ماعرفتش واش ندير وباش نبدا.........عاونوني بجاه ربي

kyara sama · 2013-10-19, 19:08

السلام عليكم ورحمة الله تعالى وبركاته
ياناس عاونوني انشالله ماتتحرموش من طعم النجاح والتفوق وربي يعطيكم وش تتمناو
انا تحصلت على بكالوريا 2012ب 14.33 شعبة علوم تجريبية POURTANT قبل كنت نقرا لاباس بيا ومن التلاميذ الأوائل ....وماقدرتش ندير حاجة مليحة درت veterinaire مع انو ماما كانت رافضتها وعولت نعاود الباك 2013 وثاني صحبتي اللي كنت متنافسة معاها وعاودتو وكنت نقرا للvetoوللباك كنت نخسيب الحالة ساهلة لقيت بزاف يعاودو كيما انا طلعلي المورال وقلت مانيش وحدي بالاك ننجح فيهم في زوج
بصح الحالة قع تبدلت la city وزيد الجامعة بصح قلت لا لا ممكن ننجح شديت قريت بزاف الكتب نتع التنمية البشرية ووليت متحمسة ........قريت بلي الطريقة باش تنجح في الباك وفي الجامعة لازم في الجامعة تركز على lEMD الأول ومبعد تبدا تقرا للباك ياسيدي قريت مليح في الجامعة وكنت نشارك حتى وحدة قالتلي بلي نتي هي اللي رايحة تماجوري وزيد بالزيادة قلت لبزاف التلاميذ بلي رايحة نعاود في الباك مشي يقولو خلاص هذي تعرف تقرا.....
قريت العلوم وحليت تمارين احمد امين خليفة وثاني سلفت للبنات كتاباتي والفيزياء كنت نخسيب روحي بلي مادام خدمت في الباك اللي فات مانراجعهاش بزاف قلت نركز على اللي ماخدمتش فيهم كيما العربية والفلسفة وزيد بالزيادة نخسيب روحي خلاص راني نجحت لدرجة وليت نعاون في التلاميذ نتع باك 2013وكتبت موضوع..
وثاني قلت بلي لازم نركز على حل التمارين والمواضيع مادام راني عارفة LPROGRAMME وقلت بلي نقرا كثر في العطلات بصح الاختبارات نتاع EMD الاول ماداروهمناش حتان مور العطلة نتع الربيع كي سمعت بيها بكيت بزاف ومبعد قلت معليش نقدر ننجح فجأة صرات حاجة ماكنتش قع متوقعتها مرضت مرضة خطيرة بحيث اني مانرقدش قع في الليل وعند المغرب تحكمني حالة نفسية نولي ميتة بالخوف وحاجة ماداواتني وليت نشرب في الدوا اللي لوكان تحبسو تزيد تمرض وثاني يرقد بزاف رحت لل3بسيكولوج كنت نخسيب روحي رايحة نموت مبعد مالتالي عاونتني غير الرقية الشرعية .......ريحت خلاص بصح موراها زدت مرضت في EXAMEN نتاع المادة اللي كنت نظل نشارك فيها مارفدتش قاع الستيلو حتى حارو فيا الاساتذة وعادو رايحين جايين مبعد مديت الورقة بيضا اسمي ومافيهاش.......الاستاذ سقسا صحبتي وقاتلو بلي تعرف تقرا قالها خلاص امالا نعاونها....
ومانقلكمش اخر مرة زدت مرضت فيها حتى رحت في الليل لسبيطار باش ريحت..........
المهم اتخذت قرار بلي نركز غير على الباك رحت نعقب فيه وكنت نعقب وفي نفس الوقت نشرب في الدوا حتى قريب رقدت في الامتحان نتاع الفرنسية...
والدوا حبستو بفضل ربي في رمضان.........
بصح النتيجة نتاع الباك كانت كارثة 11.83 حاجة ماتديرهالي وزيد العام نتاع الجامعة راح.. وصحبتي جابت الباك مليح وعامها نتاع الجامعة ثاني جابتو........فقدت قع الثقة في نفسي وليت غير نبكي اللي يشوفني يحير يقول بلي مستحيل نتي اللي كنتي متفائلة وتظلي تضحكي يصرالك هكا .....وكاين اللي قالولي تقولي غرقولك بوابر ............المهم لقراية كرهتها وعادت عندي غير الافكار السلبية اللي درتها مافلحت فيها........
قنعتني ماما بلي نعاود باك 2014 ووليت كل مانشد كتاب نبدا نتفكر واش صرالي ولا نبكي ولا نقعد نضيع في الوقت وكي نحل تمرين ونجيبو غالط نحبس قاع ونروح نتفرج ............مالقيت ماندير وماعرفتش كيفاش نقرا يا نحل تمارين ياندير ملخصات مبعد نحل ...............
اعطوني يالوكان نصيحة ماتعقبوش هاكاك نشالله تنجحو وماتشوفوش اللي شفتو انا ..........

