**ثريدة** من مطبخي

ladymillion · 2013-06-07, 16:00

أهلا أحبتي جمعة مباركة انشاء الله واش راكم كل وحدة تدخل لهاذ الموضوع تقولنا وش دارت غداها أو امها وش دارت ok!!؟؟
أما أنا راح نوريلكم غدايا من أ الى ي وممكن تستفادو من طريقتي في الطبخ غدايا اليوم (( ثريدة )) بالدجاج تبعوا معايا

أول حاجة أنا طبخت لعائلة 5 أفراد
(( حبة بصلة كبيرة ، حبة طماطم كبيرة ، 4 فصوص ثوم ، ملعقة كبيرة مارغارين ، 2 م ص ملح ، ملعقة صغيرة ونصف فلفل أسود ، م ص كسبر ، رشة جوزة الطيب ))
في طنجرة الضغط ( كوكوط ) حطي المارغارين تذوب

هاذو التوابل

قطعي البصل والطماطم والثوم قطع صغيرة وحطيهم يتقلاو شوي مع المارغارين

حطي الدجاج مفصل بعد ما تكوني نقيتيه ملييييح من الامعاء وتغسليه وتشوطيه فوق النار وزيدي اغسليه بالماء والخل هاكا يكون دجاج نتاعك نطيييييف 5/5

اذا حبيتي تضيفي فلفل عكري حار + هريسة أنا نحب الحار

وزيدي الماء حتات يغطي الدجاج أنا درت لتر ماء وخليه حتان يغلي وغلقي الكوكوط كي تبدأ الكوكوط تصفر نقصي النار بعد 20 د طفي يكون الدجاج طاب

من جهة حضري الكوسى أغسليها قطعيها على 2 وملحيها مليييح باش تخرج ماء لي فيها وخليها على جهة

الان الثريدة ديري الكمية لي تشوفيها تكفي للعائلة ديريلها شوي زيت كمية صغيرة حاولي تخلي حبات الثريدة مزيتين شوي وحطيها في الكسكاس وخليها تفور لمدة 15د وخطيها بمنشفة نطيفة منديرش الغطاء لان راح يتندى ويهبطو قطرات الماء على الثريدة من بعد راح تتعجن

من بعد أسقيها بقليل من الماء وغطيها بمنشفة وخليها ترتاح شوي من بعد زيدي فوريها للمرة الثانية لمدة 10د وهي تفور وخليها في الوعاء وغطيها حتان كي تجبي تجمريها

الان بعد ما تفتحي الكوكوط نحي الدجاج حطيه في صينية باش يتحمر في الفرن

وميكسي المرق بالميكسور أو الرحاية اليدوية وصفي المرق كشما يكون فيه عظم ورجعيه في الكوكوط وأضيفي طماطم مصبرة والكوسى والحمص نص طياب

وشعلي النار خلي المرق يبدا يغلي وغلقي الكوكوط لمدة 10د الكوسى سهلة للطياب

حضري توابل الدجاج باش يتحمر
(( كمون ، ملح ، فلفل أسود ، فلفل عكري حار ،هريسة ، مايونيز ، زيت ))

ندهنو الدجاج بالبانسو نحيلو الجلدة هاذيك وتبليه ودخليه الفرن شاعل من فوق يتحمر

بعد ما طيب الكوسى أضيفي الفلفل حار أذا تحبيه المرق حار شوي خليه يغلي شوي برك وطفي

الان نوريلك 2 طرق تقديم البيض مع المعجنات التقليدية

1/ حطي شوي زعفران بودرة مع الماء وحطي البيضو مقشرة تتنقع في ماء الزعفران حوالي 20د راح تأخد طبقة رقيقة صفراء وهايلة للتقديم

2/ خذي أداة تكون رقيقية شوي وغير حادة أنا أستعملت السباتولا ، و قطعة ورق الالمنيوم مطوية كما في الصورة

حطي الورق ما بين الابهام والسبابة ووضع البيضة أيضا والاداة من فوق مع الضغط بالراحة لمدة دقيقة

هاهي كيفاش تكون

وهاذا شكلها النهائي على شكل قلب واش رايكم

تحضير الثريدة في قدر حطي كمية الثريدة لي راح تجمريها وزيديلها المرق حتان تتحطي ونقصي النار تكون هاااادية تغلي شوي ومتحركيهاش باش ماتفسدش حبتها ومتكونش مفتتة كي تتشرب الرقة شوي طفي عليها وحطيلها ملعقة مارغاريت خليها ترتاح 10د ومن بعد تقدري تقدميها

