بطاطا بيري من مطبخي كريييييييييييييييمة .....

[ام اسحاق.]

السلام عليكم و رحمة الله و بركاته

هاذي الوصفة تجي خفيفة و هاااايلة و ساهلة و ثاني مغذية
و هي بطاطا بيري بالباتور و الفكرة ما نعرف سبقوني ليها الاخوات و لا لا ...
المهم راح نعطيكم طريقتي و يا ربي نستفيدو الكل

اول حاجة تغسلي البطاطا نتاعك وتقشريها و تقطعيها مكعبات متساوية و تحطيها في الماء قدر ما يغطيها برك مع شوي ملح و تحطيها تطيب



كي تطيب من المفروض الماء ينقص خلاص ..انت تزيدي تصفيها مليح و تحطيها في اناء و تحطي فوقها الزبدة و لا مارغرين انا نستعمل لابال عينك ميزانك و الفرماج حسب الرغبة و تذوقي على الملح ممكن تزيدي شوي





و تمزجي الكل بالباتور حتى تتداخل المكونات مع اضافة الحليب شوي شوي و هنا تقدري تستخدمي الحليب السائل او تخلطي الحليب المجفف و لكن بشرط الحليب يكون سخون و من الاحسن تجريها شوي لانها راح تزيد تعقد على النار
تحطيها فوق النار متوسطة مع التحريك المستمر حتى تشوفيها ولات مثل الكريمة



و مبعد تقدميه كيم تحبي مع صوص و لا لحم مفروم مقلي
كيم انا قليت اللحم المفروم مع البصل و شوي فلفل اسود





بالصحة و الهنا ...اكلة ساهلة ماهلة في شوية وقت توجد و زيد مغذية
ملاحظة برك بالنسبة للبطاطا احيانا تكون من نوعية ماش مليحة و ما تطيبش كامل كيف كيف و راح تديرلك كعابر من الاحسن قبل ما تخدميها بالباتور جوزيها على رحاية الطماطم

سلاااااااام