feriel farawla · 2013-10-19, 19:18

عندي جارنا عقب الباك مره الاولى ماداهش و الثانيا داه مدخلش للجامعه و عاود الباك و مداهش

و لا كيما انت كره بصح دار ارادة و عاود للمرة الرابعة و درك راه يقرا مدرسة عليا للاساتذة

5 سنين يخرج يخدم

و انت ضيعتي عامين فقط

kyara sama · 2013-10-19, 19:23

اقتباس:

المشاركة الأصلية كتبت بواسطة feriel farawla

عندي جارنا عقب الباك مره الاولى ماداهش و الثانيا داه مدخلش للجامعه و عاود الباك و مداهش

و لا كيما انت كره بصح دار ارادة و عاود للمرة الرابعة و درك راه يقرا مدرسة عليا للاساتذة

5 سنين يخرج يخدم

و انت ضيعتي عامين فقط

شكرا اختي انشالله تتوفقي في حياتك...........

shy'n · 2013-10-19, 19:28

انا تاني كي نتفكر نحب نبكي

ممم اطلبي من عائلتك المساندة اظن ان هذا سوف ينسيك ماجرى العام لي فات و تتحمسي اكثر

kyara sama · 2013-10-19, 19:42

اقتباس:

المشاركة الأصلية كتبت بواسطة shy'n

انا تاني كي نتفكر نحب نبكي

ممم اطلبي من عائلتك المساندة اظن ان هذا سوف ينسيك ماجرى العام لي فات و تتحمسي اكثر

شكرا اختي
عائلتي والله واحد ماخلاني قع عاونوني حتى اللي ماكنتش قريبة منهم بزاف وعاونوني
وماما كل ماتشوفني دايرة يدي على خدي تجي تهدر معايا وتقولي اقراي
بصح والله ماقدرت مانكذبش.........
انشالله تنجحي وتديري واش تحبي

نسرين17 · 2013-10-19, 20:02

أختي كلمة انساي مش ساهلة عليك وعلى بالي بيها بسك ما يحس بالجمرة غير لي كواتوا

المهم نقولك حاولي تنساي لي فات ولازم ترقي روحك بنفسك كل يوم اذا قدرتي ومرة على مرة يرقيك الشيخ

وثقي بربي سبحانوا وديريه في بالك واذكريه صبحة وعشية وكي تكرهي حلي كتاب القرآن

والله فيه راحة نفسية خيييييــر من أنك تقابلي التلفاز , ماتقعديش هاك أختي هاذي (الله أعلم) غير عين حاسدين

على هذا لي نصحتك بالرقية نقلك حاجة انا عندك أكبر مثال العلوم نطير بيها مش حاجة أخرى والمواد كلها نخدم فيها

في الدار وفي الدروس الخصوصية لدرجة اني قبل ما نعقب الباك نخمم في واش من برونش ندير و واش من ولاية نقرى

ونشوكيك بلي انا اصلا ما جبتش الباك مش أني مانقراش لالا ولكن ........ عندي هذا العام باك تاعي ال4 ونفس الحالة مريت بيها

اني كي نحكم الكتاب ولا الكراس نتفكر بلي هذا الكراس لي كنت نقرى فيه العام لي فات والعام لي قبلو و...و....