هاهي ثريدة من مطبخي نتمنى تكون عجبتكم

كيفية صنع الثريدة في بيتك :

الثريدة أمي لي خدمتها هاهي الوصفة

-- كيلو سميد رقيق
-- ملح حسب الحاجة
-- بيضة واحدة مخفوقة بالشوكة مع شويييي ماء باش ما تتكعبرش كي تخلطيها مع السميد
ولمي بالماء حتان تكون عجينة طرية وكوريها كويرات وخليها ترتاح ســـــــــــــــاعة وغطيها بكيس بلاستيكي

الان حضري النشا حلي بالمكينة اول خطوة حليها في 1 لثلاث مرات وحطي النشا شوي ماشي بزاف
ثم في 3 واذا جاتك كبيرة بزاف قطعيها بالسكين
ثم في 6 المكينة لي عندنا أخر رقم فيها 6 وحطيها فوق منشفة نطيفة وتكون كبيرة ومرشوش عليها شوي نشا وخليها تشيح شوي متخليهاش تشيييح بزاف وقطعيها بالسكين شرائط ماشي عريضة وحطيهم فوق بعضاهم ورشي النشا وزيدي قطعيها مربعات تكون صغيرة الان بعد ما تفور وتتجمر راح تكبار الحبة لذلك لازن تصغريها
وخليها تشيح على مهاها كي تشزفيها شاحت خلاص وحركيها مرة على مرة بيديك باش تشيح كامل كيف كيف

ان شاء الله نكون افدتكم

فايزة44 · 2013-06-07, 16:04

انا اول رد ندي الصحن كامل ، شكرا على كل ماتقدمينه من واصفات رائئئئئئئئئئئئئئئئئئئئئئعة

ام اجياد · 2013-06-07, 16:10

يعطيك الصحة سخفتيني

HADIL2044 · 2013-06-07, 16:14

اممممممممممممم
ابعثيلي شويا
يعطيك الصحة

ladymillion · 2013-06-07, 16:15

بارك الله فيكم هههههه كولو بصحتكم

mitrochka · 2013-06-07, 16:15

واااااااااااااااااااااااو
بارك الله فيك

oum rahma · 2013-06-07, 16:27

هاااااااايلة ، يعطيك الصحة وبارك الله فيك

ساندي 28 · 2013-06-07, 17:05

يعطيك الصحة

ladymillion · 2013-06-07, 19:30

وفيكم بركةأخواتي شكراااا

Oum yousra · 2013-06-07, 19:50

يا الحبيبة أنا ثاني راني من باتنة باه كي نجي راكي توجديلي صحن نتاع الصح ماتهفنيش بالتصاور برك راكي شهتيني و زيديلي صحن نتاع les crêpes نتاعك رآهم يهبلو كيما لي ناكلهم في فرانسا

~~جوهر دعوة~~ · 2013-06-07, 20:16

واو يعطيك الصحة اختي والله سخفتيني شكرًا علي الوصفة

بشرى2008 · 2013-06-07, 20:20

أممممممممممممممممممممممممممممممممممممممممممممممممم ممممممممممممممممممممممم

rofia.sarah · 2013-06-07, 20:26

هايلة و باينة بنينة يعطيك الصحة

ladymillion · 2013-06-07, 20:33

اقتباس:

المشاركة الأصلية كتبت بواسطة oum yousra

يا الحبيبة أنا ثاني راني من باتنة باه كي نجي راكي توجديلي صحن نتاع الصح ماتهفنيش بالتصاور برك راكي شهتيني و زيديلي صحن نتاع les crêpes نتاعك رآهم يهبلو كيما لي ناكلهم في فرانسا

ههههههههه شفتي لوكان نقدر نبعتلك علاش لالا بارك الله فيك ولك جزييييل الشكر

Oum Aness Bba · 2013-06-07, 20:56

هااايل أختي بارك الله طبق و عليه الكلام و الشرح وافي و كافي ..فقط أختي أحب أن أنبهك إلى أن جوزة الطيب أفتى فيها الكثير من علمائنا الأجلاء على أن إستعمالها حرام لأنها من المسكرات