نزيدولها قطرتين من لاغوم ونخلوها حوالي 2 دقايق و في الاخير نصفوها في صفاية نتاع حليب باه نتخلصو من الحبيبات وتجي صافية مليح وكل ما يبرد القناج يزيد يخثار مليح
ملاحظة : هذا القناج يصلح ايضا نغطصو بيه القاطو يجي بنين يهبل و يجي زاكي
وبعد ما تبرد التورتة و القاناج ناخذ التورتة ونحطها فوق شباك ونكب فوقها القناج ونخلوها حتى تجمد مليح ونديكوريوها ما ديروش كيما انا غصبت عليها ههههه
و في الاخير ان شاء الله تجربوها والله ما تندموش تجي تهبل وخاوتي عطاوني علامة 10/10 وننتضر تقييمكم
سلاااااااااااااام

[سارة زهرة]

يعطيك الصحة شهيتيني

قوليلي القناش نخليه يبرد شوية و نحطو علي الاطراف و الجوانب . يعمي علي برا ولا فريجيدار

[ام ملاك.]

يعطيك الصحة

[سرسورة85]

المشاركة الأصلية كتبت بواسطة سارة زهرة

يعطيك الصحة شهيتيني

المشاركة الأصلية كتبت بواسطة سارة زهرة

قوليلي القناش نخليه يبرد شوية و نحطو علي الاطراف و الجوانب . يعمي علي برا ولا فريجيدار

الله يسلمك ختي القناج خليه برا معليهش وكي يفضلك دسيه فب الفريجيدار اما يالنسبة للقناج كبيه في الوسط وراه يسيح وحدو على الحواشي واذا ما تغطاوش مليح اعرفي كيفاه تموديفي

[ام تقوى 2009]

4444444444444444444444444444444444

[ام الهضاب]

ربي يفرحك ان شاء الله

[ريتاج تيارتية]

[سرسورة85]

المشاركة الأصلية كتبت بواسطة ام الهضاب

ربي يفرحك ان شاء الله

ان شاء الله حنونة وانت ثاني ربي يفرحك

[سرسورة85]

واشي هذا يا بنات وحدة ما جربت وعطاتني رايها هههههههههههههههه

[حمدا لله كثير]

تهبل اختي الله يبارك عليكي


ان شاء الله نجرب مقاديرك و نردلك شكرا لمجهوداتك

[بريق الامل&]

[lola best girl]

شكرا على المجهود

[أطوار]

رووووووووووووووعة بارك الله فيك

[سرسورة85]

المشاركة الأصلية كتبت بواسطة أطوار

رووووووووووووووعة بارك الله فيك

فيكي باركة حنونة

[سرسورة85]

المشاركة الأصلية كتبت بواسطة حمدا لله كثير

تهبل اختي الله يبارك عليكي


ان شاء الله نجرب مقاديرك و نردلك شكرا لمجهوداتك

يبارك فيك حنونة ماذا بيا تجربوها كامل وتدعولي بالخير