لكن أملي في ربي كبير وعسى ان تحبوا شيء وهو شر لكم المهم اختي طولت عليك أقراي راها غير شدة وتزول

ولوكان تخممي بسلبية صدقيني ماتنجحيش توكلي على ربي وشدي الهمة وابداي كأنك أول مرة تعقبيه

ورانا هنا نعاونوا بعضانا في كلش وفي جميع المواد تلقاي بزاااف لي يحبوا الخير هنا ويعاونونا

بالتوفيق ان شاء الله

iman14 · 2013-10-19, 20:03

لا تياسي اختاه كل شيء قضاء و قدر و انظري لمن هو احزن منك لديا صديقة مجتهدة و لم تنجح بكالوريا مرتين متتابعتين و ها هي الان تعيد للمرة الثالثة و انت نجحت بالاول و الثاني فقط تريدين تخصص ممتاز لا باس لذلك الاعادة بعد النجاح خير من اعادة بعد الخسارة كوني قوية و ابدائي من جديد و حاولي و حتما سيكون نجاح من نصيبك ان شاء الله

kyara sama · 2013-10-19, 20:19

اقتباس:

المشاركة الأصلية كتبت بواسطة نسرين17

أختي كلمة انساي مش ساهلة عليك وعلى بالي بيها بسك ما يحس بالجمرة غير لي كواتوا

المهم نقولك حاولي تنساي لي فات ولازم ترقي روحك بنفسك كل يوم اذا قدرتي ومرة على مرة يرقيك الشيخ

وثقي بربي سبحانوا وديريه في بالك واذكريه صبحة وعشية وكي تكرهي حلي كتاب القرآن

والله فيه راحة نفسية خيييييــر من أنك تقابلي التلفاز , ماتقعديش هاك أختي هاذي (الله أعلم) غير عين حاسدين

على هذا لي نصحتك بالرقية نقلك حاجة انا عندك أكبر مثال العلوم نطير بيها مش حاجة أخرى والمواد كلها نخدم فيها

في الدار وفي الدروس الخصوصية لدرجة اني قبل ما نعقب الباك نخمم في واش من برونش ندير و واش من ولاية نقرى

ونشوكيك بلي انا اصلا ما جبتش الباك مش أني مانقراش لالا ولكن ........ عندي هذا العام باك تاعي ال4 ونفس الحالة مريت بيها

اني كي نحكم الكتاب ولا الكراس نتفكر بلي هذا الكراس لي كنت نقرى فيه العام لي فات والعام لي قبلو و...و....

لكن أملي في ربي كبير وعسى ان تحبوا شيء وهو شر لكم المهم اختي طولت عليك أقراي راها غير شدة وتزول

ولوكان تخممي بسلبية صدقيني ماتنجحيش توكلي على ربي وشدي الهمة وابداي كأنك أول مرة تعقبيه

ورانا هنا نعاونوا بعضانا في كلش وفي جميع المواد تلقاي بزاااف لي يحبوا الخير هنا ويعاونونا

بالتوفيق ان شاء الله

صحيتي اختي صح الرقية والله غير تفيد حتى واللي مايكونش مريض
انشالله تنجحي وتتوفقي وتديري واش تحبي

kyara sama · 2013-10-19, 20:20

اقتباس:

المشاركة الأصلية كتبت بواسطة iman14

لا تياسي اختاه كل شيء قضاء و قدر و انظري لمن هو احزن منك لديا صديقة مجتهدة و لم تنجح بكالوريا مرتين متتابعتين و ها هي الان تعيد للمرة الثالثة و انت نجحت بالاول و الثاني فقط تريدين تخصص ممتاز لا باس لذلك الاعادة بعد النجاح خير من اعادة بعد الخسارة كوني قوية و ابدائي من جديد و حاولي و حتما سيكون نجاح من نصيبك ان شاء الله

