اعينوني من فضلكم

[loulou1988]

شكرا لكل من اعانني على حل مشكلتي....

[samar89]

....كاين حوايج واجب عليك تخدميهم خاطر واجبااااااتك اتجاه زوجك تغسلي حوايجو وتنظفي وترتبي وتطيبي... وعادي متشتكيش خلاص لانو هذه هي المسؤولية...

بصح حوايج واحد اخرى لازم تحطي النقاط على الحروف ...هذيك تاع يذخل على 3 تاع الصباح...وتزيدي تديري لعشا لصحابو على 11 تاع الليل...... اظن تجاوز الحدود هنايا..

تناقشي معاه في هدوء قوليلو الامور اللي معجباتكش لانك حديثة العهد بالزواج ...يعني حسني الاوضاع قبل مايوالف

ربي يهنيك اختي........

[نورسين.داية]

لكن ما هي طبيعة عمله ؟؟؟؟؟

على حسب ما يبدو أن طبيعة العمل هي التي تقتضي الدخول و الخروج من المنزل بطريقة غير منتظمة .......

شوفي سوف أعطيك نصيحة ....عندما تطبخين ...دائما اعدي وجبة زائدة ....هذه قاعدة من قواعد الوالدة الكريمة
و إحتفظي بالأكل في الثلاجة ..............

مسألة قلب الملابس كامل الرجل هكذا دايرين .........فوضويين بالفطرة ....................عادي يعني لن تبقي فيها طول النهار ......

يدخل الرابعة صباحا أو 5 مساء شخصيا هذا لا يزعجني .....مادام لا يطالب بحقوق ....................

[Fatima fato]

يا اختي حاولي تتفاهمي معاه بالعقل
و دخلي شوية اجواء رمنسية لحياتكم
بلاك تهدأ الأمور بيناتكم
الله يهديه و يفرج عليك و ماتخليهش يوالف يدخل 4 و 5 تع الصباح

[loulou1988]

المشاركة الأصلية كتبت بواسطة fatima fato

يا اختي حاولي تتفاهمي معاه بالعقل
و دخلي شوية اجواء رمنسية لحياتكم
بلاك تهدأ الأمور بيناتكم
الله يهديه و يفرج عليك و ماتخليهش يوالف يدخل 4 و 5 تع الصباح

شكرا على النصيحة مي ما نخليهش يوالف شوية صعيبة على خاطر هكا كان في دارهم و احنا في دارنا ما حناش موالفين بيها .....

[حميد.ص]

ارجعي الى بيتك أختي الكريمة

اكيد انه قاسي و فظ معك لكن أصبري و ادعوا الله ان يهديه

المراه اقوى بكثير من الرجل و تعرف جيدا كيف تحافظ على بيتها

اطيعي زوجك ليسا خوفا منه و لا من امه

بل اطيعيه لكي يدخلكي ربي الجنة

[loulou1988]

المشاركة الأصلية كتبت بواسطة حميد.ص

ارجعي الى بيتك أختي الكريمة

اكيد انه قاسي و فظ معك لكن أصبري و ادعوا الله ان يهديه

المراه اقوى بكثير من الرجل و تعرف جيدا كيف تحافظ على بيتها

اطيعي زوجك ليسا خوفا منه و لا من امه

بل اطيعيه لكي يدخلكي ربي الجنة

شكرا اخي على النصيحة

[مراد سابقا2]

ليس هذا هو المشكل

[مريم الصابرة]

السلام عليكم اختي
شوفي اختي الزواج ولو ما رانيش متزوجة لكن خليني نقولك نظرا لأان اختي متزوجة وتقريبا زوجها يتصرف نفس تصرفات زوجك فالبداية ما تعرفش عقليوتو وشعال من مرة تجي للدار وما تحبش ترجع امي فالامور هذي ما عندهاش هدرة في دقيقتها تولي لدارها وتقولها تعلمي توالفي عقليتو
إنت الآن تحملي شوفي امورو هو متناقض ومازال شاد في حياة العزوبية والفي ترتبيلو حياتو وجدي عشاه بكري خليه يجي ياكلو او ما يجيش المهم إنت وجديه حتى ما يلقطلكش الأسباب ملابسو عارفاتو يقلب الخزانة إرجعي وراه ورتبيها جتى يتعلم النظام بالشوي نطفي دارك وما تخليش وراك اي سبب للشجار اما لما يهدر معاك ويعلي صوتو او ينتقدك ما تعمريش راسك وأسكتي شوفي خير علاج للزوجين عصبين هو سكوت الزوجة كاين عقل تخمو بيه تتناقشو اكيد كاين وقت وين تقعدو مع بعض تتكلمو إنت إستغلي الفرصة وناقشيه حاول تغيرلو مفهومو ويعونك ويترب حياتو وبالشوي راحا توالفي عليه وهو يوالف عليك هذا ازلواج فالبداية كونك رزينة وعاقل مهما كان الرجال ما راهمش كيما حنا المرا هي ترتب حياة الراجل موفقو وخليك من الزعاف وإرجعي لدارك هذاك ما راهش حل إنعلي بليس وما شي هكذا تنحل الأمور موفقة

[أم عامر]