شكرا اختي انشالله تتوفقي ويعطيك ربي وش تتمناي

fr95 · 2013-10-19, 21:04

ربي معاك و اقراي و دركا نديو كامل الباك ب معدلات مليحة انشاء الله الفايدة في انك ترجعي ثقتك في نفسك و هادي حاجة صعيبة كيفي انا درك راني نحل في الفيزياء ما جبت حتى تمرين صحيح كامل مورال طاحلي مي درت شوية ورجعت قلت ماكان والو نغلط درك خير من في الباك
علابالي لي صرالك ماش حاجة ساهلة وراني جوزت كيفيك العام لي فات مرض خطيير و الحمدلله شفيت بقدرته بعد طول عذاب بصح المرض خلاني العام لي فات ندخل في نوفمبر نقرى بكل قوة و جبت معدل جيد نسبيا 16

المهم حبيت نقولك توكلي على ربي و اقراي قران و حاولي طلعي المورال و لي مكتبها ربي تلحق بالتوفيق و رانا كامل معاك

Queene miyo · 2013-10-19, 21:43

salam
wlh rana kamel kifkif 7ata ana kont na9ra w men lowlin w ki wssalt l bac tayecht lo9raya khlass 3agebt l bac l3am eli fet w majebtouch w ki netfakar nehbeeel kamel 7arou fiya ghir ana eli massenawnich manjibouch w ak tchouf ana aw n3awed fih w 9adrou njibou b 16 normal mais ki neji na9ra mana9derch lmh!! mafhemtech ana aw nssali w na9ra 9oraan bech rabi yehdini w mayessralich ki l3am eli fet w walou ma3andich 9odraa bech na9ra khlass w ki mana3rafch n7oul temrin nefchel w mal9itch el 7al belek ki net3awnou m3a ba3d na9drou w rabi yjib eli fih el khir mana3arfouch khir menou ssob7anou tawelt 3lik dsl

kyara sama · 2013-10-19, 22:16

اقتباس:

المشاركة الأصلية كتبت بواسطة fr95

ربي معاك و اقراي و دركا نديو كامل الباك ب معدلات مليحة انشاء الله الفايدة في انك ترجعي ثقتك في نفسك و هادي حاجة صعيبة كيفي انا درك راني نحل في الفيزياء ما جبت حتى تمرين صحيح كامل مورال طاحلي مي درت شوية ورجعت قلت ماكان والو نغلط درك خير من في الباك
علابالي لي صرالك ماش حاجة ساهلة وراني جوزت كيفيك العام لي فات مرض خطيير و الحمدلله شفيت بقدرته بعد طول عذاب بصح المرض خلاني العام لي فات ندخل في نوفمبر نقرى بكل قوة و جبت معدل جيد نسبيا 16

المهم حبيت نقولك توكلي على ربي و اقراي قران و حاولي طلعي المورال و لي مكتبها ربي تلحق بالتوفيق و رانا كامل معاك

شكرا اخي على المرور
ضركة نتا جبت 16 ؟

kyara sama · 2013-10-19, 22:17

شكرا اختي queene miyo شفتي هدي العين اللي تدير هكا
نشالله ربي يوفقنا قع

kyara sama · 2013-10-19, 22:19

بصح زعما الطريقة المثالية للمراجعة كيفاه نحلو ديراكت التمارين؟؟

زينب بن عمر · 2013-10-19, 22:41

والله ياختي احمدي ربي كون نحكيلك واش صاري فيا انا عامين جامعة وما نجحت وبرونش تافه جدا ومجتهدة في قرايتي مي النجاح مكان وانتي اوموا لقيتي لي يوقف معاك ماشي كي حالتي والله ياختي قريت حكايتك الدمعة طاحتلي وكيما يقولو شوف مصايب الناس تهون عليك مصيبتك وتهلاي في سورة البقرة والاستغفار وان شاء الله هاد العام تجيبي المعدل لي باغيتيه