ما نوافقش اللي يقول توالفي عقليته
اذا كانت هذه صح عقليته و كمل بها فالضغط راح يكون كبير على أختنا
و لكن نقول أصبري عليه و أعطي لنفسك و ليه وقت ربما تتغير الأمور
السنوات الأولى للزواج هي الصعيبة لأنه فيها يتم اكتشاف الزوجين
و ثانيا ربما زوجك راهوا يجرب فيك و هذا اللي جا في خاطري
ربما نصحوه أنه يولفلك أمور أو يشوف اذا تطيعيه و لا لا
و ممكن هو غضبان منك في أمر و يخرجهولك في أمر ثاني و ما تفهميش علاش
الرجل ماشي كيما المرأة كي ما يعجبوش حاجة منك ما يهدرش عليها بالذات
و لكن يقلقك في حاجة ثانية و ما جبيلوش خبر
المفيييد
شهر و نصف مدة قصيييرة بزااف و ما تستاهلش أنك تفكري في الطلاق
كما قتلك أعطيلوا فرصة واصبري عليه
حلّي كلامك معاه و ما تنتقديهش
قالك طيبيلي لصحابي في الليل جاوبيه مادابيا نفرحك و نفرح صحابك بصح راني نعسانة خلي غدوة نخلفهالم و نديرلهم عشا هايل
عوض أنك تقوليلو واش حسبتني خدامة
لأنه أي كلمة ماشي زينة الشيطان ينفخ فيها و يكبرها
خليه يسهر براحته و ما تعاتبيهش و لا شيء
الخزانة كي يقلبها عاونيه واضحكي معاه
و كي تقصري مع يماه خليها تحكيلك عليه و على طبياعه واش يحب وواش يكره
الرجال كامل كيما راهم المليح و القبيح يكرهوا العتاب و الإنتقاد و تحاسبيهم
و العصبي أكثر منهم
ما يسلكها معاه غير التبسيمة و السكات و نعم و معليه
يولي ملاك
و طبعا أدعي ربي يحنن قلبه عليك و يحننك عليه
بالتوفيق

[قمر السلام]

ربي يكون معاك يا اختي حاولي تقعدي معاه وتسقسيه يعني وجها لوجه وشوفي وشبيه بالاك كاينة حاجة في نفسو راها مخلياتوا يدير هكدا

[مواطنة]

اختي الكريمة كيما انت صعيب عليك توالفي التحول من الفتاة المتوازنة المستقلة الى زوجة تطيع زوجها و تتحمل طباعه التي لا تشبه طباعك حتى بالنسبة للزوج صعيب انو ينتقل من العزوبية و الاتكال الى المسؤولية المطلقة .
هو على حساب خدمة زوجك لازم تولفي نفسك هذيك حياة النظام كل سي في وقتو للرجال لي يخدمو في المؤسسات بدوام معين لكن اصحاب المهن الباقية انت لازمك توالفي
اختي الزوج العصبي يليق معاه برودة الاعصاب يعني بصريح العبارة اذا هو يصرخ على التوافه انت اطبخي و نظفي و قومي بواجباتك و اذا صرخ على شي نسيتيه او قصرتي فيه خليه يعيط وحدو و انت روحي كملي لي فيدك او اشغلي روحك بشي اخر غيرو بالوقت يفهم بلي اسبابو تافهة و كي يولي لرشدو و يكون في مزاج يقدر يسمعلك فكريه باللقطة و قوليلو فهمني بالشوية حتى نوالف يعني انت لازمك تبينيلو الغلطة ديالو و في نفس الوقت انك تفهميه انك تنتقدين التصرف فقط
فيه مرات لازمك تفوتي بلا ملاحظة ومرات لازمك تتكلمي معاه باش يتستقيم لانو كثرة الانتقاد ماشي مليحة في بداية الزواج
اما فيما يخص اصدقاءه تكلمي معاه يبلغك من قبل القايلو الحجة انك لازمك ترقدي بكري باش تنوضي للصلاة
الزوج العصبي يحب الكلام المعسول مالا تعلمي تتصنعي مثلا اذا قلتيلو شيء من بعد اكتشفتي انو زعف جيبيهالو بنكة او كلام مضحك باش ترجعي الموقف مضحك
حتى هو لما يزعف مرات كي يكمل اعمليلو كيما دراري صغار فاش بالتمسخير حتى تهوني الامر و الا يعجبو الحال يولي يأدي دور الغول في البيت
اخر نصيحة ليا نقولهالك و هي موجهة لكل متزوجة ومخطوبة اذا اردت ان تسعدي بزواجك لا تنتظري ابدا ان يسعدك زوحك لانه اصلا يعتمد عليك لتسعديه
بل اسعدي نفسك بان تغتنمي وقتك بالصلاة و الاذكار و تعلم ما تحبين تعلمه او اعمال يدوية المهم لا تقتلي هواياتك و كل ذلك
زوجي لست انت كل شيء في حياتي بل انت جزء من حياتي .

[Fatima fato]

المشاركة الأصلية كتبت بواسطة loulou1988

شكرا على النصيحة مي ما نخليهش يوالف شوية صعيبة على خاطر هكا كان في دارهم و احنا في دارنا ما حناش موالفين بيها .....

يا اختي دعواتنا كامل معاك ربي يفرج عليك

[عبد الله 22]

راكي ميزال في العام الاول ولهذا أنت في مرحلة الاكتشاف لطرف الاخرى لهذا يجب الصبر على هذه المراحلة حتى يمكن التاقلم بعدها بطريقتك التي ساكتشفها مع الوقت اما طريقة الهروب إلى الامام فليس حل مطلقا وتاكدي بأنه لن تجدي زوج كامل مهما كان ولهذا فالتاقلم هو من اهم قواعد الحياة الزوجية إضافة إلى التغيير على المدى البعيد

[دكن]

ريحوا وتفاهموا وحلوا هذا العقدة